قازاقستان • 04 جەلتوقسان، 2022

بولگاريالىق ءانشى روزا باعلانوۆا اتىنداعى بايقاۋدا جەڭىمپاز اتاندى

استانادا قازاقستان مەن كسرو حالىق ءارتيسى، حالىق قاھارمانى، ءانشى روزا باعلانوۆاعا ارنالعان حالىقارالىق ۆوكاليستەر بايقاۋى اياقتالدى، دەپ جازادى Egemen.kz.

دينار كەرىم

بايقاۋعا قازاقستان، تۇركيا، وزبەكستان، تاتارستان، پولشا، بولگاريا، قىرعىز رەسپۋبليكاسى جانە بەلارۋس رەسپۋبليكاسىنان 18-35 جاس ارالىعىنداعى ورىنداۋشىلار قاتىستى.

12 قازان مەن 20 قاراشا ارالىعىندا ونلاين فورماتتا وتكەن ىرىكتەۋ كەزەڭى اياسىندا 48 ءوتىنىم قابىلدانعان. ونىڭ قورىتىندىسى بويىنشا فينالدىق بولىمگە 21 ورىنداۋشى ءوتتى.

«بيىل ءبىز بىرەگەي تۇلعا جانە كورنەكتى ءانشى روزا باعلانوۆانىڭ 100 جىلدىعىن اتاپ وتەمىز. حالىق سۇيىكتىسىنىڭ مەرەيتويى يۋنەسكو-نىڭ مەرەيتويلىق كۇندەر كۇنتىزبەسىنە ەندى جانە ونىڭ قۇرمەتىنە كوپتەگەن ءىس-شارالار ۇيىمداستىرىلدى، سونىڭ ىشىندە پاريج مەن ماسكەۋ قالالارى بار. بۇل تىزىمدە ۆوكاليستەر بايقاۋى ەرەكشە ورىن الادى. ونى وتكىزۋ-روزا تاجىبايقىزىنىڭ تالانتىن زاماناۋي ورىنداۋشىلاردىڭ مويىنداۋىنىڭ جارقىن ايعاعى»، دەدى قر مادەنيەت جانە سپورت مينيسترلىگى مادەنيەت كوميتەتى توراعاسىنىڭ ورىنباسارى دانيار اليەۆ كونكۋرسانتتاردى ماراپاتتاۋ ءراسىمى اياسىندا.

كونكۋرستىڭ جەڭىمپازى جانە 2 ميلليون تەڭگەلىك باس جۇلدەنىڭ يەگەرى بولگاريادان كەلگەن ءانشى سلاۆەيا يۆانوۆا بولدى.

I ورىن-باتتاليەۆا الماگۇل (قازاقستان رەسپۋبليكاسى) 750 000 تەڭگە.

I ورىن-يسرايلوۆ بەك (قىرعىز رەسپۋبليكاسى) 750 000 تەڭگە.

II ورىن-كاچمارەك ميحال (پولشا رەسپۋبليكاسى) 500 000 تەڭگە.

II ورىن-جامبىلبەك قىمبات (قازاقستان رەسپۋبليكاسى) 500 000 تەڭگە.

III ورىن – جۇبان ەرنازار (قازاقستان رەسپۋبليكاسى) 250 000 تەڭگە.

III ورىن – باقبەرگەن ازامات (قازاقستان رەسپۋبليكاسى) 250 000 تەڭگە.

سونداي-اق، روزا باعلانوۆانىڭ ۇلى تاجەن باعلانوۆ پەن قازاقستان رەسپۋبليكاسى قورعانىس مينيسترلىگىنىڭ ەسترادالىق-سيمفونيالىق وركەسترىنىڭ كوركەمدىك جەتەكشىسى دارحان راقىمعاليەۆ ارنايى سىيلىقتى تابىس ەتتى.