بۇل كۇنى D توبىنىڭ ماتچتارىنا قاراعاندا, C كۆارتەتىنىڭ كەزدەسۋلەرى اسا تارتىستى ءوتىپ, جانكۇيەرلەر نازارىن وزىنە اۋدارتتى. ويتكەنى بۇل توپتاعى بارلىق قۇرامادا كەلەسى كەزەڭگە شىعۋ مۇمكىندىگى بولدى. ماسەلەن, 1/8 كەزەڭىنە جولداما الۋ ءۇشىن ارگەنتينا مەن پولشاعا تەڭ ناتيجە دە جەتكىلىكتى ەدى, ال مەكسيكا مەن ساۋد ارابياسىن تەك ءىرى ەسەپتەگى جەڭىس قانا قاناعاتتاندىراتىن. دەگەنمەن ارگەنتينا پولشانى 2:0 ەسەبىمەن تىزە بۇكتىرسە دە, ەۋروپالىقتاردى وزىمەن بىرگە كەلەسى كەزەڭگە الىپ شىقتى. ال قاتارلاس وتكەن ەكىنشى كەزدەسۋدە مەكسيكا ساۋديانى 2:1 ەسەبىمەن ۇتقانىمەن, «اتستەكتەر» ەلى ءۇش تۋردا دا ءوز قاقپاسىنا كوپ گول وتكىزىپ العاندىقتان, توپتىق كەزەڭدە قالىپ قويدى.
پولشا قۇراماسىن الەم چەمپيوناتىنىڭ پلەي-وفف ساتىسىنا ارگەنتينالىقتاردىڭ اياۋشىلىعى مەن قاقپاشى ۆويتسەح ششەنسنىيدىڭ ەرلىگى الىپ شىقتى دەسە دە بولادى. سەبەبى ارگەنتينا بۇل كەزدەسۋدە پولشا قاقپاسىنا 13 مارتە ءدال سوققى باعىتتاپ, سونىڭ ەكەۋىن عانا گولعا اينالدىرا الدى. ال ۆويتسەح 11 مارتە سەيۆ جاسادى. ءتىپتى ول ءبىرىنشى تايمدا ليونەل مەسسي تەپكەن 11 مەترلىك ايىپ دوبىن قايتارىپ, كەزدەسۋدىڭ سوڭىندا ماتچتىڭ قاھارمانىنا اينالدى. ەگەر مەسسي پەنالتيدەن گول سوعىپ كەتكەندە, پولشا فۋتبولشىلارى چەمپيوناتپەن قوشتاسۋى دا مۇمكىن ەدى. سونىمەن قاتار مەسسي بۇل ساتسىزدىگىنەن كەيىن الەم چەمپيوناتتارىندا گول سوعۋ بويىنشا مارادونا, كريشتيانۋ رونالدۋ, ريۆالدو, رۋدي فەللەر, ادەميرا جانە وسكار ميگەستەردىڭ الدىنا شىعىپ الۋ مۇمكىندىگىن پايدالانا المادى. قازىر بۇل فۋتبولشىلاردىڭ ءبارى بىرىنشىلىكتە 8 گولدان سوققان.
بۇل ماتچتا «يۋۆەنتۋس قاقپاشىسى 1974 جىلعى الەم چەمپيوناتىنداعى وتانداسى يان توماشەۆسكيدىڭ جانە 2002 جىلعى الەمدىك دودادا ونەر كورسەتكەن امەريكالىق برەد فريدەلدىڭ جەتىستىگىن قايتالادى. ياعني ءۇش قاقپاشى دا ءبىر الەم چەمپيوناتىندا ەكى پەنالتيدى قايتارعان.
ەكىنشى تايمدا ارگەنتينا ساپىنان الەكسيس ماكالليستەر (49-مينۋت) مەن حۋليان الۆارەس (69) مەرگەندىگىمەن كوزگە ءتۇسىپ, ارگەنتينانى كەلەسى كەزەڭگە شىعاردى. وسىلايشا, العاشقى تۋردا ساۋد ارابياسىنان جەڭىلگەن ارگەنتينالىقتار كەيىنگى ەكى ماتچتا التى ۇپاي ولجالاپ, ول جەڭىلىستىڭ كەزدەيسوق ەكەنىن دالەلدەدى. ال پولشا 1986 جىلعى الەم بىرىنشىلىگىنەن كەيىن العاش رەت مۋنديالدىڭ پلەي-وفف ساتىسىنا جولداما الدى.
قاتاردىڭ 500 مىڭعا جۋىق تۇرعىنى بار لۋسايل قالاسىندا ورنالاسقان «لۋسايل ايكونيك» ستاديونىنداعى ەكىنشى ماتچتا ساۋد ارابياسى العاشقى تۋرداعىداي سەنساتسيا جاساي المادى. ارابتاردىڭ ءبىرىنشى تۋرداعى ءىرى جەڭىسىنەن كوپشىلىك جانكۇيەر ولاردى بۇل توپتا ەكىنشى ورىنمەن كەلەسى كەزەڭگە شىعادى دەپ بولجاعان ەدى. بىراق ەكىنشى تۋردا پولشادان ۇتىلعان ولار سوڭعى تۋردا دا مەكسيكادان جەڭىلىپ قالدى – 2:1.
ەكى ەلدىڭ فۋتبولشىلارى ءبىرىنشى تايمدا ءبىر-ءبىرىنىڭ قاقپاسىنا گول سوعا الماعانىمەن, جانكۇيەرلەر ەكىنشى تايمدا ءۇش گولدىڭ كۋاسى بولدى. مەكسيكا ساپىنان 48-مينۋتتا ەنري مارتين, 52-مينۋتتا لۋيس چاۆەس مەرگەندىگىمەن كوزگە ءتۇستى. ال ماتچتىڭ سوڭعى مينۋتىندا ساۋد ارابياسى قۇراماسىنان سالەم ءال داۆساري نىسانانى ءدال كوزدەپ, وسى ماتچتاعى جانە ءوز قۇراماسىنىڭ الەم بىرىنشىلىگىندەگى سوڭعى گولىن سوقتى. ءبىر قىزىعى, «لۋسايل ايكونيك» ستاديونىنداعى ماتچتاردا قۇرامالار ءۇش گولدان ارتىق دوپ سوعا الماي جاتىر. ماسەلەن, بۇل ارەنا بۇگىنگە دەيىن الەم چەمپيوناتىنىڭ بەس ماتچىن قابىلداسا, سونىڭ ەكەۋىندە – 2:1, قالعان ءۇش ماتچتا 2:0 ەسەبى تىركەلگەن ەكەن.
ال س توبىنداعى جالعىز جولدامانى اۋستراليا مەن دانيا قۇرامالارى ساراپقا سالىپ, «جاسىل قۇرلىق» وكىلدەرى قاتارىنان بەسىنشى رەت الەم چەمپيوناتىنىڭ پلەي-وفف كەزەڭىنە جولداما الدى – 1:0. كەزدەسۋدىڭ تاعدىرىن شەشكەن جالعىز گولدى ەكىنشى تايمنىڭ 61-مينۋتىندا مەتيۋ لەكي سالدى. جاسىراتىنى جوق, ەكى تۋردا ءبىر-اق ۇپاي جيناعان دانياعا قاراعاندا ءبىر جەڭىسى بار اۋستراليالىقتاردىڭ كەلەسى كەزەڭگە شىعۋ مۇمكىندىگى جوعارى ەدى. دەسە دە, داڭقتى باپكەر كاسپەر يۋلمانن جەتەكشىلىك ەتەتىن دانيا قۇراماسى قارسىلاتارىن تەك ءىرى ەسەپپەن جەڭگەن جاعدايدا عانا 1/8 فينالعا جولداما الاتىن. وكىنىشكە قاراي, دانيا فۋتبولشىلارى 90 مينۋت بويى دوپقا يەلىك ەتىپ, مەتتيۋ رايان قاقپاسىنا 13 رەت سوققى جاساعانىمەن, ونىڭ بىردە-ءبىرىن گولعا اينالدىرا المادى. ال كوبىرەك قورعانىسقا كوڭىل ءبولىپ, قارسى شابۋىلعا يەك ارتقان ازيا قۇرلىعىنىڭ وكىلدەرى ءبىر عانا مۇمكىندىگىن ءتيىمدى پايدالانىپ, كاسپەر شمەيحەل قورعاعان قاقپادان ساڭىلاۋ تاپتى. 2018 جىلعى الەمدىك دودانىڭ 1/8 كەزەڭىنە شىققان دانيا بيىل سول جەتىستىگىن قايتالاي الماي, پۇشايمان بولدى.
كەلەسى كەزەڭنىڭ جولداماسىن مەرزىمىنەن بۇرىن شەشىپ قويعان فرانتسيا تۋنيس قۇراماسىمەن وتكەن ويىندا الاڭعا ەكىنشى قۇرامنىڭ فۋتبولشىلارىن شىعاردى. ديدە دەشام وسى ارقىلى نەگىزگى قۇرامدى ماڭىزدى ماتچتار الدىندا ءبىر تىنىقتىرىپ السا, الاڭعا از شىعىپ جۇرگەن فۋتبولشىلارعا تاعى ءبىر مۇمكىندىك بەردى. ايتسە دە, الەم چەمپيونى دەيتىن دارداي اتاعى بار فرانتسيا قۇراماسىندا وسال فۋتبولشىنىڭ بولمايتىنى تۇسىنىكتى عوي. بىراق كەشەگى ماتچتا ولاردىڭ كۇشى ءتۋنيستى تىزە بۇكتىرۋگە جەتپەدى. 58-مينۋتتاعى ۆاحبي ءحازريدىڭ گولى تۋنيسكە جەڭىس سىيلاعانىمەن, كەلەسى كەزەڭگە شىعۋعا جەتكىلىكسىز بولدى. 90+8 مينۋتتا فرانتسيا ساپىنان انتۋان گريزمانن تارازى باسىن تەڭەستىرگەن ەدى. بىراق گول سوعىلعان ءساتتى ۆيدەو قايتالاۋدان كورگەن تورەشى گولدى ەسەپكە العان جوق.
وسىلايشا, س جانە D توپتارىنىڭ ءۇشىنشى تۋر ماتچتارىنان كەيىن ءتۋرنيردىڭ 1/8 فينالىنا شىققان تاعى ءتورت قۇراما انىقتالدى. ءسويتىپ, 3 جەلتوقساندا وتەتىن پلەي-وفف باسەكەسىندە ارگەنتينا اۋستراليامەن, 4 جەلتوقسانداعى ماتچتا پولشا فرانتسيامەن كەزدەسەتىن بولدى.
سونداي-اق كەشە ە توبىنداعى ەكى جولدامانى جاپونيا مەن يسپانيا, كوستا-ريكا مەن گەرمانيا قۇرامالارى, F توبىندا حورۆاتيا مەن بەلگيا, كانادا مەن ماروككو ساراپقا سالدى. ال بۇگىن جانكۇيەرلەر G توبىنداعى كامەرۋن – برازيليا, سەربيا – شۆەيتساريا جانە H توبىنداعى كورەيا – پورتۋگاليا, گانا – ۋرۋگۆاي قۇرامالارىنىڭ ويىندارىن تاماشالايدى. وسى ماتچتارمەن بيىلعى الەم بىرىنشىلىگىنىڭ توپتىق كەزەڭىندەگى باسەكەلەر اياقتالسا, سەنبى كۇنى 1/8 فينال ماتچتارى باستالادى.
