پىكىر • 01 جەلتوقسان، 2022

ۇمىتىلماس تاريحي ءسات

ەلوردا تورىندە پرەزيدەنت قاسىم-جومارت كەمەل ۇلى توقاەۆتى ۇلىقتاۋ سالتاناتتى ءراسىمى ءوتتى. ايتۋلى ءىس-شارادا مەملەكەت باسشىسى انت بەرىپ، پرەزيدەنتتىك قىزمەتىنە رەسمي كىرىستى. ءبىز دە ۇلىقتاۋ راسىمىنە قاتىسۋ قۇرمەتىنە يە بولىپ، قاسيەتتى سىر ەلىنەن استانادا وتكەن القالى جيىنعا زور ىقىلاسپەن كەلدىك.

Egemen Qazaqstan

كوللاجدى جاساعان زاۋرەش سماعۇل، «ەQ»

حالقىمىزدىڭ ارعى-بەرگى تاريحىندا ەل-جۇرتتىڭ بىرلىك تۋىنىڭ استىنا اق نيەتپەن جينالىپ، ەل تىزگىنىن ۇستاعان تۇلعانىڭ قۇرمەتىنە ۇلىقتاۋ ءراسىمىن وتكىزۋدىڭ ءمانى دە، ماڭىزى دا جوعارى بولعانىن بىلەمىز. ال وسىناۋ جاھاندانۋ زامانىندا ەگەمەن ەلدىڭ ەڭسەلىلىگىن كورسەتىپ، دەربەستىگىن پاش ەتىپ، الەم كوز تىككەن باس قالادا سالتاناتتى تۇردە ۇلىقتاۋ ءراسىمىنىڭ جوعارى دەڭگەيدە وتكىزىلۋىن – حالقىمىزدىڭ سان عاسىردان بەرى قالىپتاسقان سالتقا بەرىك بولىپ، بەكەم بىرلىك پەن كوركەم تىرلىكتى ۇشتاستىرۋى دەۋگە بولادى.

كەشەگى سايلاۋدا قاسىم-جومارت كەمەل ۇلى توقاەۆتىڭ ەل جۇرتشىلىعىنىڭ ۇلكەن قولداۋىنا يە بولىپ، ايقىن باسىمدىقپەن قازاقستان پرەزيدەنتى بولىپ سايلانۋى – ەگەمەندىكتى باياندى ەتۋ جولىنداعى ەڭ بيىك بەلەستىڭ ءبىرى. ەل قاسىم-جومارت كەمەل ۇلىنا ەلدىڭ قامىن ويلايدى، نامىسىن جىبەرمەيدى دەپ ءبىر اۋىزدان سەنىم ارتتى. بۇل – سانالى تاڭداۋ. سەبەبى قاسىم-جومارت توقاەۆ جۇرگىزىپ وتىرعان ساياسات ناتيجەلى جانە جەمىستى بولىپ وتىرعانى بەلگىلى. سول سەنىم جۇگى ەلدى ابىرويدىڭ بيىگىنە شىعارىپ، ءوسۋ مەن وركەندەۋگە، جاڭارۋ مەن جاڭعىرۋعا نەگىز بولادى دەپ سەنەمىز.

ۇلىقتاۋ راسىمىنە قاتىسۋ قۇرمەتىنە يە بولۋ – مەن ءۇشىن زور قۋانىش ءارى ۇمىتىلماس تاريحي ءسات. ءبىز پرەزيدەنتتى قولدايمىز، ونىڭ ساياساتىن، باستامالارىن جۇزەگە اسىرۋ جولىندا ايانباي ەڭبەك ەتەمىز. ەل تىزگىنىن قولعا العان مەملەكەت باسشىسىنا شىن جۇرەكتەن ابىروي-اماندىق تىلەيمىن! ادىلەتتى قازاقستاندى بىرگە قۇرىپ، بىرگە دامىتايىق!

اقتورە يبراگيم ۇلى،

قىزىلوردا وبلىسى سىرداريا اۋداندىق ءماسليحاتىنىڭ دەپۋتاتى