مەسسيدىڭ ءحالى «مۇشكىل»

الەم چەمپيوناتىنىڭ ەكىنشى تۋر ويىندارى اياسىندا ارگەنتينا مەن مەكسيكا قۇرامالارى كەزدەسىپ، ماتچتان كەيىن فۋتبولشىلار ادەتتەگىدەي ءبىر-بىرىمەن جەيدە الماسقان بولاتىن. كەزدەسۋدەن كەيىن الەۋمەتتىك جەلىدە ارگەنتينا قۇراماسىنىڭ كيىم اۋىستىرۋ بولمەسىندەگى مەسسيدىڭ مەكسيكا جەيدەسىن اياعىمەن باسىپ تۇرعان فوتوسۋرەتى تاراپ كەتتى. العاشىندا بۇعان ەشكىم نازار اۋدارماعان ەدى. كەيىننەن كاسىپقوي بوكستاعى مەكسيكانىڭ ماقتانىشى ساۋل «كانەلو» الۆارەس سونى بايقاپ قويىپ، مەسسيگە الەۋمەتتىك جەلىدە قوقان-لوقى كورسەتتى.

«مەسسيدىڭ اياعىنىڭ استىندا ءبىزدىڭ ەلدىڭ تۋى بەينەلەنگەن جەيدەنى كوردىڭىزدەر مە؟ قۇدايدان ونى مەنىمەن جولىقتىرماۋىن تىلەيمىن! مەن ارگەنتينانى قالاي سىيلاسام، ولار دا مەكسيكانى سولاي قۇرمەتتەۋگە ءتيىس. مەن ارگەنتينا تۋرالى ەمەس، تەك مەسسي تۋراسىندا ايتىپ وتىرمىن»، دەپ جازدى الۆارەس تۆيتتەر پاراقشاسىندا. ازىرگە بۇل داۋعا قاتىستى مەسسي ەشقانداي پىكىر بىلدىرگەن جوق، بىراق ليونەلمەن ءبىر الاڭدا ويناعان فۋتبولشىلار ونى قورعاپ، ادەيى ىستەمەگەنىن جازىپ جاتىر.

مباپپە – وزبەكستان «قاھارمانى»

فرانتسيا مەن دانيا قۇرامالارىنىڭ اراسىنداعى ماتچتا كيليان مباپپە مەر­گەن­­دىك تانىتىپ، سوققان گولىن فران­تسيادان كەلگەن جانكۇيەرلەردىڭ الدىنا بارىپ تويلادى. ماتچتان كەيىن سول ءسات تۇ­سىرىل­گەن فو­توسۋرەتتى مباپپە ءوزىنىڭ Instagram پاراق­شا­سىنا جۇكتەپ، ءاپ-ساتتە وزبەك­ستان­نىڭ قاھار­مانىنا اينالىپ شىعا كەلدى.

سويتسەك، قاتارعا وزبەكستاننان بارعان جان­كۇيەر ستاديوننىڭ تريبۋناسىنا وزبەكستان­نىڭ تۋىن ءىلىپ قويعان ەكەن. الا تاقيالى اعايىن­داردىڭ قۋانىشىنا وراي، كيليان دا ءدال سول وزبەكستاننىڭ تۋى ىلىنگەن جەرگە بارىپ گولىن تويلاي قالعان ەكەن. مباپپەنى الەۋمەتتىك جەلىگە وزبەكستان تۋى بار سۋرەتتى سالعانى ءۇشىن وعان وزبەك حالقى ريزاشىلىعىن ءبىلدىرىپ، ءوز ەلىنە قوناققا شاقىرىپ جاتىر. ءتورت كۇن بۇرىن سالىنعان سۋرەت بۇگىنگە دەيىن ءتورت ميلليونعا جۋىق ءلۇپىل جيناپ، 75 مىڭعا جۋىق جانكۇيەر پىكىر جازعان. ونىڭ باسىم كوپشىلىگى وزبەكستاندىق فۋتبول جانكۇيەرلەرى ەكەنى ايتپاسا دا تۇسىنىكتى.

«اكە كورگەن دوپ تەبەدى»

بيىلعى الەم چەمپيوناتىندا كەزىندە فۋت­بول الەمىندە جاسىنداي جارقىلداعان داڭق­تى فۋتبولشىلاردىڭ ۇلدارى بوي كور­سەتە باستادى. ماسەلەن، 1995 جىلعى «ال­تىن دوپتىڭ» يەگەرى، قازىرگى ليبەريا مەملەكەتىنىڭ پرەزيدەنتى دجوردجا ۆەانىڭ ۇلى تيموتي ۆەا اقش قۇراماسى ساپىندا، دانيا­لىق فۋتبولشى پەتەر شمەيحەلدىڭ ۇلى كاسپەر شمەيحەل، 1998 جىلى فران­تسيامەن بىرگە الەم چەمپيونى اتانعان ليليان تيۋرامنىڭ ۇلى ماركۋس تيۋرام، ني­دەر­لاندتىق دانني ءبليند­تىڭ ۇلى دەيلي بليند قاتارداعى الەم­دىك دودادا دوپ تەۋىپ ءجۇر.

وسىنداي اكەگە قاراپ وسكەن ۇلداردىڭ قاتارىندا يراندىق امير ابەدزادە مەن امە­ريكالىق دجوۆانني رەينا دا بار. ءبىر قى­زىعى، بۇلاردىڭ اكەلەرى احماد رەزا ابەد­زادە مەن كلاۋديو رەينا 1998 جىلعى الەم چەمپيوناتىنىڭ توپتىق كەزەڭىندە ءبىر-بىرىنە قارسى جاسىل الاڭدا ويناعان ەكەن. كەشەگى يران مەن اقش اراسىنداعى ماتچتا سول تاريح قايتالانۋى مۇمكىن ەدى. وكىنىشكە قاراي، ول كەزدەسۋدە امير دە، دجوۆانني دە قوسالقى قۇرامدا قالىپ قويىپ، 24 جىل بۇرىنعى اكەلەرىنىڭ «جەتىستىگىن» قايتالاي المادى.