قازاقستان • 30 قاراشا، 2022

مينسكىدە قازاقستاننىڭ مادەنيەت كۇندەرى ءوتىپ جاتىر

51 رەت كورسەتىلدى

28 قاراشادا مينسكىدە قازاقستاننىڭ مادەنيەت كۇندەرى باستالدى، دەپ حابارلايدى Egemen.kz مادەنيەت جانە سپورت مينيسترلىگىنىڭ ءباسپاسوز قىزمەتىنە سىلتەمە جاساپ. 

باعدارلامانىڭ ءبىرىنشى كۇنى فيلمدەر كورسەتىلدى، مەرەكەلىك ءىس-شارالار قۇرمانعازى اتىنداعى قازاق ۇلتتىق كونسەرۆاتورياسىنىڭ رەكتورى ارمان جۇدەباەۆتىڭ دومبىرا بويىنشا شەبەرلىك ساباعىمەن، «تۇران» ەتنو-فولكلورلىق ءانسامبلىنىڭ ءدارىس-كونتسەرتىمەن، گالا-كونتسەرتپەن، سونداي-اق قازاقستاننىڭ قولدانبالى ونەر كورمەسىمەن جالعاستى.

ء«بىز ۇنەمى كينو جانە كوركەمونەر كورمەلەرىن وتكىزەمىز، كىتاپحانالارىمىز، مۋزەيلەرىمىز بەن ارحيۆتەرىمىز جەمىستى ءوزارا ءىس-قيمىل جاساپ كەلەدى، بىرقاتار جوو ارالىق شارتتار ىسكە اسىرىلادى، ادەبيەت، كينەماتوگرافيا قايراتكەرلەرى اراسىندا دوستىق بايلانىستار ساقتالادى، تەاترلارىمىز اراسىندا سەرىكتەستىك بۇدان ءارى دە داميدى. بەلارۋستىڭ شىنايى مادەني برەندىنە اينالعان «ۆيتەبسكىدەگى سلاۆيان بازارى» حالىقارالىق ونەر فەستيۆالى كوپتەگەن تالانتتى قازاقستاندىق انشىلەرگە ۇلكەن شىعارماشىلىق ومىرگە جولداما بەردى»، دەپ اتاپ ءوتتى داۋرەن اباەۆ.

بەلارۋس جۇرتشىلىعى الدىندا حالىقارالىق فەستيۆالدار مەن بايقاۋلاردىڭ لاۋرەاتتارى: الىشەر كارىموۆ، رۋحيا بايدۋكەنوۆا، شىنار يباتوۆا، مارحابا سايلانبەك، شىنار بالتينا، جانار دۋگالوۆا جانە باسقالار ونەر كورسەتتى.

شەبەرلىك ساباقتارى اياسىندا دومبىرا بويىنشا 7 دانا قازاق ۇلتتىق مۋزىكالىق اسپابى تاپسىرىلدى.

«تۇركى حالىقتارى الەمگە سىيعا تارتقان ەڭ ۇلكەن ونەرتابىستاردىڭ ءبىرى – دومبىرا. دومبىرا – قازاقتاردىڭ باستى مۋزىكالىق اسپابى، بۇل قازاق ءۇشىن بۇكىل الەم، دومبىرا – قازاقتىڭ جانى. ونىڭ شەكتەرىنىڭ دىبىسىندا ۇلى دالانىڭ تەرەڭ فيلوسوفياسى جاتىر. قازىرگى قازاقستاندا دا دومبىرا جوعارى قۇرمەتكە يە – ءاربىر وتباسىندا وسى مۋزىكالىق اسپاپ توردەن ورىن العان»، دەدى مينيستر داۋرەن اباەۆ.

سونداي-اق مينسكىدە مينيسترلىك باسشىسى بەلارۋستىق ارىپتەسى اناتولي ماركەۆيچپەن كەزدەستى. اڭگىمەلەسۋ بارىسىندا تاراپتار مادەنيەت سالاسىنداعى بىرلەسكەن جوبالاردى ىسكە اسىرۋدى قوسا العاندا، ءوزارا ءىس-قيمىل ماسەلەلەرىن تالقىلادى.

رت

سوڭعى جاڭالىقتار

ۇقساس جاڭالىقتار