بوكس كەشىن ۇيىمداستىرۋشى مەنەدجەر زيا اليەۆتىڭ ايتۋىنشا, قازاقستاندىق بوكسشىلاردىڭ قاتىسۋىمەن وتەتىن جەكپە-جەك 24 جەلتوقسان كۇنى الماتىدا وتەدى دەپ جوسپارلانعان. ال باتىر جۇكەمباەۆ وسى كەشتىڭ باستى ايقاسىندا WBC Asia تيتۋلىن ساراپقا سالادى. ازىرشە وتانداسىمىزدىڭ قارسىلاسى بەلگىسىز. بۇل جۇكەمباەۆتىڭ قازاقستاندا وتكىزەتىن تۇڭعىش جەكپە-جەگى بولماق.
1991 جىلى جامبىل وبلىسىندا دۇنيەگە كەلگەن بوكسشى 2015 جىلدان بەرى كاسىپقوي بوكس شارشى الاڭىندا جەكپە-جەك وتكىزىپ ءجۇر. بۇگىنگە دەيىن ول 19 مارتە رينگكە كوتەرىلىپ, 18 كەزدەسۋىندە قارسىلاسىنان باسىم تۇسسە, 14 جەكپە-جەگىن مەرزىمىنەن بۇرىن اياقتاعان. ءبىر ايقاسىندا قارسىلاسىنان تەحنيكالىق نوكاۋتپەن جەڭىلىپ قالعان. جۇكەمباەۆ 19 جەكپە-جەگىنىڭ 18-ءىن كانادادا وتكىزسە, ءبىر رەت اقش-تا ايقاسقان.
