بۇل وقيعا قاراشا ايىنىڭ باسىندا اتىراۋ اۋەجايىندا تىركەلگەن. «اتىراۋ-كۋتايسي» حالىقارالىق رەيسىمەن ۇشۋ بارىسىندا ادەتتەگىدەي «Rapiscan» رەنتگەن تەلەۆيزيالىق اپپاراتىمەن جولاۋشىلاردىڭ قول جۇكتەرى تەكسەرىلەدى. كەدەندىك باقىلاۋ جۇرگىزۋ كەزىندە قازاقستان ازاماتىنىڭ قول جۇگىنەن 60700 دوللار, 10 مىڭ رۋبل جانە 7 مىڭ تەڭگە قولما-قول اقشا تابىلادى. زاڭ بۇزۋشىعا قاتىستى اكىمشىلىك قۇقىق بۇزۋشىلىق تۋرالى كودەكستىڭ 545-بابى بويىنشا ءىس قوزعالدى.
ەستەرىڭىزگە سالا كەتەيىك, پرەزيدەنتتىڭ 2022 جىلعى 14 ناۋرىزداعى №830 جارلىعىنا سايكەس, ەلىمىزدەن قازاقستان رەسپۋبليكاسىنىڭ ۇلتتىق بانكى اكەتۋ كۇنىنە بەلگىلەنگەن باعام بويىنشا ەسەپتەلگەن جانە 10 مىڭ دوللار بالاماسىنان اساتىن سوماداعى قولما-قول شەتەل ۆاليۋتاسىن جانە شەتەل ۆاليۋتاسىنداعى اقشا قۇرالدارىن اكەتۋگە تىيىم سالىنعان.
