كوپ ۇزاماي پرەزيدەنت «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسى تۋرالى» العاشقى جارلىعىنا قول قويدى. وسىلايشا, قاسىم-جومارت كەمەل ۇلى 2019 جىلى ۇسىنعان «حالىق ۇنىنە قۇلاق اساتىن مەملەكەت» تۇجىرىمداماسىنا ءوزىنىڭ ادالدىعىن تاعى دا راستادى.
وتكەن پرەزيدەنتتىك سايلاۋدا «اۋىل» پارتياسىنىڭ كانديداتى جيگۋلي دايراباەۆ ەكىنشى ورىنعا يە بولدى. ءبىز, «اۋىل» پارتياسى دا, ءبىزدىڭ كانديدات تا سايلاۋعا قاتىسۋ ارقىلى, سايلاۋشىلار الدىندا, بۇقارالىق اقپارات قۇرالدارىندا, الەۋمەتتىك جەلىلەردە ايتىلعان سوزدەر ارقىلى اۋىلداعى جانە اۋىل شارۋاشىلىعىنداعى كۇردەلى جاعدايلارعا جۇرتشىلىقتىڭ نازارىن اۋدارۋعا تىرىستىق. مەملەكەت باسشىسىنىڭ اۋىلدى دامىتۋ ماسەلەسىن ءبىرىنشى ورىنعا قويۋىندا ءبىزدىڭ «اۋىل» پارتياسىنىڭ, كانديداتىمىز جيگۋلي دايراباەۆتىڭ دا ەڭبەگى بار دەپ سانايمىن.
ءبىز ارقاشان قازاقستاننىڭ بارلىق الەۋمەتتىك-ەكونوميكالىق ماسەلەلەرىن شەشۋدىڭ كىلتى ەلىمىزدىڭ اۋىل جانە اۋىل شارۋاشىلىعى ماسەلەلەرىن شەشۋدە جاتقانىن, اۋىل ماسەلەلەرىن شەشسەك قالا ماسەلەلەرى شەشىلەتىنىن ايتتىق. ازىق-ت ۇلىك باعاسىنىڭ تۇراقتى ءوسۋى, جۇمىسسىزدىق, حالىق تابىسىنىڭ تومەندىگى, تۇرعىن ۇيگە, قالالارداعى بالاباقشالارعا شەكسىز كەزەك – بۇلاردىڭ بارلىعى اۋىلدىڭ ماسەلەسى شەشىلگەن ۋاقىتتا شەشىلەدى.
اۋىلدارداعى ءومىردىڭ جاقسارۋى عانا قالاداعى, جالپى ەلدەگى جاعدايدىڭ جاقسارۋىنا اكەلەدى. ەگەر اۋىلداعى جانە اۋىل شارۋاشىلىعىنداعى جاعداي ناشارلاي بەرسە, وندا قالاداعى جانە جالپى قازاقستان بويىنشا جاعداي دا ودان ءارى ناشارلايدى.
«اۋىل» پارتياسى ارقاشان اۋىل مەن اۋىل شارۋاشىلىعىنىڭ دامۋىن ءبىر-بىرىنەن بولەك قاراستىرۋعا بولمايتىنىنا سەنىمدى. ويتكەنى ولار سيام ەگىزدەرى سياقتى. ال ولاردى بولۋگە تىرىسۋ ەكەۋىنىڭ دە كۇيرەۋىنە اكەلەدى. ەكىنشىدەن, اۋىل مەن اۋىل شارۋاشىلىعىنىڭ تابىستى دامۋىنىڭ نەگىزى سەرۆيستىك-تۇتىنۋ كووپەراتيۆتەرى بولۋ كەرەك.
سونىمەن قاتار مۇنداي كووپەراتسيا تەك جەكە قوسالقى شارۋاشىلىقتارعا عانا قاجەت ەمەس. سەرۆيستىك-تۇتىنۋ كووپەراتسياسى بارلىق شاعىن, ورتا, ءىرى شارۋا قوجالىقتارىنا, سونداي-اق اكتسيونەرلىك قوعامدار نەمەسە جاۋاپكەرشىلىگى شەكتەۋلى سەرىكتەستىكتەر نەمەسە وندىرىستىك كووپەراتيۆتەر دەپ ءبولىپ, ولاردىڭ مولشەرىنە جانە ولاردىڭ ۇيىمدىق-قۇقىقتىق نىسانىنا قاراماستان بارلىق اۋىل شارۋاشىلىعى وندىرىستىك زاڭدى تۇلعالارعا قاجەت.
تولەۋتاي راحىمبەكوۆ,
«اۋىل» حالىقتىق-دەموكراتيالىق پاتريوتتىق پارتياسى توراعاسىنىڭ ءبىرىنشى ورىنباسارى
