بۇل جولعى ۇلىقتاۋ ءراسىمى وزگەشە ءوتتى. قوعام بەلسەندىلەرى, ۇكىمەتتىك ەمەس ۇيىم وكىلدەرى, جاستار, سپورت, دەنساۋلىق, اۋىلشارۋاشىلىق, مادەنيەت قىزمەتكەرلەرى, عالىمدار شاقىرىلىپتى. شەنەۋنىكتەن ازاماتتىق قوعام وكىلى باسىم بولدى.
ۇلىقتاۋ ءراسىمى ەركىن فورماتتا ءوتتى. اقوردا وتكىزەتىن ءىس-شارالاردا تەلەفوندى الىپ قالاتىن, بۇل شارادا شەكتەۋ بولمادى. مەن بۇل شاراعا كوپبالالى انالاردىڭ وكىلى رەتىندە شاقىرتۋ الدىم. پرەزيدەنتتىڭ كونستيتۋتسياعا قول قويىپ انت بەرۋ ءساتى, تۋدى ءسۇيىپ, ءتاۋ ەتۋى ەرەكشە تولقىتاتىن ءسات ەكەن.
پرەزيدەنت ەڭ العاشقى جارلىعىن اۋىلدى دامىتۋعا ارنادى. ەل بەسىگى – اۋىل كوركەيسە قازاقستان ەكونوميكاسى دا داميتىنى ءسوزسىز. ەل حالقىنىڭ 40 پايىزى تىرلىك كەشەتىن اۋىلدىڭ وتىز جىلدا ءتۇپ-تامىرى ۇزىلۋگە شاق قالدى. پرەزيدەنت الداعى بەس جىلدا اۋىل ەڭسەسىن تىكتەيدى دەپ ۋادە بەردى.
ۇلىقتاۋ راسىمىنەن كەيىن, «قازاقستان» كونتسەرت زالىندا مەرەكەلىك كونتسەرتكە باردىق. روزا رىمباەۆا مەن ديماشتان باسقا, انشىلەر قۇرامى جاسارىپ-جاڭارعان ەكەن. انشىلەرمەن بىرگە زالداعى ەكى مىڭعا جۋىق كورەرمەن ورىندارىنان تىك تۇرىپ, «اتامەكەن», «كوك تۋدىڭ جەلبىرەگەنى» اندەرىن قوسىلىپ شىرقادى. حالىق رۋحتى كوتەرەتىن, بىرىكتىرەتىن دۇنيەلەرگە شولدەپ قالىپتى. ۇلىقتاۋ راسىمىنە بارلىق وڭىردەن كەلگەن قاتىسۋشىلار جاڭا كۇش-جىگەرگە بايىپ, رۋحىمىز كوتەرىلىپ قايتتىق.
ءلاززات قوجاحمەتوۆا,
پرەزيدەنت جانىنداعى ۇلتتىق قۇرىلتاي مۇشەسى
قاراعاندى وبلىسى
