كەزدەسۋ بارىسىندا قازاقستان, ازەربايجان, گرۋزيا جانە تۇركيا سىرتقى ساياسي ۆەدومستۆولارىنىڭ باسشىلارى مەن كولىك سالاسىنداعى مينيسترلەرى جۇمىس ىستەۋ جاعدايلارىن جاڭعىرتۋ ارقىلى حالىقارالىق كولىك مارشرۋتتارىن جەدەل دامىتۋ جونىندەگى شارالار كەشەنىن ازىرلەۋ بويىنشا بىرقاتار ماسەلەنى قارادى. جيىندا كاسپي-قارا تەڭىز وڭىرىندە كووپەراتسيانى نىعايتۋ ءۇشىن پراكتيكالىق قادامدار ازىرلەندى.
مينيستر م.تىلەۋبەردى ترانسكاسپي حالىقارالىق كولىك باعىتىن (تحكب) جانە «ورتا ءدالىزدى» دامىتۋ جونىندەگى قازاقستاندىق تاراپتىڭ تاسىلدەرىن باياندادى. «قازاقستان بۇكىل كاسپي ءوڭىرىنىڭ ترانزيتتىك-كولىكتىك الەۋەتىن نەعۇرلىم تولىق اشۋ ءۇشىن سىندارلى ءوزارا ءىس-قيمىل مەن اشىق ديالوگقا بەيىمدەلگەن», دەدى ءسىم باسشىسى.
يندۋستريا جانە ينفراقۇرىلىمدىق دامۋ ءمينيسترى ق.وسكەنباەۆ قاتىسۋشىلاردىڭ نازارىن جۇكتەر تاسىمالداۋ جۇكتەمەسى بىرنەشە ەسە وسكەن ترانسكاسپي ءدالىزىن ودان ءارى دامىتۋ جونىندە ناقتى شەشىمدەر قابىلداۋ قاجەتتىگىنە اۋداردى. «وسى جىلدىڭ 10 ايىندا اقتاۋ جانە قۇرىق تەڭىز پورتتارى ارقىلى تحكب بويىنشا شامامەن 1,5 ملن توننا جۇك تاسىمالدانىپ, بۇل وتكەن جىلدىڭ كورسەتكىشتەرىنەن 2 ەسە اسىپ ءتۇستى», دەپ اتاپ ءوتتى ق.وسكەنباەۆ.
قاتىسۋشىلار كولىك الەۋەتىن دامىتۋ جونىندەگى نەگىزگى باعىتتارعا دەگەن كوزقاراستاردىڭ بىرلىگىن قاناعاتتانۋشىلىقپەن اتاپ ءوتتى جانە ۇكىمەتتىك دەڭگەيدە تىكەلەي بايلانىستاردى جانداندىرۋعا ءوزارا مۇددەلىلىگىن راستادى.
ءىس-شارا قورىتىندىسى بويىنشا بارلىق تاراپتار كەلىسىلگەن جۇمىس پرينتسيپتەرىن, سونداي-اق ناقتى پارامەترلەرى, ىسكە اسىرۋ مەرزىمدەرى جانە جاۋاپتى ورىنداۋشىلارى بار ناقتى جوبالاردى كوزدەيتىن 2022-2027 جىلدارعا ارنالعان «تار» ورىنداردى سينحروندى جويۋ جانە «ورتا ءدالىزدى» دامىتۋ جونىندەگى جول كارتاسىنا قول قويدى. ۋاعدالاستىقتاردى ىسكە اسىرۋ 2025 جىلعا قاراي ءدالىز بويىنشا وتكىزۋ قابىلەتىن جىلىنا 10 ملن تونناعا دەيىن ارتتىرۋعا مۇمكىندىك بەرەدى.
