سپورت • 29 قاراشا، 2022

برازيليا مەن پورتۋگاليا پلەي-وففتا

38 رەت كورسەتىلدى

فۋتبولدان قاتاردا ءوتىپ جاتقان الەم چەمپيوناتىنىڭ ەكىنشى تۋر ويىندارى مارەسىنە جەتتى. الەمدىك تەڭبىل دوپ مەرەكەسىنىڭ جەتىنشى كۇنىندە جانكۇيەرلەر G جانە H توپتارىنداعى قۇرامالاردىڭ ماتچىن تاماشالادى. اتاپ ايتقاندا، G توبىنىڭ العاشقى كەزدەسۋىندە كامەرۋن مەن سەربيا، ەكىنشىسىندە برازيليا مەن شۆەيتساريا شەبەرلىك بايقاستى. ال H توبىنىڭ كۆارتەتىندە كورەيا مەن گانا، پورتۋگاليا مەن ۋرۋگۆاي قۇرامالارى جاسىل الاڭدا جولىقتى.

بۇعان دەيىنگى الەم چەمپيوناتتارىنىڭ تاريحىنا كوز جۇگىرتەر بولساق، ەكىنشى تۋردان كەيىن-اق بىرقاتار قۇرامانىڭ پلەي-وفف كەزەڭىنە جولداما العانى، تۋرنيرمەن قوشتاساتىن اۋتسايدەرلەر بەلگىلى بولىپ قوياتىن. ال قاتارداعى دوپ دوداسىنىڭ 2-تۋرىنان كەيىن نەبارى ءۇش قۇراما عانا كەلەسى كەزەڭگە شىقتى. ولار: فرانتسيا، برازيليا جانە پورتۋگاليا. جارىس قوجايىنى قاتار مەن كانادا الەم چەمپيوناتىنداعى جورىعىن توپتىق كەزەڭنەن اياقتايتىن بولدى. دەسە دە، ءالى 27 قۇرامانىڭ كەلەسى كەزەڭگە شىعۋ مۇمكىندىگى ساقتالىپ تۇر. بۇل – فۋتبول جانكۇيەرلەرىن كەشە باستالعان ءۇشىنشى تۋردا بىرىنەن ءبىرى وتەتىن تارتىستى ماتچتار كۇتىپ تۇر دەگەن ءسوز.

G توبىنىڭ ەكىنشى تۋرىندا كامەرۋن مەن سەربيا قۇرامالارى ءبىر-ءبىرىنىڭ قاقپاسىنا ءۇش گولدان سوقسا دا، ەكەۋى دە ءۇش ۇپاي ولجالاي المادى. 2019 جىلى پايدالانۋعا بەرىلگەن ء«ال-جانۋب» ستاديونىندا وتكەن كەزدەسۋ 3:3 ەسەبىمەن تەڭ اياقتالدى. بۇل – ەكىنشى تۋرداعى ماتچتاردا ەڭ كوپ گول سوعىلعان جانە ەڭ ءىرى ەسەپ تىركەلگەن جالعىز ماتچ بولدى. كەزدەسۋدىڭ ەسەبىن 29-مينۋتتا كامەرۋن قۇراماسىنىڭ ورتالىق قورعاۋشىسى جان كاستەللەتتو اشتى. بۇرىشتامادان اسىرىلعان دوپ ءبىرىنشى نيكوليا ن’كۋلۋدىڭ باسىنا ءتيىپ، كەيىننەن كاستەللەتتونىڭ اياعىنان تابىلدى. قاقپانىڭ الدىندا قاراۋسىز تۇرعان جان سەربيا قاقپاسىنا وپ-وڭاي گول سوعىپ كەتتى.  

45 مينۋت بويى تارازى باسىن تەڭەستىرە الماعان سەربيالىقتار ءبىرىنشى تايمعا قوسىلعان التى مينۋتتىڭ ىشىندە ەكى گول سوعىپ، تارازى باسىن تەڭەستىرىپ قانا قوماي، ەسەپتە العا شىعىپ الدى. 46-مينۋتتا ستراحينيا پاۆلوۆيچ ايىپ دوبىنان اسىرىلعان پاستى ناتيجەلى اياقتاسا، ارادا ەكى مينۋت وتكەندە سەرگەي ميلينكوۆيچ-ساۆيچ بۇرىشتامادان گول سوقتى.

ەكىنشى تايم باستالعان بەتتە سەربيا فۋتبولشىلارى تاعى دا كامەرۋندىقتاردى قاپى قالدىردى. 51-مينۋتتا ەۋروپالىقتاردىڭ كوم­بي­ناتسيالىق شابۋىلىن الەكساندار ميتروۆيچ گولمەن تۇيىندەدى – 3:1. كەيىننەن كامەرۋن فۋت­بولشىلارى الاڭ ورتاسىندا بەلسەندى ويناي باستادى. ءسويتىپ اينالدىرعان ءۇش مينۋتتا افريكالىقتار تابلوداعى كورسەتكىشتى 3:3-كە جەتكىزدى. 63-مينۋتتا ۆەنسان ابۋباكار مەرگەن­دىگىمەن كوزگە تۇسسە، 66-مينۋتتا ەريك ماكسيم شۋپو-موتينگ ويىننىڭ نۇكتەسىن قويدى.

«Stadium 974» ستاديونىنداعى ەكىنشى ماتچ­تا برازيليا شۆەيتساريانى ءبىر دوپ ايىرماسىمەن جەڭىپ (1:0)، فرانتسيانىڭ سوڭىنان ەكىنشى بولىپ پلەي-وفف كەزەڭىنە شىقتى. ەۋروپادا يتاليادان كەيىن قورعانىستا ساۋاتتى وينايتىن شۆەيتساريالىقتار بۇل ماتچتا برازيليا قۇراماسىنىڭ شابۋىلشىلارىن ابدەن ابىگەرگە سالدى. ءبىرىنشى تايمدا بەس دۇركىن الەم چەمپيون­دارى گول سوعا الماعانىمەن، ەكىنشى تايمدا ءبارىبىر ءوز دەگەندەرىنە جەتتى. العاشقى تۋردا سەربيا قاقپاسىنا ەكى گول سوققان ريشارليسون بۇل ماتچتا دا مەرگەندىك تانىتقان ەدى. الايدا تورەشى گول سوعىلعان ءساتتى VAR ارقىلى قايتا قاراپ، ريشارليسوننىڭ ويىننان تىس قالعانىن مالىمدەپ، سوعىلعان گولدى ەسەپتەمەي قويدى. دەسە دە ماتچتىڭ اياقتالۋىنا ساناۋلى مينۋت قالعاندا كازەميرو ءوزىنىڭ جويقىن سوققىسىمەن كوزگە ءتۇسىپ، كومانداسىن 1/8 فينالعا شىعاردى.

H توبىنىڭ العاشقى ويىنىندا كورەيا فۋتبولشىلارى افريكانىڭ ءتورت دۇركىن چەمپيونى گانا قۇراماسىن جەڭە المادى – 3:2. قاتاردىڭ ءال-رايان قالاسىندا ورنالاسقان «ەديۋكەيشن سيتي» ستاديونىندا 100 مينۋتقا جالعاسقان ماتچتىڭ ءبىرىنشى تايمىندا گانا فۋتبولشىلارى ايقىن باسىمدىق تانىتتى. 24-مينۋتتا مۇحاممەد ساليسۋ نىسانانى ءدال كوزدەسە، ارادا 10 مينۋت وتكەندە مۇحاممەد كۋدۋس كورەيالىق قاقپاشىنى قاپى قالدىردى – 2:0.

ەكىنشى تايم باستالعان بەتتە كورەيا قۇراماسىنىڭ شابۋىلشىسى چجو گيۋ سون ەكى بىردەي جىلدام گولىنىڭ ارقاسىندا تارازى باسىن تەڭەستىرىپ، گانانىڭ قارقىنىن قايتارعانداي بولدى. دەگەنمەن، كورەيالىق فۋتبولشىلاردان كامبەك كۇتكەن جانكۇيەرلەردىڭ قۋانىشىن 68-مينۋتتا مۇحامماد كۋددۋس سۋ سەپكەندەي باستى. ويىنداعى ەكىنشى گولىن سوققان ول كومانداسىنا ءۇشىنشى تۋر ويىندارى الدىندا ماڭىزدى ءۇش ۇپاي سىيلادى.

ەكىنشى تۋردى پورتۋگاليا مەن ۋرۋگۆاي قۇرامالارى تۇيىندەدى. ءبىرىنشى تۋردا گانا قۇراماسىن 3:2 ەسەبىمەن ارەڭ جەڭگەن پورتۋگاليالىقتار بۇل تۋردا ۋرۋگۆايدى ەش قيىندىقسىز تىزە بۇكتىردى – 2:0. ءبىرىنشى تايمدا 2016 جىلعى ەۋروپا چەمپيوندارى دوپقا يەلىك ەتۋ بويىنشا ايقىن باسىمدىققا يە بولعانىمەن، قارسىلاستارى قاقپاسىنا نەبارى ءبىر عانا ءدال سوققى باعىتتاي الدى. ءسويتىپ ءبىرىنشى تايمدا بىردە-ءبىر گول كورمەگەن جانكۇيەرلەر ەكىنشى تايمدا ەكى گولدىڭ كۋاسى بولدى. 54-مينۋتتا «مانچەستەر يۋنايتەد» پەن پورتۋگاليا قۇراماسىنىڭ جارتىلاي قورعاۋشىسى برۋنۋ فەرناندەش گول سوققاندا قىزىق جاعداي تىركەلدى. العاشىندا فەرناندەش تەپكەن دوپتى كريشتيانۋ رونالدۋ باسپەن قاقپاعا باعىتتاپ جىبەرگەندەي كورىنىپ، ماتچ حاتتاماسىنا رونالدۋدىڭ ەسىمى جازىلعان-دى. كەيىننەن بۇل گولعا كريشتيانۋدىڭ ەش قاتىسى جوق ەكەنى انىقتالىپ، ويىن حاتتاماسىنا برۋنۋ فەرناندەشتىڭ ەسىمى جازىلدى. كەزدەسۋدىڭ سوڭىندا تورەشى ۋرۋگۆاي قاقپاسىنا 11 مەترلىك ايىپ دوبىن بەلگىلەدى. ونى برۋنۋ ءساتتى ورىندادى. وسىلايشا، ەكى ويىندا 6 ۇپاي جيناعان پورتۋگاليا پلەي-وفف كەزەڭىنە مەرزىمىنەن بۇرىن شىققان ءۇشىنشى قۇراما اتاندى. 

سوڭعى جاڭالىقتار

جاڭا باعىت

ساياسات • كەشە

ءورت: قاۋىپ پەن ساقتىق

توتەنشە جاعداي • كەشە

تۇلعا تۋرالى تۋىندى

ادەبيەت • كەشە

جولبارىس جىمى

ادەبيەت • كەشە

ەل سەنىمىن جالعاعان جوبا

ەكولوگيا • كەشە

جەلاياقتار استانادا جينالادى

جەڭىل اتلەتيكا • كەشە

جانىبەكتى جەكپە-جەككە شاقىردى

كاسىپقوي بوكس • كەشە

ۇقساس جاڭالىقتار