فۋتبول • 28 قاراشا، 2022

بەلگيانىڭ التىن ءداۋىرى اياقتالدى ما؟

82 رەت كورسەتىلدى

قاتاردا ءوتىپ جاتقان فۋتبولدان الەم چەمپيوناتىنىڭ كەزەكتى كۇنىندە جانكۇيەرلەر تارتىسقا تولى ءتورت ماتچتى تاماشالادى. جەكسەنبى كۇنى جاسىل الاڭعا E توبىنداعى جاپونيا – كوستا-ريكا، يسپانيا – گەرمانيا، ال F كۆارتەتىندەگى بەلگيا – ماروككو، حورۆاتيا – كانادا قۇرامالارى شىعىپ، ماڭىزدى ۇپايلاردى ساراپقا سالدى.

F توبىنىڭ ەكىنشى تۋر اياسىنداعى بەلگيا مەن ماروككو اراسىنداعى ماتچتا الەم چەمپيوناتىنىڭ تاعى ءبىر سەنساتسياسى تىركەلدى. ءبىرىنشى تۋردا 2018 جىلعى الەم بىرىنشىلىگىنىڭ كۇمىس جۇلدەگەرى حورۆاتيامەن تەرە­زەسى تەڭ دارەجەدە ونەر كورسەتكەن ماروككو ەكىنشى تۋردا بيىلعى بىرىنشىلىكتىڭ نەگىزگى فاۆوريتتەرىنىڭ ءبىرى بولعان بەلگيانى ەكى دوپ ايىرماسىمەن ءسۇرىندىردى. دوحاداعى ءال-تۋماما ستاديونىندا وتكەن كەزدەسۋدە 49 جاستاعى يسپانيالىق مامان روبەرتو مارتينەس جەتەكشىلىك ەتەتىن بەلگيا قۇراماسى قارسىلاستارىنا قاراعاندا الدەقايدا بەلسەندى بولعانىمەن، بىردە-ءبىر گول سوعا المادى. كەزدەسۋدىڭ نەبارى بەسىنشى مينۋتىندا ميشي باچۋاي (بەلگيا) ەسەپتى اشاتىن تاماشا ءساتتى ءمۇلت جىبەرىپ الدى. قاقپاشىمەن بەتپە-بەت شىققان شابۋىلشى دوپتى قاقپانىڭ تومەنگى سول جاق بۇرىشىنا قاراي تەپكەن ەدى. الايدا ماروككو قاقپاشىسى مۋنير تاماشا سەيۆىمەن جانكۇيەرلەردىڭ قوشەمەتىنە بولەندى. ءبى­رىنشى تايمنىڭ سوڭىنا دەيىن بەلگيالىقتار قار­قىنىن ءبىر ساتكە دە باسەڭدەتپەي، قارسىلاستارى قاقپاسىن تورۋىلداۋمەن بولدى. ال افريكا قۇرلىعىنىڭ وكىلدەرى تەك قارىمتا شابۋىلعا يەك ارتتى. سونداي ساتتەردىڭ بىرىندە حاكيم زيەش (ماروككو) كۋرتۋا قور­عاعان قاقپادان ساڭىلاۋ تاپقان ەدى. بىراق ۆار كومەگىنە جۇگىنگەن تو­رەشى زيەشتىڭ ويىننان تىس قال­عا­نىن انىقتاپ، گولدى ەسەپتەمەي قويدى.

دەگەنمەن، ەكىنشى تايمدا ما­روككو فۋتبولشىلارى ويىندى ءوز باقىلاۋلارىنا الىپ، دوپقا كوبىرەك يەلىك ەتە باستادى. كەزدەسۋدىڭ 73-مينۋتىندا ابدەلحاميد سابيري ايىپ دوبىن ءساتتى ورىنداپ، كومانداسىن ەسەپتە العا شىعاردى. روبەرتو مارتينەس تارازى باسىن تەڭەستىرۋ ءۇشىن تاۋەكەلگە بارىپ، الاڭعا قور­عاۋشىلاردىڭ ورنىنا شابۋىلشىلاردى شىعاردى. بىراق بۇل وزگەرىستەر دە بەلگيانى جەڭىلىستەن قۇتقارىپ قالا المادى. ەكىنشى تايمعا تورەشى قوسقان قوسىمشا مينۋتتاردا زاكاريا ءابۋحليال قاق­پانى ءدال كوزدەپ، ەسەپتى 2:0-گە جەتكىزدى. وسىلايشا، ءبىر جەڭىس، ءبىر تەڭ ناتيجەمەن ماروككو قۇراماسى ءتورت ۇپايمەن ءوز توبىندا ەكىنشى ورىنعا كوتەرىلىپ الدى. وسىدان ءتورت جىل بۇرىن رەسەي جەرىندە وتكىزىلگەن الەم بىرىنشىلىگىندە ماروككو توپتىق كەزەڭنەن وتە الماعان بولاتىن. ال بەلگيا قۇراماسىنىڭ قولا جۇلدەگەر اتانعانى بارشاعا ءمالىم.

بۇل توپتاعى ەكىنشى ماتچتا حورۆاتيا فۋتبولشىلارى كامبەك جاساپ، كانادانى 4:1 ەسەبىمەن تاس-تالقان ەتتى. ماتچتى «ۇيەڭكى جاپىراقتار» ەلىنىڭ وكىلدەرى ءساتتى باستاعانىمەن، كەزدەسۋ سوڭىنا دەيىن ەسەپتەگى باسىمدىعىن ساقتاپ قالا المادى. كەزدەسۋدىڭ ەكىنشى مينۋتىندا كانادا قۇراماسىنىڭ ويىنشىسى الفونسو دەۆيس ەسەپ اشقانىمەن (بۇل بيىلعى الەم چەمپيوناتىندا ەڭ جىلدام سوعىلعان جالعىز گول بولىپ تۇر)، حورۆاتيالىقتار توقسانىنشى مينۋت تۇگەسىلگەنگە دەيىن كانادا قاقپاسىنا ءتورت گول ەنگىزدى. ءبىرىنشى تايمنىڭ 36 جانە ەكىنشى تايمنىڭ 76-مينۋتىندا اندرەي كراماريچ ەكى رەت مەرگەندىگىمەن كوزگە ءتۇسىپ، ءدۋبلدىڭ اۆتورى اتانسا، ماركو ليۆايا مەن لوۆرو مايەر ءوز اتتارىن ءبىر-ءبىر مارتە تابلوعا جازدىردى.

حورۆاتيا قۇراماسى بۇل جە­ڭىسىنەن كەيىن پلەي-وففقا شىعۋ مۇمكىندىگىن ساقتاپ قالدى. ال 1986 جىلعى الەم چەمپيوناتىنان كەيىن العاش رەت مۋنديالعا كەلگەن كانادا فۋتبولشىلارى ءۇشىنشى تۋردان كەيىن بىرىنشىلىكتەگى ءوز ميسسياسىن اياقتاپ، ەلدەرىنە قايتادى.

ءبىرىنشى تۋردا «نەمىس ماشينەسىن» جارعا جىققان جاپونيا جىگىتتەرىنىڭ بۇل تۋردا كوستا-ريكا قۇراماسىن جەڭۋگە شامالارى جەتپەدى – 1:0. كۇنشىعىس ەلىنىڭ وكىلدەرى بار كۇشىن گەرمانيامەن وتكەن ويىندا سارقىپ قويدى ما ەكەن، ايتەۋىر بۇل ماتچتا كوسىلىپ شابا المادى. دوپقا يەلىك ەتۋ بويىنشا جاپونيا قۇراماسى قارسىلاستارىنا قاراعاندا ءسال الدا بولعانىمەن، مۇمكىندىكتى ءتيىمدى پايدالانۋ جاعىنان وڭتۇستىك امەريكا وكىلىنەن قالىپ قويدى. كەزدەسۋدىڭ 81-مينۋتىندا مايا يوسيدانىڭ ءبىر عانا بولماشى قاتەلىگىن كەيشەر فۋللەر ءتيىمدى پايدالانىپ، گول سوعىپ كەتتى. سيۋيتي گوندا دوپتى قايتارۋعا تىرىسقانىمەن، تىم كەش قيمىلداپ قويدى.

ال كوپشىلىك جانكۇيەر تاعات­سىزدانا كۇتكەن يسپانيا – گەر­ما­نيا ماتچىندا جەڭىمپاز كومان­دا انىقتالمادى – 1:1. الەم بىرىنشىلىگىندەگى ەڭ ۇزدىك قۇراما­لاردىڭ كەزدەسۋىندە نەبارى ەكى-اق گول سوعىلعانىمەن، ماتچ وتە تارتىستى ءوتتى. اسىرەسە بۇل كەزدەسۋدە نەمىستەرگە ءۇش ۇپاي ولجالاۋ قاتتى ماڭىزدى بولدى. سەبەبى ءبىرىنشى تۋردا جاپونيادان جەڭىلگەن گەرمانيا قۇراماسى بۇل ويىندا دا ءۇش ۇپايدان قاعىلار بولسا، وندا قاتارىنان ەكىنشى الەم چەمپيوناتىندا توپتان شىعا الماي، جانكۇيەرلەرى الدىندا ماسقارا بولار ەدى. ابىروي بولعاندا 2014 جىلعى الەم چەمپيوندارى توپتاعى ەكىنشى ماتچتا ءبىر ۇپاي ولجالاپ، كەلەسى كەزەڭگە شىعۋ مۇمكىندىگىن ساقتاپ قالدى.

سوڭعى جاڭالىقتار

استانادا «ۆaitursynuly.kz» سايتىنىڭ تۇساۋكەسەرى ءوتتى

احمەت بايتۇرسىن ۇلى • 03 اقپان، 2023

ۇقساس جاڭالىقتار