پانەلدىك سەسسيادا ءىلياس وسپانوۆ ءداستۇرلى فورۋم ەكىجاقتى ىنتىماقتاستىقتىڭ ماڭىزدى الاڭىنا اينالعانىن اتاپ ءوتتى. فورۋم اياسىندا قازاقستاندىق جانە رەسەيلىك وندىرۋشىلەر ءوزارا بايلانىس ورناتىپ, ونەركاسىپ سەكتورىندا جاڭا جوبالار جۇزەگە اسىرىلۋدا.
«بۇگىنگى تاڭدا ەكىجاقتى كووپەراتسيا ناتيجەسىندە 601 ملن اقش دوللارىنا 25 جوبا جۇزەگە اسىرىلىپ, 4 مىڭ جۇمىس ورنى قۇرىلدى. قازىرگى ۋاقىتتا 11,8 ملرد اقش دوللارىن قۇرايتىن 24 جوبا جۇزەگە اسىرۋ ساتىسىندا تۇر. ءوندىرىس وشاقتارىندا 8 مىڭ جۇمىس ورنىن قۇرۋ كوزدەلىپ وتىر. بۇدان بولەك 61 جوبا قاراستىرىلىپ جاتىر», دەدى كوميتەت باسشىسى.
ورىنبور وبلىسى قازاقستان-رەسەي شەكاراسىنىڭ ەڭ ۇزىن بولىگىن قۇرايتىن ايماقتىڭ شەكارا ماڭىنداعى جاعدايىنا بايلانىستى ەڭ ماڭىزدى ستراتەگيالىق سەرىكتەس ەكەنىن ايتا كەتۋ كەرەك.
«بيىل قاڭتار-تامىز ايلارىندا قازاقستان مەن ورىنبور وبلىسى اراسىنداعى تاۋار اينالىمى 300 ملن اقش.دوللارىن قۇرادى, بۇل وتكەن جىلدىڭ سايكەس كەزەڭىمەن سالىستىرعاندا 1,5 ەسە جوعارى. ءبىز ۇسىنعان باعىتتار بويىنشا ءوز تاراپىمىزدان جوبالاردى جان-جاقتى پىسىقتاپ, باستامالاردى ىسكە اسىرۋ ءۇشىن قارجىلىق جانە قارجىلىق ەمەس قۇرالدار ارقىلى قولداۋ كورسەتۋگە دايىنبىز», دەدى ءىلياس وسپانوۆ.
