ANTIKOR • 28 قاراشا، 2022

بيزنەسكە زاڭسىز ارالاسۋدىڭ 72 فاكتىسى انىقتالدى

سىبايلاس جەمقورلىققا قارسى ءىس-قيمىل اگەنتتىگىندە اگەنتتىك توراعاسىنىڭ ورىنباسارى اسحات جۇماعاليدىڭ باسشىلىعىمەن سىبايلاس جەمقورلىققا قارسى قىزمەت جۇمىس توبىنىڭ جانە «اتامەكەن» ۇلتتىق پالاتاسىنىڭ كەزەكتى كەڭەيتىلگەن وتىرىسى ءوتتى، دەپ حابارلايدى Egemen.kz ANTIKOR-عا سىلتەمە جاساپ.

بوتاكوز باقبەرگەن

جيىنعا «اتامەكەن» ۇلتتىق پالاتاسى باسقارما توراعاسىنىڭ ورىنباسارى مالىك ساۋلەباي، «اتامەكەن» ۇلتتىق پالاتاسىنىڭ قۇرىلىمدىق بولىمشەلەرى مەن وڭىرلىك كاسىپكەرلەر پالاتالارىنىڭ باسشىلىعى، سونداي-اق اگەنتتىكتىڭ اۋماقتىق دەپارتامەنتتەرىنىڭ باسشىلارى قاتىستى.

وتىرىس بارىسىندا كاسىپكەرلەردىڭ وزەكتى جانە پروبلەمالىق وتىنىشتەرى قارالىپ، توپ جۇمىسىنىڭ الدىن الا قورىتىندىلارى شىعارىلىپ، الداعى كەزەڭگە ارنالعان جوسپارلار مەن مىندەتتەر ايقىندالدى.

«اۋماقتىق دەپارتامەنتتەردىڭ قىلمىستىق ىستەرى بويىنشا بيزنەستىڭ قاتىسۋىمەن تەرگەۋ ارەكەتتەرى ەداۋىر قىسقارتىلدى، بۇل اگەنتتىك ەنگىزگەن ۆەدومستۆولىق باقىلاۋ تەتىگىنىڭ ناتيجەسى. بيزنەسپەن مىڭنان استام تەرگەۋ ارەكەتتەرىن جۇرگىزۋگە جول بەرىلمەدى، بۇل كاسىپكەرلەردى تەرگەۋ كابينەتتەرىنە بارۋعا، ءىس جۇرگىزۋ ءىس-شارالارىنا قاتىسۋعا ارتىق ۋاقىت جۇمساۋدىڭ الدىن الادى. سونىمەن قاتار، سىبايلاس جەمقورلىققا قارسى قىزمەت مەملەكەتتىك قىزمەتشىلەر تاراپىنان زاڭسىز ارالاسۋ جانە بيزنەسكە قىسىم جاساۋ فاكتىلەرىن انىقتاۋ بويىنشا جۇيەلى جۇمىس جۇرگىزۋدە»، دەلىنگەن اگەنتتىكتىڭ حابارلاماسىندا.

حابارلانعانداي، جىل باسىنان بەرى وسىعان ۇقساس 72 فاكت انىقتالدى، ولار بويىنشا 165 سوتقا دەيىنگى تەرگەۋ باستالدى. ناتيجەسىندە 112 لاۋازىمدى تۇلعا اشكەرەلەنىپ، ونىڭ 65-ءى سوتتالدى.

زاڭسىز ارەكەتتەردىڭ كوپشىلىگى پارا الۋمەن بايلانىستى، سونىڭ ىشىندە ورىندالعان جۇمىستاردىڭ اكتىلەرىنە قول قويۋ، رۇقسات قۇجاتتارىن بەرۋ جانە باسقالارى جاتادى. ولاردىڭ جالپى قۇرىلىمداعى ۇلەس سالماعى 80%-دى قۇرادى.

سونداي-اق وتىرىس بارىسىندا 2022-2026 جىلدارعا ارنالعان سىبايلاس جەمقورلىققا قارسى ساياسات تۇجىرىمداماسىن ىسكە اسىرۋ جونىندەگى ءىس-شارالار جوسپارىن ورىنداۋ بويىنشا ناقتى ۇسىنىستار ازىرلەندى.