ايماقتار • 27 قاراشا، 2022

ەكىباستۇزداعى جىلۋ جەلىلەرىنىڭ تسيركۋلياتسياسى بۇزىلعان جوق

93 رەت كورسەتىلدى

بۇل تۋرالى ەكىباستۇزداعى جاعداي بويىنشا وبلىس اكىمىنىڭ مىندەتىن اتقارۋشىسىنىڭ توراعالىعىمەن وتكەن جەدەل شتابتىڭ وتىرىسىندا ءمالىم بولدى، دەپ حابارلايدى Egemen.kz وبلىس اكىمىنىڭ ءباسپاسوز قىزمەتىنە سىلتەمە جاساپ.

جيىنعا ەنەرگەتيكا ۆيتسە-ءمينيسترى، «ەكىباستۇزجىلۋەنەرگو» جشس باسشىلارى، «واەك» اق اكتسيونەرلەرى مەن جاۋاپتى مەملەكەتتىك ورگانداردىڭ وكىلدەرى قاتىستى. ابىلقايىر سقاقوۆ تاراپتاردىڭ ەسەپتەرىن تىڭداپ، تاپسىرمالار بەردى.

«ەكىباستۇزجىلۋەنەرگو» جشس باس ديرەكتورى پاۆەل مەلنيچۋكتىڭ ايتۋىنشا، №11 قازاندىقتا قىزدىرۋ بولىگىنىڭ اقاۋى انىقتالعان. قازىر ءۇش ەنەرگەتيكالىق جانە ەكى سۋ جىلىتۋ قازاندىعى جۇمىس ىستەيدى. تاعى بىرەۋىن ىسكە قوسۋعا دايىندىق ءجۇرىپ جاتىر. تەمپەراتۋرا 70-تەن 42-گە دەيىن ساقتالىپ تۇر.

- جىلۋ جۇيەسىنىڭ قالىپتى رەجيمىن قالپىنا كەلتىرۋ جانە تەمپەراتۋرالىق اۋىتقۋلار ەسەبىنەن جاڭا اقاۋلاردى تۋدىرماۋ ءۇشىن ءبىز جىلۋ بەرۋدى تىم جىلدامداتپاۋعا تىرىسامىز. شامامەن كەشكى ساعات سەگىز-توعىزداردا №12 قازاندىقتى ىسكە قوسۋدى جوسپارلاپ وتىرمىز، - دەدى پاۆەل مەلنيچۋك.

تاراپتاردىڭ اقپاراتى بويىنشا، ساعات 21:00-دە №5ا، 5ب، 6 شاعىن اۋداندار جىلۋسىز قالادى. مۇندا 149 كوپقاباتتى تۇرعىن ءۇي، 15 الەۋمەتتىك نىسان جانە 12 زاڭدى نىسان بار.

- ستانتسياداعى جاعدايدى تۇراقتى دەڭگەيدە ۇستاپ قالدىق، بارلىق قازاندىقتار جۇمىس ىستەپ تۇر. كومىر مەن مازۋت بار. جەو-دا تەحنولوگيالىق بۇزۋشىلىقتار جوق. بارلىق ماسەلە جەلىلەرگە بايلانىستى بولىپ تۇر. باستى كۇردەلى ماسەلە - ورتالىق ماگيسترال سۋ استىندا قالدى. سۋدى سورىپ الۋ ءۇشىن ءتيىستى قىزمەتتەر جۇمىلدىرىلدى، - دەدى «واەك» اق باسقارما توراعاسى باعدات ورال.

وبلىس اكىمىنىڭ ءبىرىنشى ورىنباسارى ولەگ كرۋكتىڭ ايتۋىنشا قالادا جىلۋ جەلىلەرىندەگى سۋ قۇبىرلاردا ساقتالىپ قالدى، ولار قاتىپ قالعان جوق.

- اقاۋلار شىعۋ قاۋپى بار ۋچاسكەلەردىڭ سانىن ازايتۋ جانە جىلۋ جەلىلەرىن ىسكە قوسۋ ءۇشىن بارلىق قاجەتتى شارالار جۇرگىزىلىپ جاتىر. قازىر ءماشھۇر ءجۇسىپ كوشەسىندە سۋ سورۋ جۇمىستارى اتقارىلۋدا. سۋدى سورىپ بولعان سوڭ، جاعداي تۇزەلۋى ءتيىس، - دەدى ولەگ كرۋك.

ابىلقايىر سقاقوۆ جاعداي تۇراقتى باقىلاۋدا ەكەنىن اتاپ ءوتىپ، جىلۋدان اجىراتىلعان ۇيلەردىڭ تۇرعىندارىمەن ءتۇسىندىرۋ جۇمىستارىن جۇرگىزۋ ءۇشىن جەكە ءموبيلدى توپتار قۇرۋدى تاپسىردى.

ءبىز قالانىڭ جىلۋ جەلىلەرىنىڭ تسيركۋلياتسياسىن ساقتاپ قالدىق. جاعداي تۇراقتى. قالانىڭ جىلۋ جۇيەسى بۇزىلعان جوق. مەن نىسانداردى ارالاپ شىقتىم، ونداعى تەمپەراتۋرا رەجيمى وڭتايلى. ورتالىقتاعى بىرنەشە شاعىن اۋدان جىلۋسىز تۇر. سوندىقتان ءبىزدىڭ باستى مىندەتىمىز — اقاۋلاردىڭ ورنىن انىقتاپ، ولاردى جويۋ ءۇشىن جەدەل بريگادالاردى جىبەرۋ، - دەدى وبلىس اكىمىنىڭ مىندەتىن اتقارۋشى. - ءبارىن تەز ارادا تۇزەتىپ، اقاۋلاردى جويۋ كەرەك، ول ءۇشىن قاجەتتى جوندەۋ بريگادالارى بار.

قازىر ەنەرگەتيكا مينيسترلىگىنىڭ ەنەرگەتيكالىق باقىلاۋ كوميتەتى تەكسەرىس باستادى. جەو-دا ءتورت رەزەرۆتى قازاندىق بار، ولاردىڭ بىرەۋى جاعىلىپ جاتىر، جىلۋ جەلىسىنىڭ تەمپەراتۋراسى كوتەرىلىپ كەلەدى.

جەدەل شتابتىڭ وتىرىسىنا دەيىن ابىلقايىر سقاقوۆ اپاتتى جىلۋ جەلىلەرىن، وڭىرلىك قيىن ومىرلىك جاعدايعا تاپ بولعان بالالاردى قولداۋ وڭىرلىك ورتالىعىن، ەكىباستۇز قالالىق اۋرۋحاناسىن، №6 ورتا مەكتەپتى جانە كوپقاباتتى تۇرعىن ۇيلەردى ارالاپ شىقتى. 76 بالا ەكىباستۇزدان پاۆلودارعا كوشىرىلدى، ونىڭ ىشىندە ومىرلىك قيىن جاعدايعا تاپ بولعان بالالاردى قولداۋ ورتالىعىنىڭ 36 تاربيەلەنۋشىسى بار. سونداي-اق پسيحيكالىق دەنساۋلىق ورتالىعىنىڭ 26 پاتسيەنتى ءۇش دارىگەرمەن بىرگە وبلىس ورتالىعىنا ورنالاستىرىلدى. جەتى بالا اتا-اناسىمەن بىرگە ەمدەۋدى جالعاستىرۋ ءۇشىن سانيتارلىق كولىكپەن وبلىس ورتالىعىنا جەتكىزىلدى.

وبلىس اكىمىنىڭ مىندەتىن اتقارۋشى ءوز ورىنباسارلارىمەن، بەيىندى باسقارمالاردىڭ باسشىلارىمەن، ەكىباستۇز قالاسىنىڭ اكىمىمەن بىرگە تاڭەرتەڭنەن بەرى تج ورنىنا كەلىپ، جاعدايدى جەكە باقىلاۋىنا الدى.

سوڭعى جاڭالىقتار

ۇقساس جاڭالىقتار