قوعام • 28 قاراشا، 2022

ستاندارتتى تومەندەتۋ ازاماتتارعا قاتەر توندىرمەي مە؟

36 رەت كورسەتىلدى

قازاقستان ۇكىمەتىنىڭ 2023 جىلدىڭ 1 اقپانىنا دەيىن كۇشى جارامدى قاۋلى قابىلداعانى جايلى اقپارات تارادى. وندا ەلىمىزدە ABS، قاۋىپسىزدىك جاستىعى، SOS باتىرماسى جوق جانە ەكولوگيالىق كلاسى ەۋرو-5 ستاندارتىنان تومەن (ەۋرو-0-گە دەيىن) ماشينا شىعارۋعا رۇقسات ەتىلەتىنى جاريالانعان. ۇكىمەت مۇشەلەرىنىڭ مالىمدەۋىنشە، مۇنداي تالاپ «لادا» جانە ۋاز شىعا­را­تىن اۆتووندىرۋشىلەردى قولداۋ ماقساتىندا جاسالىپ وتىر.

مۇنداي اقپاراتتى يندۋستريا مينيسترلىگىنە سىلتەمە جاساپ Kolesa.kz رەداكتسياسى تاراتتى. كەيىنىرەك اتالعان ۆەدومستۆو قازاقستاندا قاۋىپسىزدىك تا­لاپ­تارىنا ساي كەلمەيتىن اۆتو­كو­لىكتەردىڭ شىعارىلۋىنا تىيىم سالىنعان دەپ مالىمدەدى.

«بۇقارالىق اقپارات قۇرال­دارىندا قازاقستان ۇكىمەتىنىڭ 2022 جىلعى 22 قازانداعى №843 قاۋ­لى­سىنىڭ، اتاپ ايتقاندا، «قازاقستان اۋ­ماعىندا وندىرىلەتىن جەكەلەگەن دوڭعالاقتى كولىك قۇرالدارىنا قاتىستى مىندەتتى تالاپتاردى قولدانۋ جانە ولاردىڭ ساي­كەس­­تىگىن باعالاۋدى جۇرگىزۋ قا­­عي­­­دالارىن بەكىتۋ تۋرالى» نور­­ما­لارىنىڭ قاتە تارالۋىنا بايلانىستى يندۋستريا جا­نە ينفراقۇرىلىمدىق دامۋ مي­نيس­ترلىگى اتالعان قۇجاتتىڭ ماڭىز­دىلىعى مەن قوعامعا دۇرىس جەتكىزىلۋىن ءتۇسىندىرۋدى ورىندى دەپ سانايدى. بۇل قاۋلى ەاەو ەلدەرى قول قويعان «كەدەن وداعى كوميسسياسىنىڭ 2011 جىلعى 9 جەلتوقسانداعى №877 شەشىمىنە وزگەرىستەر ەنگىزۋ تۋرالى» ەۋرا­زيالىق ەكونوميكالىق كوميسسيا كەڭەسىنىڭ 2022 جىلدىڭ 5 ساۋىردەگى №45 شەشىمىن ىسكە اسىرۋ ماقساتىندا قابىلداندى. ۇكىمەتتىڭ 2023 جىلدىڭ 1 اقپا­نىنا دەيىنگى زاڭدى كۇشى بار قاۋ­لىسى وندىرۋشىلەرگە ABS، ESP، سونداي-اق قاۋىپسىزدىك جاس­تىق­تارىمەن جابدىقتالماعان جا­نە ەكولوگيالىق ساناتى تومەن­دە­تىلگەن اۆتوكولىكتەردى شىعا­رۋعا تىكەلەي قۇقىق بەرمەيدى»، دەلىنگەن مينيسترلىك حابارلاماسىندا.

ءتيىستى جۇيەلەرمەن جابدىق­تالماعان اۆتوموبيلدەردى شى­عارۋعا رۇقسات الۋ ءۇشىن ءوندىرۋشى بەلگىلى ءبىر كومپونەنتتەردى ور­نات­پاۋىنا قاراماستان كولىك مودەلدەرىن جەكە سەرتيفيكاتتاۋ­دان وتكىزىپ، ونىڭ قاۋىپسىز بولۋى مىندەتتى. بۇل شارت ەەك كەڭەسىنىڭ شەشىمىندە دە قاراستىرىلعان ەكەن. دەمەك، قازىر قازاقستاندا قاۋىپسىزدىك تالاپتارىنا سايكەس كەلمەيتىن بىردە-ءبىر كولىك مودەلى شىعارىلمايدى. سوندىقتان وندىرۋشىلەر «دوڭعالاقتى كولىك قۇرالدارىنىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتىن تولىق ساقتايدى.

مينيسترلىك مالىمەتىنشە، وسىعان ۇقساس قاۋلىلاردى ەەك-كە قاتىسۋشى ەلدەر قا­بىل­­دا­عان. ايتالىق، وسى جىل­دىڭ مامىرىندا رەسەي فەدەرا­تسيا­سىن­دا جانە شىلدەدە بەلا­رۋس رەسپۋب­ليكاسىندا. ال ارمە­نيا جانە قىرعىزستان رەسپۋبلي­كالارىندا ءاۆتووندىرىس ورىندارى جوق.

«بۇل ورايدا قاۋىپسىزدىك جاس­­تىقشالارى مەن ABS، ESP جۇيەلەرى جانە تومەندەتىلگەن ەكو­لوگيالىق ساناتقا ساي جۇيە­لەرمەن جابدىقتالماعان اۆتوكو­لىكتەر رەسەي فەدەراتسياسى مەن بەلارۋس رەسپۋبليكاسىندا اي­نالىمعا شىعارىلىپ جۇرگەنى بەلگىلى. ەەك كەڭەسىنىڭ شەشىمى زاڭدى كۇشىنە ەنگەن شاقتا ەاەو-نىڭ مۇشەلىگىنە كىرەتىن باسقا ەلدەردە شىعارىلعان اۆتوموبيلدەر، ماشينانى قۇراستىرعان مەملەكەتتىڭ اۋماعىندا عا­نا جۇرۋىنە رۇقسات ەتىلەدى. وسى­عان بايلانىستى اتالعان اۆتو­كولىكتەردى قازاقستاننىڭ اۋما­عىنا كىرگىزۋگە تىيىم سالىنادى»، دەپ مالىمدەدى مينيسترلىك.

باستاپقىدا دۇرىس تاراماعان (بالكىم شىنىمەن دۇرىس تا­را­عان) اقپارات قوعامدا شۋ تۋعىز­دى. «نەت ۋتيلسبورۋ» قوزعا­لى­­سى وكىلدەرىنىڭ ايتۋىنشا، ABS جۇيەسى، SOS باتىرماسى، قاۋىپسىزدىك جاستىعى جوق، ەكولو­گيالىق كلاسى تومەن ماشينا شى­عارۋعا رۇقسات بەرۋ تۋرالى شە­شىم ەكولوگياعا كەرى اسەر ەتىپ قانا قويماي، جول قاۋىپسىزدىگىن نا­شار­لاتىپ، جول اپاتىنان زارداپ شەگەتىن تۇرعىن سانىن ارتتىرادى.

قوعام بەلسەندىلەرى ۋتيل الىمى مەن العاشقى تىركەۋ سوماسىن ەسەپتەۋ ءادىسىنىڭ دۇرىس-بۇرىسىن تەكسەرۋدى جانە وتاندىق كولىك قۇراستىرۋشىلاردىڭ ءوندىرىستىڭ لوكاليزاتسياسىن جاقسارتۋ تۋرالى كەلىسىمدى ورىنداۋ بارىسىن قاداعالاۋدى تالاپ ەتىپ، سوتقا شاعىم تۇسىرگەنىن مالىمدەدى. ءباسپاسوز جيىنىنا قاتىسقاندار اۆتوموبيل جانە وزگە دە تەحنيكا­لاردى، سونىڭ ىشىندە اۋىل­شا­رۋا­شىلىق ماشيناسىن جەكە پايدالانۋ ماقساتىندا ساتىپ العان جەكە تۇلعالار مەن شاعىن كاسىپكەرلەردى ۋتيل الىمى مەن العاشقى تىركەۋ اقىسىنان بوساتۋدى ۇسىندى. ال ءىرى يمپورتتاۋشىلار مەن وندىرۋشىلەردەن جينالعان اقشانى ءبولۋ پروتسەسى بارىنشا اشىق بولۋ كەرەك.

قازاقستان اۆتوبيزنەس قاۋىم­داستىعىنىڭ مالىمەتى بويىن­شا، 2022 جىلدىڭ 9 ايىن­دا ەلىمىزدە 78 441 ترانسپورت قۇرالى قۇراستىرىلدى. بۇل وت­كەن جىلدىڭ ۇقساس كەزەڭىمەن سالىس­تىرعاندا 23،4 پايىزعا كوپ.

«كومپونەنتتەردى جەتكىزۋ­دەگى جاعداي الەمدەگى اۆتومو­بيل ونەركاسىبىنە اسەر ەتۋدى جالعاستىرۋدا. وسىعان قاراماس­تان قازاقستان ىشكى ءوندىرىس كولە­مىن ارتتىرىپ جاتىر. جالپى، 2022 جىلى اۆتوموبيل ءوندىرىسى 2021 جىلمەن سالىستىرعاندا كەم دەگەندە 7 پايىزعا وسەدى دەپ كۇتىلۋدە»، دەيدى قاۋىمداستىق ۆيتسە-پرەزيدەنتى انار ماقاشەۆا.

سوڭعى جاڭالىقتار

الماتىدا ەكى اۆتوبۋس سوقتىعىستى

ايماقتار • بۇگىن، 11:33

ۇقساس جاڭالىقتار