جەكسەنبى كۇنى شىعىس قازاقستاندا اياز بولعانىنا قاراماستان, كليماتتىق جاعدايلارعا ۇيرەنىپ, اسكەردىڭ تىرشىلىگىنە توسەلىپ كەلە جاتقان ساربازدارعا بۇل جاعداي كەدەرگى بولمادى. شاراعا قوناقتار رەتىندە ساربازداردىڭ تۋىستارى مەن جاقىندارىنىڭ كەلۋى ولاردىڭ جاۋىنگەرلىك رۋحىن نىعايتتى.
– بۇگىن سەندەر اسكەري انت بەردىڭدەر. وسى ساتتەن باستاپ «وتان قورعاۋشى» ۇعىمى سەندەر ءۇشىن ەرەكشە ماعىناعا يە. ارميانىڭ قۋاتىن ارتتىرۋ ارقىلى سەندەر كەز كەلگەن قيىندىقتى جەڭۋگە كومەكتەسەتىن قاسيەتتەردى بويلارىڭا سىڭىرەسىڭدەر. ءبىز سەندەرگە سەنەمىز. وتان قورعاۋ جولىنداعى قىزمەتتەرىڭە ساتتىلىك تىلەيمىز, – دەدى جاس ساربازدارعا اياگوز تانك قۇراماسىنىڭ كومانديرى پودپولكوۆنيك داۋلەت سۇتتىباەۆ.
انت قابىلداۋ راسىمىنە دەيىن اسكەرگە شاقىرىلۋشىلار ءبىر ايلىق جاس جاۋىنگەردىڭ كۋرسىنان ءوتتى. ولار دەنە شىنىقتىرۋ جانە ساپتىق دايىندىقپەن اينالىستى, جالپىاسكەري جارعىلاردى, قارۋدىڭ ماتەريالدىق بولىگىن جانە ونىمەن جۇمىس ىستەۋ ەرەجەلەرىن ۇيرەندى, العاشقى پراكتيكالىق اتىستارىن ورىندادى.
– بۇل كۇنگە ءبىراز دايىندالدىق. ارينە, تولقۋ بولدى, بىراق ءبىر-ءبىرىمىزدى قولداۋ ونى جەڭۋگە كومەكتەستى. اسكەر جيناقتالۋعا جانە مۇقيات بولۋعا ۇيرەتەدى, مۇندا ءبارى كۇندەلىكتى تارتىپكە باعىنادى. بۇل تاجىريبە ماعان پايدالى بولادى دەپ ويلايمىن, – دەپ ءبولىستى تارازدان شاقىرىلعان سارباز يسلام بەيبارىس.
اسكەري بولىمدەرگە ەلدىڭ ءارتۇرلى ايماعىنان سالتاناتتى تۇردە انت قابىلداۋ راسىمىنە كەلگەن ساربازداردىڭ اتا-انالارى مەن تۋىستارى دا بىرگە تولقۋدى سەزىندى. ولار ءۇشىن ۇلدارىنىڭ قىزمەت جاعدايىن ءوز كوزدەرىمەن كورۋ, كومانديرلەرىمەن جانە ارىپتەستەرىمەن تانىسۋ ماڭىزدى بولدى.
– ءبىر ايدان بەرى مەنىڭ ۇلىم ايبول سەرىك اياگوزدە قىزمەت ەتىپ كەلەدى. انت بەرۋگە شاقىرعاندارىنا قۋاندىم. مەن ولاردىڭ قىزمەت ورنىنىڭ شىنايى جاعدايىن ءوز كوزىممەن كورگىم كەلدى. بىزگە ءبارىن كورسەتىپ, ەگجەي-تەگجەيلى ايتىپ بەردى. ەندى مەن بالالارىمىزدىڭ قايدا تۇراتىنىن, نە ۇيرەنەتىنىن, قالاي تاماقتاناتىنىن جاقسى بىلەمىن. ولار ۇيلەرىنە امان-ەسەن ورالسىن, – دەدى الماتى وبلىسىنىڭ تۇرعىنى جانار سەپبوسىنوۆا.
اسكەري انت قابىلداعاننان كەيىن اسكەرگە شاقىرىلۋشىلار بولىمشەلەرگە ءبولىنىپ, اسكەردەن العان ماماندىقتارىنا سايكەس جاۋىنگەرلىك دايارلىققا كىرىسەدى.
