ايماقتار • 26 قاراشا، 2022

شىمكەنتتە 135 سارباز انت قابىلدادى

شىمكەنتتەگى «وڭتۇستىك» وڭىرلىك قولباسشىلىعىنىڭ مەحانيكالاندىرىلعان بريگاداسىنىڭ 135 جاۋىنگەرى وتانىنا ادال بولۋعا انت بەردى. سالتاناتتى شارا اسكەري ءبولىمنىڭ ساپتىق الاڭىندا ءوتتى، دەپ حابارلايدى Egemen.kz.

مارجان تىلەۋبەك

تريبۋنادان بريگادا كومانديرى پودپولكوۆنيك داستان مۇحامەدجانوۆ، سونداي-اق ارداگەرلەر ۇيىمدارىنىڭ وكىلدەرى مەن اتا-انالار قۇتتىقتاۋ ءسوز سويلەپ ىزگى تىلەكتەرىن ايتتى.

اسكەري ءراسىمدى وتكىزۋ ءۇشىن قوناقتار مەن كومانديرلەرىنىڭ سوزىنەن كەيىن قولىندا قارۋى بار ساربازدار ءوز بورىشىن لايىقتى ورىنداۋعا، ەل بوستاندىعى، تاۋەلسىزدىگى مەن كونستيتۋتسيالىق قۇرىلىسىن، حالىقتى جانە زاڭدى تۇردە سايلانعان قازاقستان رەسپۋبليكاسىنىڭ پرەزيدەنتىن باتىل قورعاۋعا انت بەردى.

پرەزيدەنتتىڭ يناۋگۋراتسياسىمەن سايكەس كەلگەن انت بەرۋ ءراسىمى جاس ساربازدار مەن ولاردىڭ اتا-انالارىنا بۇل كۇندى ەستە ساقتاۋدىڭ قوسىمشا سەبەپ بولدى. ولاردىڭ ايتۋىنشا، مۇنداي سايكەستىك جانە جاقىندا قول قويىلعان قورعانىس ۆەدومستۆوسى مەن جوعارعى وقۋ ورىندارى اراسىنداعى كەلىسىمدەر جاقسى قىزمەت ءۇشىن تاماشا ىنتالاندىرۋ بولىپ سانالادى جانە ارميادان كەيىنگى ومىرلەرىنە جاقسى ترامپلين بولادى.

- بۇكىل ەلىمىز ءۇشىن وسى تاريحي كۇنى اسكەري انت قابىلداۋ ءراسىمىن وتكىزۋ باقىتىنا يە بولدىق. بۇل ءبىر جىل ىشىندە ناعىز جاۋىنگەر بولۋعا مۇمكىندىك العانىمىزدى بىلدىرەدى، - دەپ الماتى قالاسىنان شاقىرىلعان قاتارداعى جاۋىنگەر ميراس تۇرسىنجان ءوز اسەرىمەن ءبولىستى.

قوستاناي وبلىسىنان كەلگەن ەلەنا ماتيۋحوۆا ءۇشىن بۇل كۇن ومىرىندە ەرەكشە ورىن الدى. سەبەبى ەلەنانىڭ ۇلكەن ۇلى ماكسيم وسى جىلدىڭ كوكتەمىندە شىمكەنتتىڭ مەحانيكالاندىرىلعان بريگاداسىنا شاقىرىلدى، ال التى ايدان كەيىن ءىنىسى دانيل دا سول بولىمگە سارباز بولىپ كەلدى.

- جەكە ءوزىم ءۇشىن بۇل كۇن ەرەكشە بولدى، ويتكەنى مەنىڭ ۇلىم دانيل، وسى جىلدىڭ كوكتەمىندە شاقىرىلعان ۇلكەن اعاسى ماكسيم سياقتى، انت قابىلدادى، وتاننىڭ ناعىز قورعاۋشىسى بولدى. ءبىز، اتا - انالار، اسكەري ءبولىمنىڭ كومانديرلەرى مەن سەرجانتتارىنا، ولاردىڭ جۇمىستاعى ۇيلەسىمدىلىگى، ۇلدارىمىزعا دەگەن ۇيىمشىلدىعى مەن جاناشىرلىعى ءۇشىن وتە ريزامىز جانە العىسىمىز شەكسىز، - دەيدى ەكى ساربازدىڭ اناسى ەلەنا ماتيۋحوۆا.

انت بەرىپ، سالتاناتتى شەرۋمەن وتكەننەن كەيىن ساربازدار دايىنداعان قويىلىمدارىمەن، قارۋ-جاراقپەن ساپتىق امالداردى ورىنداپ ونەر كورسەتىپ، اسكەري دەفيلە جاسادى. مۇنىڭ ءبارىن ولار وتكەن ءبىر اي ىشىندە ۇيرەنگەن بولاتىن.