بۇل جايىندا قاسىم-جومارت توقاەۆ ۇلىقتاۋ راسىمىندە ايتتى.
«ەندى ءبىزدىڭ ورتاق ماقساتىمىز – زاڭ مەن ءتارتىپ ۇستەمدىك قۇراتىن, ازاماتتاردىڭ قۇقىعىنا لايىقتى قۇرمەت كورسەتىلەتىن ادىلەتتى قازاقستاندى قۇرۋ. قوعامدى ترانسفورماتسيالاپ, قازاقستاندى شىنايى دەموكراتيالىق ينستيتۋتتارى دامىعان ەلگە اينالدىرۋ ءۇشىن اۋقىمدى جۇمىس اتقارۋىمىز كەرەك. سوندا عانا ۇلتتىڭ جاڭا ساپاسىن قالىپتاستىرىپ, قاستەرلى تاۋەلسىزدىگىمىزدى نىعايتامىز», دەدى ول.
مەملەكەت باسشىسىنىڭ ايتۋىنشا, قازىر ءبىز وسى قيىن-قىستاۋ جولدىڭ باسىندا تۇرمىز.
«الدىمىزدا اتقاراتىن جۇمىس كوپ. ءاربىر ازامات ەلدىڭ بولاشاعى ءۇشىن ءوز جاۋاپكەرشىلىگىن سەزىنۋگە ءتيىس. مەملەكەتتىك ساياساتىمىزدىڭ نەگىزگى باعىتى – ءبىلىم بەرۋ ىسىنەن باستاپ يندۋستريالاندىرۋعا دەيىن قوعامنىڭ بارلىق سالاسىن جاڭعىرتۋ. ەلىمىزدىڭ ۇزاق مەرزىمدى ەكونوميكالىق ءوسىمىنىڭ نەگىزىن جاڭا تەحنولوگيالار, جوعارى ەڭبەك ونىمدىلىگى, ازاماتتاردىڭ شىعارماشىلىق باستامالارى قۇرايدى», دەدى پرەزيدەنت.
