«مەملەكەت باسشىسىنىڭ سايلاۋالدى باعدارلاماسىندا ءبىلىم سالاسىن دامىتۋ مەن بالالاردىڭ ءال-اۋقاتىن ارتتىرۋعا ەرەكشە كوڭىل بولىنگەن. ەندى وسى باعدارلامانى بەلسەندى تۇردە جۇزەگە اسىرامىز. 2 جاستان 6 جاسقا دەيىنگى بالالار مەكتەپكە دەيىنگى ساپالى تاربيەمەن جانە وقىتۋمەن قامتاماسىز ەتىلەدى. ەگەر بۇعان دەيىن باستى نازار 3-6 جاسقا دەيىنگى بالالاردى قامتۋ بولسا, ەندى 2 جاستان باستاپ بالاباقشامەن قامتۋ مىندەتى بەكىتىلدى. بۇل باعىتتا مەكتەپكە دەيىنگى ۇيىمداردى اشۋ, ونىڭ ىشىندە اسىرەسە جەكەمەنشىك بالاباقشالارعا مەملەكەتتىك تاپسىرىستى ورنالاستىرۋ بويىنشا جۇمىس ۇيىمداستىرىلادى», دەپ جازدى ا.ايماعامبەتوۆ.
ونىڭ ايتۋىنشا, قابىلدانعان شارالاردىڭ ناتيجەسىندە 2029 جىلدىڭ سوڭىنا دەيىن 2-6 جاس ارالىعىنداعى بالالار مەكتەپكە دەيىنگى تاربيەمەن جانە وقىتۋمەن 100% قامتىلادى.
«مەكتەپكە دەيىنگى ۇيىمداردا ورىنداردى اشۋعا ارنالعان ناقتى جوسپار ازىرلەندى. قىزمەتتەردىڭ ساپاسىن ارتتىرۋ ءۇشىن مەملەكەتتىك تاپسىرىستى ورنالاستىرۋدىڭ نورماتيۆتىك تالاپتارى كۇشەيتىلدى. مەملەكەتتىك تاپسىرىستى ورنالاستىرۋ تەتىگى «اقشا بالانىڭ سوڭىنان ەرەدى» قاعيداسىنا وزگەرتىلدى. ياعني قاراجات اتا-انا تاڭداعان بالاباقشالارعا جىبەرىلەدى», دەپ جازدى مينيستر.
سونداي-اق جازبادا مەكتەپكە دەيىنگى تاربيە مەن وقىتۋدىڭ جاڭا مودەلى ەنگىزىلىپ, جاڭا مەمستاندارت پەن ۇلگىلىك باعدارلامالار قابىلدانعانى جازىلعان.
