«ەسەپ كوميتەتىنىڭ مالىمەتى بويىنشا, قۇرىلىس نىساندارىنىڭ سمەتالىق قۇجاتتاماسىندا تۇرعىن ءۇي قۇنىنىڭ 65 پايىزىن قۇرىلىس ماتەريالدارى قۇرايدى. سوندىقتان نارىقتاعى كەز كەلگەن اۋىتقۋ, قۇرىلىس سالاسىنىڭ دامۋى قۇرىلىستىڭ قۇنىنا عانا ەمەس, تۇرعىن ءۇي قۇرىلىسىنىڭ قارقىنىنا دا تىكەلەي اسەر ەتەدى», دەدى سەرىك شايداروۆ سەناتتا وتكەن ۇكىمەت ساعاتىندا.
سەناتوردىڭ ايتۋىنشا, قازاقستاندا جوعارى وڭدەلگەن ءونىم شىعاراتىن كاسىپورىندار جەتكىلىكسىز.
«ۇلتتىق ستاتيستيكا بيۋروسىنىڭ مالىمەتىنشە, 18 نەگىزگى قۇرىلىس ماتەريالدارى بويىنشا يمپورت ۇلەسى 50%-دان اسادى. ىشكى نارىققا قۇرىلىس ماتەريالدارىنىڭ يمپورتى 2022 جىلعى قاڭتار-تامىزدا 3%-عا جۋىق ءوسىپ, 799,5 ملن دوللارعا جەتتى. وسى كەزەڭدە قازاقستاندا قاپتاما كەراميكالىق كىرپىش, بەتون بۇيىمدارى, سيليكات جانە قوج كىرپىش, پورتلاندتسەمەنت, قۇراما قۇرىلىس كونسترۋكتسيالارى, دايىن بەتون ءوندىرىسى فيزيكالىق تۇردە تومەندەدى», دەدى دەپۋتات.
سەرىك شايداروۆ 2025 جىلعا دەيىنگى قۇرىلىس يندۋسترياسى جوبالارىن ەگجەي-تەگجەيلى جۇزەگە اسىرۋ بويىنشا جول كارتاسىن بەكىتكەندەرىن ەسكە سالدى. 157 جوبانى جۇزەگە اسىرۋ جوسپارلانۋدا.
«ەندى يندۋستريا جانە ينفراقۇرىلىمدىق دامۋ مينيسترلىگى اكىمدىكتەرمەن بىرلەسە وتىرىپ, جوسپارلانعان بارلىق جوبالاردى قيسىندى قورىتىندىعا جەتكىزىپ قانا قويماي, سونىمەن قاتار وڭىرلەر مەن وبلىستار دەڭگەيىندە قۇرىلىس ماتەريالدارىنا دەگەن قاجەتتىلىكتى تولىق قامتۋدى قامتاماسىز ەتۋ ماڭىزدى», دەدى س. شايداروۆ.
