قازىرگى تاڭدا سوكولوۆ-سارىباي كەن-بايىتۋ وندىرىستىك بىرلەستىگىندە قۇرامى 63 پايىزدىق تەمىردەن تۇراتىن ءتۇيىرتاس وندىرىلەدى. ول تەمىر كەنى كونتسەنتراتىنان الىنادى. بۇل رەتتە جەڭىل بايىتىلعان كەندەردى قولدانا وتىرىپ ونەركاسىپتىك سىناقتار جۇرگىزىلگەن. ناتيجەسىندە, كونتسەنتراتتاعى تەمىر قۇرامىن 67,5-68,0 پايىزعا دەيىن ۇلعايتۋعا جانە قۇرامىنداعى تەمىر ۇلەسى 65 پايىزدان اساتىن BF-شەكەمتاسىنىڭ تاجىريبەلىك پارتياسىن الۋعا قول جەتكىزىلدى.
«جوعارى دەڭگەيدەگى زەرتتەۋلەر جاڭا ءونىمنىڭ ساپاسىن دالەلدەۋگە مۇمكىندىك بەردى. تامىز ايىندا جوعارى ساپالى دومەندىك شەكەمتاستاردىڭ ەكى پارتياسى شىعارىلىپ, SGA (گەرمانيا) زەرتحاناسىنا جىبەرىلدى. وڭ قورىتىندى الىندى. حالىقارالىق سەرتيفيكات ءونىمنىڭ حيميالىق قۇرامى, فيزيكا-مەحانيكالىق جانە مەتاللۋرگيالىق پارامەترلەرى بويىنشا مالىمدەلگەن سيپاتتامالارىن راستادى. قازىر الەمدە تەمىر مولشەرى 65 پايىز بولاتىن تۇيىرتاسقا, ياعني وكاتىشقا سۇرانىس ارتتى», دەپ حابارلادى ERG-ءدىڭ ءباسپاسوز قىزمەتى.
BF-شەكەمتاستار ءوندىرىسىن يگەرۋدىڭ ماڭىزى زور. ءبىرىنشى كەزەكتە ونەركاسىپتىك كەشەندە بايىتۋ ۋچاسكەسىنىڭ تەحنولوگيالىق تىزبەگىن جاڭعىرتۋ قاجەت. بۇل كونتسەنتراتتىڭ ساپاسىنا وڭ اسەر ەتەدى. كونتسەنتراتتاعى تەمىردىڭ ۇلەسىن 67,5 پايىزعا دەيىن جانە ودان جوعارى دەڭگەيگە كوتەرۋگە جاقسىلاپ ەلەكتەن وتكىزۋ مەن ماگنيتتى-گراۆيتاتسيالىق اجىراتۋدىڭ كەشەندى تەحنولوگياسى سەپتەسەدى. كونتسەنتراتتاعى ىلعالدىڭ ماسسالىق ۇلەسىنىڭ كورسەتكىشىن تومەندەتۋ ءارى تۇراقتاندىرۋ ءۇشىن كەراميكالىق ۆاكۋمدى سۇزگىلەر ورناتىلادى. ءبىرىنشى كەزەڭدە جاڭعىرتۋ ءنومىرى 11, 13, 14-تەحنولوگيالىق بولىكتەرىندە جۇرگىزىلەدى.
قازىر كەن دايىنداۋ جانە بايىتۋ تسەحىندا بايىتۋ ۋچاسكەسىنىڭ III كەزەگىنىڭ بولىكتەرىندە كونتسەنترات ءوندىرىسىنىڭ تەحنولوگيالىق تىزبەگىن جاڭعىرتۋ جۇمىستارى باستالدى. 2023 جىلدىڭ I توقسانىندا ونەركاسىپتىك كەشەنگە نەگىزگى تەحنولوگيالىق جابدىقتار – كەراميكالىق سۇزگىلەر, ماگنيتتىك-گراۆيتاتسيالىق ايىرعىشتار, Derrick ەلەگىشى جەتكىزىلەدى. قۇرىلىس-مونتاجداۋ جۇمىستارىمەن بىرگە ينۆەستيتسيا كولەمى شامامەن 2,8 ملرد تەڭگەنى قۇرايدى.
«ERG Sales-پەن ەۋروپالىق مەتاللۋرگيالىق كاسىپورىنداردىڭ بىرىنە كەيىننەن جەتكىزۋ ءۇشىن BF-شەكەمتاستاردىڭ تاجىريبەلى ونەركاسىپتىك پارتياسىن ءوندىرۋ قاجەتتىلىگى تۋرالى ۋاعدالاستىققا قول جەتكىزىلدى. قۇرامىندا كەمىندە 68 پايىز تەمىر بار جوعارى ساپالى كونتسەنترات ءوندىرۋ ءۇشىن قىركۇيەك ايىندا سوكولوۆ جانە قاشار كارەرلەرىنىڭ, سوكولوۆ شاحتاسىنىڭ جەڭىل بايىتىلاتىن كەندەرىنەن شيحتا قالىپتاستىرىلعان. قازان ايىندا سوكولوۆ-سارىباي كەن-بايىتۋ وندىرىستىك بىرلەستىگىنىڭ ونەركاسىپتىك كەشەنىندە 64,9 مىڭ توننا كولەمىندە BF-شەكەمتاستاردىڭ تاجىريبەلىك پارتياسى ءوندىرىلدى. تۇيىرتاستارداعى تەمىردىڭ قۇرامى – 66,1 پايىز», دەلىنگەن رەسمي حابارلامادا.
