گىر كوتەرۋ 1985 جىلى رەسمي سپورت ءتۇرى بولىپ بەكىتىلگەنىمەن, ونى ەشبىر سپورت ءتۇرى ءوز قۇرامىنا ەنگىزگەن جوق. ءسويتىپ, 2007 جىلى شىعىس ەۋروپانىڭ بەس مەملەكەتى – ەستونيا, ليتۆا, رەسەي, ۋكراينا جانە بەلارۋس باس قوسىپ, حالىقارالىق گىر سپورتى وداعىن قۇردى. ءسويتىپ, الەمنىڭ 63 ەلىن ءوز مۇشەلىگىنە قابىلداعان اتالعان ۇيىم 2010 جىلدان باستاپ گىر كوتەرۋدەن الەم چەمپيوناتىن ۇيىمداستىرا باستادى. جىل سايىن تۇراقتى تۇردە وتكىزىلەتىن الەمدىك دودانىڭ 2016 جىلعى باسەكەسى قازاقستاننىڭ اقتوبە قالاسىندا ۇيىمداستىرىلعانىن دا ايتا كەتەيىك.
جالپى, سپورتتىڭ قاي ءتۇرىن الىپ قاراساڭىز دا ءبارىنىڭ ماقساتى سالاماتتى ءومىر سالتىن ۇستانۋ, اۋەسقوي جانە كاسىبي دەڭگەيدە جەتىستىككە جەتۋ, ءتۇرلى جارىستارعا قاتىسۋ ەكەنى بەلگىلى. دەگەنمەن ءتاۋىر ناتيجەگە قول جەتكىزىپ, چەمپيوناتتاردا توپ جارۋ كەز كەلگەن سپورتشىعا بۇيىرا بەرمەيدى. مۇنداي جەتىستىككە تەك قاجىرلى ەڭبەك ەتىپ, سپورتتى شەكسىز ءسۇيىپ, كەز كەلگەن قيىندىققا مويىماي, تەك العا قاراي ۇمتىلاتىن جاندار عانا جەتەدى.
وسى سپورتتا باعى جانىپ, بابى كەلىسكەن, گىر كوتەرۋدەن سپورت شەبەرى, ەكى دۇركىن ازيا چەمپيونى, اسكەري قىزمەتشى, مايور ءادىلحان نۇرعازيننىڭ سپورتتىق عۇمىرى كوپ جانعا ۇلگى بولارلىقتاي.
شىعىس قازاقستان وبلىسىنىڭ كۇرشىم اۋدانىندا دۇنيەگە كەلگەن ءادىلحان نۇرعازين بوزبالا كۇنىنەن سپورتتى جانىنا سەرىك ەتكەن. 1992 جىلى كاسىبي-تەحنيكالىق ۋچيليششەگە وقۋعا تۇسكەن ول العاشىندا كۇرەسپەن اينالىسا باستاعان. كەيىننەن گىر كوتەرۋگە زەيىن قويىپ, اتالعان سپورتتىڭ قىر-سىرىنا قانىعادى. كەيىپكەرىمىز نەبارى ەكى جىلدىڭ ىشىندە گىر كوتەرۋدەن قازاقستان چەمپيونى اتاندى. 1994 جىلى العاش رەت جاستار اراسىندا ۇيىمداستىرىلعان ەل بىرىنشىلىگىندە ول 24 كيلو گىر تاسىن سەرپە كوتەرۋ جاتتىعۋىندا 80 رەت, جۇلقا كوتەرۋ باعدارلاماسىندا 85 رەت كوتەرىپ, التىننان القا تاقتى.
اۋىلدا وسكەن جىگىتتىڭ ەڭبەكقورلىعى سپورتتا تالاي سىنالدى. سپورت شەبەرىنە كانديدات اتاعىن الۋ ءۇشىن دە ءبىراز تەر توكتى. 1995 جىلدىڭ كۇزىندە قازاقستان چەمپيوناتىنا ىرىكتەۋ ءۇشىن ءوتىپ جاتقان وبلىستىق جارىستا 40 رەت سەرپە, 40 رەت جۇلقا كوتەرىپ, سپورت شەبەرىنە كانديدات اتاندى. ءادىلحاننىڭ قاي جارىسقا بارسا دا قورجىنى بوس قايتپايتىن.
1997 جىلى ەكى جىل اسكەر قاتارىندا وتان الدىنداعى بورىشىن ابىرويمەن وتەپ, ۇيىنە ورالادى. «1999 جىلى اسكەردەن كەلگەنىمدە سپورت شەبەرى, رەسپۋبليكانىڭ ەڭبەك سىڭىرگەن جاتتىقتىرۋشىسى ادىلبەك بايمۇحامبەتوۆتى كەزدەستىردىم, ول كۇرشىمدە ءوتىپ جاتقان اۋداندىق جارىسقا شىعاردى. جارىستان ءبىرىنشى ورىن الىپ, ارتىنشا وبلىستىق دوداعا دا قاتىستىم. 2000 جىلى كوپتەن ارمانداعان سپورت شەبەرى اتاعىنا دا قول جەتكىزىپ, ەرەسەكتەر اراسىندا قازاقستان چەمپيونى بولدىم», دەيدى اسكەري سپورتشى.
2001 جىلى احميردەگى اسكەري بولىمگە كەلىسىمشارت بويىنشا اسكەري قىزمەت ەتۋگە كەلەدى. ءادىلحاننىڭ سپورتقا دەگەن ەرەكشە ىقىلاسىن بايقاعان باسشىلىق ونى ۇشارالداعى اۋە قورعانىسى كۇشتەرىنىڭ اۆيابازاسىنا اۋىستىرىپ, دەنە دايىندىعى جانە سپورت باسشىسى لاۋازىمىنا تاعايىندادى. اسكەري قىزمەتتە جۇرسە دە, سپورتتان قول ۇزبەگەن كەيىپكەرىمىز تمد-عا مۇشە ەلدەر اراسىنداعى جارىستاردا بىرنەشە مارتە ءوز مىقتىلىعىن دالەلدەدى. اتاپ ايتار بولساق, 2010 جىلى پەتەربۋرگتە ءۇشىنشى, 2012 جىلى قىرعىزستان استاناسى بىشكەكتە وتكەن تۋرنيردە ەكىنشى ورىن يەلەندى. سونىمەن قاتار ءار جىلدارى ۇيىمداستىرىلعان وسىنداي حالىقارالىق جارىستاردا دا جۇلدەلى ورىنداردان كورىنىپ ءجۇردى.
2021 جىلى ەلورداعا قونىس اۋدارعان ول استاناداعى جاتتىقتىرۋشىسى سەرىك ابدىاقينمەن بىرگە بىشكەكتە ۇيىمداستىرىلعان ازيا چەمپيوناتىنا قاتىسىپ, العاش رەت سارى قۇرلىق باسەكەسىندە دارالاندى. جەرلەسىمىز 32 كيلولىق گىر تاسىن سەرپە جانە جۇلقا كوتەرۋدە بارلىق قارسىلاسىنان وق بويى ۇزاپ, 165 ۇپايمەن ۇزدىك شىقتى. سونداي-اق بيىل ساۋىردە ششۋچينسكىدە 40 جاسقا دەيىنگى ارداگەرلەر اراسىندا وتكىزىلگەن ازيا بىرىنشىلىگىندە باق سىناپ, قاتارىنان ەكىنشى مارتە تۇعىردىڭ ەڭ بيىك ساتىسىنان كورىندى.
وتباسىندا ءۇش ۇل, ءبىر قىز تاربيەلەپ وتىرعان اسكەري سپورتشى بۇگىندە شاكىرت تاربيەلەۋدى قولعا العان. ءادىلحان نۇرعازين قازىر گىر كوتەرۋ سپورتىنان بولەك, اسكەريلەنگەن كروسس, وفيتسەرلىك ءۇشسايىس سىندى باسقا دا سپورت تۇرلەرىنەن شاكىرت دايارلاپ ءجۇر. جاس جەتكىنشەكتەرمەن قاتار, ساربازداردى دا سپورتقا باۋلىپ, ولاردى ەلىشىلىك جانە شەتەلدىك جارىستارعا دا قاتىستىرىپ كەلەدى. جۋىردا ءۇندىستاندا وتكەن ءدۇبىرلى دودادا شاكىرتى ەربول دايىربايمەن بىرگە ءوزى دە باق سىناپ, ەكەۋى دە التىن تۇعىردان كورىنىپ, الەم چەمپيونى اتاندى.
