ساۋد ارابياسىنىڭ بۇل جەڭىسىن قازىر الەمدىك باق جارىسا جازىپ جاتىر. ويتكەنى ولار چەمپيوناتتىڭ باستى ءفاۆوريتى سانالعانى ارگەنتينا قۇراماسىن العاشقى ويىندا توبىقتان قاقتى. سونداي-اق ارابيالىقتار «البيسەلەستا» وكىلدەرىنىڭ 36 ماتچقا جالعاسقان جەڭىلىسسىز سەرياسىنا نۇكتە قويدى. وڭتۇستىك امەريكا وكىلى وسىمەن الەم چەمپيوناتتارىنىڭ تاريحىندا التىنشى مارتە ءبىرىنشى تۋردا جەڭىلدى. ولار سوڭعى رەت 1990 جىلعى دودادا كامەرۋن قۇراماسىنا ەسە جىبەرگەن بولاتىن.
ال الەم چەمپيوناتىنا قاتارىنان ەكىنشى رەت, جالپى التىنشى مارتە قاتىسىپ جاتقان ارابيالىقتار فۋتبول مۋنديالىنداعى ءتورتىنشى جەڭىسىن تويلاپ جاتىر. ساۋد ارابياسى 1994 جىلى اقش-تا ۇيىمداستىرىلعان چەمپيوناتتىڭ توپتىق كەزەڭىندە ماروككو (2:1) مەن بەلگيانى (1:0) جەڭسە, وسىدان ءتورت جىل بۇرىنعى رەسەيدەگى الەم بىرىنشىلىگىندە مىسىر (2:1) قۇراماسىنان باسىم تۇسكەن ەدى.
قۇرامانىڭ وسىناۋ تاريحي جەڭىسىنەن كەيىن ساۋد ارابياسى كورولى سالمان يبن ءابد ءال-عازيز ءال-ساۋد 23 قاراشانى بۇكىل مەملەكەتتىك دەمالىس كۇنى دەپ جاريالادى. ءسويتىپ, فۋتبولشىلاردىڭ 90 مينۋت ىشىندە جاساعان توسىنسىيىنىڭ ارقاسىندا تۇتاس ءبىر مەملەكەت تۇرعىندارىنا ءبىر كۇندىك دەمالىس بەرىلدى. ياعني كەشە مەملەكەتتىك قىزمەتكەرلەردەن باستاپ, جەكە سەكتوردا جۇمىس ىستەپ جۇرگەندەر, ستۋدەنتتەر مەن وقۋشىلاردىڭ ءبارى دەمالدى. سونىمەن قاتار باق بەتتەرىندە ارگەنتينا قۇراماسىن جەڭگەنى ءۇشىن ساۋد ارابياسىنىڭ ءاربىر فۋتبولشىسى 2,5 ميلليون ەۋرو كولەمىندە قارجىلاي سىياقى الاتىنى تۋرالى مالىمەت جاريالاندى.
ال سول ويىندا ارگەنتينا قۇراماسىنىڭ جالعىز گولىن پەنالتيدەن سوققان ليونەل مەسسي ايگىلى مارادونا مەن باتيستۋتانى ارتقا تاستاپ, قاتارىنان ءتورت الەم چەمپيوناتىندا گول سوققان العاشقى ارگەنتينالىق ويىنشى اتاندى. مەسسي وسى جەتىستىگىنىڭ ارقاسىندا ءتورت الەم بىرىنشىلىگىندە دارالانعان پەلە (برازيليا), ۋۆە زەەلەر مەن ميروسلاۆ كلوزە (گەرمانيا) جانە پورتۋگاليالىق كريشتيانۋ رونالدۋمەن تەڭەسىپ الدى. بەس دۇركىن التىن دوپ يەگەرى رونالدۋ قاتارداعى چەمپيوناتتىڭ العاشقى ويىنىن بۇگىن گانا قۇراماسىمەن وتكىزەدى, ەگەر ول وسى ماتچتا نەمەسە باسقا دا كەزدەسۋلەردىڭ بىرىندە گول سوعاتىن بولسا, بەس الەم بىرىنشىلىگىندە گول سوققان تاريحتاعى تۇڭعىش فۋتبولشى رەتىندە ەسىمى التىن ارىپپەن جازىلادى.
سونىمەن قاتار فۋتبولشىلاردىڭ باس باسەكەسىندەگى فرانتسيا مەن اۋستراليا (4:1) اراسىنداعى ماتچتا دا بىرنەشە رەكوردتىڭ مۇرتى بۇزىلدى. اتاپ ايتقاندا, قاتارداعى مۋنديالعا الەم چەمپيونى اتاعىن قورعاۋعا كەلگەن ء«ۇش جولاقتى» ەلدىڭ فۋتبولشىلارى العاشقى ويىنىندا-اق ءىرى ەسەپپەن جەڭىسكە جەتىپ, تاعى ءبىر ەرەكشە رەكورد ورناتتى. تاريحقا كوز جۇگىرتەر بولساق, الەم چەمپيوندارىنىڭ بىردە-ءبىرى وزدەرىنىڭ العاشقى ماتچىن ءىرى جەڭىسپەن باستاماعان. ءتىپتى كەيىنگى ءۇش چەمپيوناتتاعى جەڭىمپازدار ءبىرىنشى ماتچتا تەگىستەي ۇتىلعان.
اۋستراليا قاقپاسىنا دۋبل جاساعان فرانتسيا قۇراماسىنىڭ شابۋىلشىسى وليۆە جيرۋ ءوزىنىڭ ۇلتتىق قۇراماداعى 50 جانە 51-ءشى گولىن سوعىپ, تەرري ءانريدىڭ جەتىستىگىن قايتالادى. 1997-2010 جىلدار ارالىعىندا فرانتسيا قۇراماسىنىڭ نامىسىن قورعاعان انري 123 ماتچتا الاڭعا شىعىپ, 51 گول سوققان. ال 2011 جىلى فرانتسيا قۇراماسىنىڭ جەيدەسىن كيگەن جيرۋ 51 گولدى 115-ءشى ماتچىندا سوقتى. بۇل تىزىمدە جيرۋدى انتۋان گريزمانن (42 گول) جانە كاريم بەنزەما (37) وكشەلەپ كەلەدى.
سۇرمەرگەندەر تىزىمىندە 10-ورىندا تۇرعان كيليان مباپپە كەشە ءوزىنىڭ الەم چەمپيوناتى تاريحىنداعى بەسىنشى گولىن سوقتى. بۇل دەگەنىڭىز, 23 جاستاعى پسج كلۋبىنىڭ شابۋىلشىسى الەمدىك دودادا بەس مارتە دالدىك تانىتقان ەڭ جاس فرانتسۋز فۋتبولشىسى اتاندى. بۇعان دەيىنگى رەكورد جيۋست فونتەنگە تيەسىلى ەدى. ول 24 جاسىندا 1958 جىلعى الەم چەمپيوناتىندا جاسىنداي جارقىلداعان ەدى. ال ونىڭ سول جىلعى چەمپيوناتتا 13 دوپ سوعىپ جاساعان رەكوردى جۋىق ماڭدا جاڭارا قويمايتىنى انىق.
