كوميتەت حاتشىسى قاناتبەك سافينوۆ ءوز سوزىندە داۋلاردى شەشۋدىڭ بالاما راسىمدەرىن قولدانۋدىڭ ماڭىزىن اتاپ ءوتتى. دەپۋتات بۇل ءادىس سوت جۇيەسى جۇمىسىنىڭ تيىمدىلىگىن ارتتىرۋعا, تاراپتاردىڭ قارجىلىق جانە ۇيىمداستىرۋشىلىق شىعىندارىن قىسقارتۋعا, سونداي-اق قۇقىقتىق جانجالداردى شەشۋ مادەنيەتىنىڭ دەڭگەيىن ارتتىرۋعا مۇمكىندىك بەرەتىنىن اتاپ ءوتتى.
ء«بىزدىڭ ەلىمىزدە مەدياتسيا ءوزىنىڭ قالىپتاسۋ جانە دامۋ جولىنان ءوتىپ كەلەدى. بولاشاقتا مەدياتسيانى قولدانۋ تيىمدىرەك بولادى دەپ ويلايمىن. ال جانجالدى جاعدايلار داۋلاردى سوتقا دەيىنگى رەتتەۋ تارتىبىمەن ءوزىنىڭ شەشىمىن تابادى. ويتكەنى مەدياتسيانىڭ ءوز ارتىقشىلىقتارى بار», دەدى سەناتور سافينوۆ.
وتىرىس بارىسىندا تالقىلاناتىن زاڭ اياسىندا, مىسالى, «نەكە (ەرلى-زايىپتىلىق) جانە وتباسى تۋرالى» كودەكستە نەكەنى بۇزۋدى تىركەۋ ءتارتىبى جەڭىلدەتىلگەنى, ال «نوتاريات تۋرالى» زاڭدا نوتاريۋستاردىڭ اتقارۋشىلىق جازبالارىن قولدانۋ اياسى كەڭەيتىلگەنى اتاپ ءوتىلدى.
كەزدەسۋدە جوعارعى سوتتىڭ, ادىلەت, اقپارات جانە قوعامدىق دامۋ مينيسترلىكتەرىنىڭ وكىلدەرى بايانداما جاسادى. ولار داۋلاردى سوتتان تىس جانە سوتقا دەيىنگى رەتتەۋ سالاسىندا اتقارىلىپ جاتقان جۇمىستار تۋرالى ايتتى.
كوميتەت دەپۋتاتتارى وتىرىس قورىتىندىسى بويىنشا ۇكىمەت پەن بارلىق مۇددەلى مەملەكەتتىك ورگانداردىڭ اتىنا جىبەرىلەتىن ۇسىنىمدار ازىرلەدى.
