شانحاي ىنتىماقتاستىق ۇيىمىنىڭ باس حاتشىسى چجان مين ورتالىق سايلاۋ كوميسسياسى كەزەكتەن تىس پرەزيدەنت سايلاۋىنىڭ الدىن الا قورىتىندىسىن جاريالاعاننان كەيىن ميسسيانىڭ جۇمىسىن تۇيىندەدى. باس حاتشىنىڭ ايتۋىنشا, 17-20 قاراشا ارالىعىندا شىۇ ميسسياسى كەزەكتەن تىس پرەزيدەنت سايلاۋىندا بايقاۋشى ميسسياسىن اتقارعان. قۇرامىنا 18 بايقاۋشى تىركەلگەن دەلەگاتسياعا 7 مەملەكەتتىڭ, شىۇ-نىڭ حاتشىلىق وكىلدەرى, وڭىرلىك قۇرىلىمدارىنىڭ وكىلدەرى كىرىپتى.
«شىۇ وكىلدەرىنىڭ بايقاۋى استانا قالاسى مەن اقمولا وبلىسىنىڭ اۋماعىندا 22 ۋچاسكەنى قامتىدى. ميسسيا مۇشەلەرى بيۋللەتەندەر دايىنداۋ, داۋىس بەرۋ جاشىكتەرىن پلومبالاۋ پروتسەستەرىنە قاتىستى. سونداي-اق سايلاۋ كوميسسيالارىنىڭ مۇشەلەرىمەن, سايلاۋشىلارمەن, الەۋمەتتىك بايقاۋشىلارمەن كەڭ اۋقىمدا اشىق سۇحبات قۇردىق. وسى پروتسەسس كەزىندە سايلاۋ وتكىزۋگە دايىندىق تارتىپپەن, جاقسى ۇيىمداستىرىلعانىن تىركەدىك. ءبارى قالىپتى جاعدايدا, تارتىپكە ساي ءوتتى. ەكىنشىدەن, بۇكىل سايلاۋشىلار ۇلكەن بەلسەندىلىك تانىتتى», دەدى چجان مين.
ونىڭ ايتۋىنشا, داۋىس بەرۋ رەسىمىن جۇزەگە اسىرۋعا بۇكىل جاعداي جاسالعان. «ەگدە جاستاعى ازاماتتار مەن مۇمكىندىگى بار جاندارعا ارنايى جاعداي جاسالدى. سايلاۋ كوميسسيالارىنىڭ وكىلدەرى داۋىس بەرۋشىلەر قويعان سۇراقتارعا تولىققاندى جاۋاپ بەرىپ جاتتى. سونداي-اق بايقاۋشىلار تاراپىنان سۇراقتارعا تۇسىنىكتەمە بەردى. مەن بۇكىل سايلاۋ ۋچاسكەسىنە كىرگەن كەزدە ءوز قۇجاتىمدى كورسەتۋگە تۋرا كەلگەنىن اتاپ ءوتۋىم كەرەك», دەگەن شىۇ باس حاتشىسى سايلاۋ ۋچاسكەلەرىندە بايقاۋ جۇرگىزۋ كەزىندە بىردە-ءبىر كەدەرگىگە تاپ كەلمەگەنىن ەرەكشە اتادى.
– قازاقستان تاراپى سايلاۋ پروتسەسىنە باقىلاۋ جۇرگىزۋگە قاجەتتى بۇكىل جاعدايدى جاسادى دەپ ايتۋعا بولادى. سونداي-اق اتالعان سايلاۋدىڭ اشىقتىعى بايقالىپ تۇردى. بۇل قورىتىندىلاردىڭ ءبارىن ءبىزدىڭ ميسسيا مۇشەلەرى جەكە بايقاۋلارى نەگىزىندە شىعاردى. ۇلتتىق زاڭنامانىڭ سايلاۋ لەگيتيمدىلىگىنە كۇمان كەلتىرەتىندەي بۇزىلۋىن ءبىزدىڭ ميسسيا تىركەگەن جوق. بىزگە ەشقانداي شاعىم نەمەسە ەسكەرتۋ تۇسپەدى. جەكە بايقاۋىمىز نەگىزىندە ميسسيا بۇل سايلاۋدى اشىق, سەنىمدى ءارى دەموكراتيالىق دەپ تانيدى. قازاقستان پرەزيدەنتىنىڭ سايلاۋى قازاقستانداعى سايلاۋ ەلدىڭ ءوزى قابىلداعان حالىقارالىق مىندەتتەمەلەرگە ساي ءوتتى, – دەدى چجان مين.
