60 مىڭ جانكۇيەرگە ارناپ سالىنعان ء«ال-بايت» ستاديونىنداعى اشىلۋ سالتاناتىنا كەلگەن جانكۇيەرلەر مەن تەلەكورەرمەندەر كورەيالىق ءانشى جانە BTS توبىنىڭ وكىلى چونگۋك پەن قاتارلىق ءارتىس فاحاد ءال-كۋبايسيدىڭ «Dreamers» كومپوزيتسياسىن, گولليۆۋدتىڭ تانىمال ءارى قۇرمەتتى اكتەرلەرىنىڭ ءبىرى, «وسكار» سىيلىعىنىڭ لاۋرەاتى مورگان فريمەننىڭ ساحنالىق ونەرىن تاماشالادى. سونداي-اق ۇيىمداستىرۋشىلار وسىعان دەيىنگى الەم چەمپيوناتتارىنىڭ ءانۇرانى مەن بويتۇمارلارىن كورەرمەندەردىڭ ەسىنە تاعى ءبىر مارتە سالىپ ءوتتى.
ال جيىننىڭ رەسمي راسىمىندە قاتار ءامىرى تاميم بين حاماد ات-تاني ءسوز سويلەپ, بارشا فۋتبول جانكۇيەرىن مۋنديالدىڭ باستالۋىمەن قۇتتىقتادى. چەمپيوناتتىڭ اشىلۋ راسىمىندەگى ەڭ ەرەكشە وقيعانىڭ ءبىرى رەتىندە جەرگىلىكتى قاري عانيم مۋفاحتىڭ قۇران سۇرەلەرىن وقىعانىن اتاپ وتۋگە بولادى. ء«ال-بايت» ستاديونىندا ءال-حۋجۋرات سۇرەسىنىڭ 13-اياتى وقىلدى.
رەسمي ءىس-شارالار اياقتالعان سوڭ جاسىل الاڭعا جارىس قوجايىنى قاتار مەن الەم چەمپيوناتىندا ءتورتىنشى مارتە ونەر كورسەتۋ مۇمكىندىگىنە يە بولعان ەكۆادور قۇرامالارى شىقتى. قاتار قۇراماسى الەم چەمپيوناتىنا تۋرنير ۇيىمداستىرۋشىسى رەتىندە قاتىسىپ جاتسا, ەكۆادور فۋتبولشىلارى وڭتۇستىك امەريكا قۇرلىعىنىڭ ىرىكتەۋ باسەكەسىندە پەرۋ, كولۋمبيا, چيلي جانە پاراگۆاي قۇرامالارىن ارتقا تاستاپ, قاتار جولداماسىن جەڭىپ العان ەدى.
كوپشىلىك كۇتكەندەي الەم چەمپيوناتىنىڭ العاشقى ماتچى اسا تارتىستى بولا قويعان جوق. ەكۆادور فۋتبولشىلارى بۇل كەزدەسۋدە ايقىن باسىمدىق تانىتتى. دەگەنمەن, فۋتبول جانكۇيەرلەرى بۇل ماتچتى باسقا قىزىعۋشىلىقپەن تاماشالادى دەپ ايتۋعا بولادى. سەبەبى چەمپيونات باستالاردان بىرەر كۇن بۇرىن ينتەرنەت الەمىندە «قاتار بيلىگى ەكۆادور قۇراماسىنىڭ سەگىز فۋتبولشىسىنا ۇلكەن سومادا قارجى ۇسىنىپ, العاشقى ماتچتاعى جەڭىستى ساتىپ الىپتى» دەگەن اقپارات ءاپ-ساتتە بۇكىل الەمگە تارالىپ كەتتى. ايتسە دە, بۇل اقپاراتتىڭ شىندىققا ەش جاناسپايتىنىن ەكۆادور فۋتبولشىلارى ماتچتىڭ ءبىرىنشى تايمىندا-اق دالەلدەپ تاستادى. ال وسى ءبىر انتيجارنامانىڭ ارقاسىندا اتالعان كەزدەسۋ دۇنيە ءجۇزىنىڭ نازارىن وزىنە اۋدارتتى.
ءسويتىپ 22-ءشى الەم چەمپيوناتىنىڭ العاشقى كەزدەسۋىندە ەكۆادورلىقتار الاڭ قوجايىندارىن 2:0 ەسەبىمەن تىزە بۇكتىردى. بيىلعى بىرىنشىلىكتىڭ العاشقى گولىن ەننەر ۆالەنسيا 16-مينۋتتا پەنالتيدەن سوقتى. سونداي-اق ول چەمپيوناتتاعى ەكىنشى گولدى دا ءوز ەنشىسىنە جازدى. وسىلايشا, الەم چەمپيوناتتارىنىڭ تاريحىندا العاش رەت جارىستى ۇيىمداستىرۋشى ەل تۇساۋكەسەر ماتچتا جەڭىسكە جەتە المادى.
