سۋرەتتەردى تۇسىرگەن يۋري بەككەر
قىلقالامنان قۋانىش تاپقان ۇزدىك شەبەرلەردى ءبىر الاڭدا جيناعان كورمەدە سۋرەتشىلەر ءارتۇرلى جانردا كومپوزيتسيالىق كرەاتيۆتى وي-تۇجىرىمدارىن مەيلىنشە ايقىنداپ, قازىرگى زاماننىڭ وزەكتى ماسەلەلەرىن بايانداۋ ارقىلى زاماناۋي قازاق كاسىبي ونەرىن جاڭا قىرىنان تانىتۋدى ماقسات ەتكەن. قابىرعاداعى ءاربىر تۋىندى كوركەمدىك شىعارماشىلىقتىڭ بۇگىنگى دەڭگەيىن كورسەتە وتىرىپ, اۆتورلىق ستيل مەن تاقىرىپتىق, كومپوزيتسيالىق كونتسەپتۋالدى شەشىمدەردىڭ جولىن انىقتاۋعا مۇمكىندىك بەرەدى. بەينەلەۋ مەن قولدانبالى ونەردىڭ بارلىق جانرىن قامتىعان ەكسپوزيتسيا رەاليستىك, ابستراكتسيالىق, اۆانگاردتىق, مينيماليزمدىك, كونتسەنتۋالدىق مانەردەگى ونەر يەلەرىنىڭ كوركەمدىك يدەيالارىن كەڭىنەن تانىتادى.
قازداي تىزىلگەن كارتينالارعا كوز سالساڭىز, ءار شىعارمانىڭ استارىنان سۋرەتشىنىڭ ىشكى الەمىن كورەسىز. اق پەن قارانىڭ قايشىلىعى, كۇشتىنىڭ السىزگە كورسەتكەن وكتەمدىگى, ادامزاتتى تىعىرىققا تىرەگەن سوعىس, جايقالعان جاسىل دالا, قالانىڭ قاۋىرت تىرشىلىگى, اكە مەن انا بەينەسى, ەڭبەك ادامدارىنىڭ ماڭداي تەرى, ەسەپسىز دوستىقتى تۋ ەتكەن ادال جاندار, ءبارى-ءبارى وسىندا...
قازاقستان سۋرەتشىلەر وداعىنىڭ كەزەكتى ءحىح سەزى قارساڭىنداعى ەسەپ بەرۋ كورمەسىنە ساراپشىلار كوميتەتىنىڭ شەشىمى بويىنشا: استانا, قاراعاندى, پاۆلودار, كوكشەتاۋ, اتىراۋ, اقتاۋ, اقتوبە, ورال, وسكەمەن, تاراز, شىمكەنت, الماتى قالالارىنان, الماتى وبلىسىنان بارلىعى 120 سۋرەتشىنىڭ قولتاڭباسى ىرىكتەلىپ الىنعان. كورمەدەگى 150-گە جۋىق كەسكىندەمە, گرافيكا, ءمۇسىن, گوبەلەن, كەراميكا, كيىز, كەستە ونەرىندە بەدەرلەنگەن شىعارماشىلىق تۋىندىلار كوز باۋرايدى. ونەر جاناشىرلارى ەكسپوزيتسيانى تۇپنۇسقامەن قاتار ونلاين فورماتتا دا تاماشالاي الادى.
– كورمەنىڭ ەرەكشەلىگى, قازاقستاننىڭ ءاربىر وڭىرىنەن قاتىسقان سۋرەتشىلەر ءوز بەلسەندىلىكتەرىن تانىتتى. الدىڭعى تولقىن اعا بۋىننان باستاپ ءىزباسار جاس سۋرەتشىلەر ومىرلىك تاجىريبەسىن, ىشكى الەمىن, وزىندىك تۇلعالىق مانەرىن, كرەاتيۆتى تۇجىرىمىن, وزگەشە ورنەكتەرىن ورتاعا سالىپ, ماعىنالى دا ءماندى تۋىندىلارىن ۇسىندى. سۋرەتشىلەردىڭ ۇلتتىق تاريحتى, مادەنيەتتى, سالت-ءداستۇردى دارىپتەيتىن جانە بۇگىنگى تاڭداعى الەۋمەتتىك تاقىرىپتا سىر شەرتەتىن تۋىندىلارى وي-سانانى سان تاراپقا جەتەلەيدى. سونداي-اق ەكسپوزيتسياداعى ءاربىر شىعارمانىڭ كومپوزيتسيالىق جانە كوللوريتتىك شەشىمدەرى, ونداعى ديناميكالىق ۇندەستىك پەن ءوزارا تۇتاستىق ۋاقىت پەن كەڭىستىك بولمىسىن دارىپتەيدى. سۋرەتشى – الەمىنىڭ قۇبىلىسىن استىرتىن مالىمدەي, كورەرمەنگە تىرشىلىك پەن قوعام شىندىعىن ەركىن جەتكىزەتىن, ءاربىر قوزعالىستى سەرمەي سىزىپ, ونداعى تىلسىم دۇنيەنىڭ بولمىسىن ونەر تىلىمەن تۇسىندىرەتىن جىرشى, – دەيدى كورمە جەتەكشىسى, ونەرتانۋشى گۇلنار جۇبانيازوۆا.
زامان اعىمىنا قاراي سۋرەتشi نەنi بولسا دا جاڭا كوزقاراسپەن بەرۋگە ۇمتىلادى. كورگەنى مەن تۇيگەنىن, ۋاقىت پەن زامانا كەلبەتىن, ىشكى وي-تۇيسىگىن كورەرمەنگە دەر كەزىندە جەتكىزگىسى كەلەدى. كەنەپتەگى قورشاعان ورتانىڭ تەپە-تەڭدىك ۇيلەسىمى, اڭىز بەن كونە تىرشىلىك تىلسىمى, ادامداردىڭ كوڭىل كۇيى سياقتى تاقىرىپتىق كومپوزيتسيالار شىنايىلىعىمەن قۇندى. اسىرەسە كەشە مەن بۇگىندى سالىستىرا جىرلاعان جۇمىستار – ادامزات بالاسى جاڭا مۇمكىندىكتەردى يگەرگەنىمەن ەڭ ىزگى قۇندىلىقتاردان اجىراپ بارا جاتقانىن ايتقىسى كەلەتىندەي…
الماتى
