سايلاۋ ۋچاسكەسىنە العاشقىلاردىڭ ءبىرى بولىپ قازاقستاندىق ستۋدەنت الىبەك دۇيسەنبەكوۆ كەلدى. جاس جەرلەسىمىز سايلاۋعا العاش رەت قاتىسىپ وتىرعانىن ايتتى.
«مەن بۇل كۇندى كوپتەن كۇتتىم. اتا-انام ۇنەمى داۋىس بەرەتىن, مەن ءوزىمنىڭ سايلاۋعا قاشان قاتىساتىنىمدى قىزىعا كۇتەتىنمىن. سايلاۋعا قاتىسۋ ءاربىر قازاقستاندىقتىڭ ازاماتتىق بورىشى دەپ بىلەمىن. سوندىقتان مەن ەرتە كەلىپ, ءبىرىنشى بولىپ داۋىس بەردىم», دەدى الىبەك.
الىبەك دۇيسەنبەكوۆ قازىر بريۋسسەل ۋنيۆەرسيتەتى, تاريح فاكۋلتەتىنىڭ ءبىرىنشى كۋرس ستۋدەنتى.
«مەن بالا كەزىمنەن تاريحقا قىزىعامىن. بەلگيادا مەن قازاقستانمەن بايلانىستى مۇرالاردى زەرتتەگىم كەلەدى. قازاقستاننىڭ تاريحى وتە باي, مەن ەۋروپانىڭ كىتاپحانالارىنان تۋعان جەرگە قاتىستى ماتەريالداردى زەرتتەگىم كەلەدى», دەدى جاس جەرلەسىمىز.
ايتا كەتەيىك, بەلگيادا داۋىس بەرۋ جەرگىلىكتى ۋاقىت بويىنشا 20:00-گە دەيىن (استانا ۋاقىتى بويىنشا 01:00-گە دەيىن) وتەدى.
