سۋرەت: ەرلان ومار
حالىقارالىق بايقاۋشىلارعا ارنالعان قولعابىس كورسەتۋ ورتالىعىنداعى بريفينگكە قاتىسقان ارمەنيا-قازاقستان پارلامەنتتىك دوستىق توبىنىڭ جەتەكشىسى, ارمەنيا رەسپۋبليكاسى ۇلتتىق اسسامبلەياسىنىڭ وڭىرلىك جانە ەۋرازيالىق ينتەگراتسيا ماسەلەلەرى جونىندەگى تۇراقتى كوميسسياسى توراعاسىنىڭ ورىنباسارى ۆاگارشاك اكوبياننىڭ ايتۋىنشا, ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەياسىنىڭ وكىلدەرى كەشەلى بەرى ۇزدىكسىز جۇمىس ىستەپ جاتىر.
ء«بىز سايلاۋعا ءتۇسىپ جاتقان كانديداتتاردىڭ شتابتارىندا بولدىق. ءتۇرلى قۇرىلىمداردىڭ وكىلدەرىمەن كەزدەستىك. تاڭەرتەڭنەن بەرى ۋچاسكەلەردى ارالاپ ءجۇرمىز. سايلاۋشىلاردىڭ بەلسەندىلىگىن جوعارى باعالاۋ كەرەك. ساعات 10:00-دە ءبىز بارعان ۋچاسكەلەردەگى سايلاۋشىلاردىڭ 10 پايىزدان استامى داۋىس بەرىپ ۇلگەرگەن. بۇل جاقسى كورسەتكىش. ۇيىمداستىرۋ جۇمىستارىنىڭ جوعارى دەڭگەيدە ەكەنىن اتاپ وتۋگە ءتيىسپىز. پروتسەستى مۇقيات قاداعالاپ وتىرمىز. سايلاۋ قورىتىندىسى قازاقستان تۇرعىندارىن بىرىكتىرە تۇسەدى دەگەن ويدامىن», دەدى ۆاگارشاك اكوبيان.
ۇجىمدىق قاۋىپسىزدىك تۋرالى شارت ۇيىمىنىڭ پارلامەنتتىك اسسامبلەياسى حاتشىلىعىنىڭ باسشىسى – جاۋاپتى حاتشىسى سەرگەي پوسپەلوۆ سايلاۋ ۋچاسكەلەرى اشىلعانعا دەيىن بىرقاتار ۋچاسكەدە كەزەك قالىپتاسقانىن اتاپ ءوتتى.
«ۇجىمدىق قاۋىپسىزدىك تۋرالى شارت ۇيىمىنىڭ پارلامەنتتىك اسسامبلەياسى قازاقستانداعى رەفەرەندۋم كەزىندە دە جۇمىس ىستەگەن بولاتىن. ال بۇگىن ءبىزدىڭ توپ استانا قالاسىندا, اقمولا وبلىسىندا جانە بىشكەك قالاسىندا جۇمىس ىستەپ جاتىر. ولار دا سايلاۋشىلاردىڭ بەلسەندى ەكەنىن اتاپ وتۋدە. ازىرشە ەشقانداي بۇزۋشىلىقتى بايقامادىق. سايلاۋ ۋچاسكەلەرى جابىلعانشا ءوز جۇمىسىمىزدى جالعاستىرامىز. ءبىزبىڭ بايقاۋشىلار داۋىس ساناۋعا دا قاتىسادى. كەشكە قورىتىندى قۇجاتتى ازىرلەيمىز», دەدى سەرگەي پوسپەلوۆ.
