جۇمىس تارتىبىنە سايكەس, تاڭعى ساعات 6-دا قاراجانباس كەن ورنىندا تۇپقاراعان اۋدانىنا قاراستى № 236 سايلاۋ ۋچاسكەسى ءوز جۇمىسىن باستادى. ءداستۇر بويىنشا الدىمەن مەملەكەتتىك ءانۇران شىرقالدى. باس ديرەكتوردىڭ ءبىرىنشى ورىنباسارى قۋانىشباي نۇرعاليەۆ باستاعان كومپانيا باسشىلارى مەن وندىرىستىك باسقارما ديرەكتورى عابيت سادۋاقاسوۆ العاشقىلاردىڭ ءبىرى بولىپ داۋىس بەردى.
مۇنايشىلار ەل بولاشاعىن تاڭداۋداعى ۇلەسىنىڭ زور ەكەنىن ءتۇسىنىپ, سايلاۋعا ەرەكشە ۇمتىلىسپەن قاتىسىپ جاتىر. جۇمىس اۋىسىمى الدىندا داۋىس بەرگەندەردىڭ ءبىرى - مۇناي دايىنداۋ جانە ايداۋ تسەحىنىڭ (مداتس) وپەراتورى - ءالىبي جولدىباەۆ.
«وتانىمىزدىڭ تاعدىرى ءۇشىن ماڭىزدى كۇنگە اتسالىسۋ - ازاماتتىق مىندەتىم. تسەحتاعى ارىپتەستەرمەن بىرگە ءبىز دە ءوز داۋىسىمىزدى بەردىك. حالىقتىڭ مۇددەلەرى ءبىرىنشى ورىندا تۇرعان قولايلى وزگەرىستەردى كۇتەمىز», دەدى ول.
باقىلاۋشىلار سايلاۋشىلاردىڭ داۋىس بەرۋگە قارقىندى قاتىسىپ جاتقانىن, ۇيىمداستىرۋ دەڭگەيىنىڭ جوعارىلىعىن اتاپ ءوتتى. جالپى سايلاۋدا پاتريوتيزم مەن بىرلىك رۋحى انىق سەزىلەدى. ايتا كەتۋ كەرەك, ۆاحتاارالىق دەمالىستا جۇرگەن قاراجانباستىقتار مەن ورتالىق كەڭسە قىزمەتكەرلەرى تۇرعىلىقتى جەرى بويىنشا ۋچاسكەلەردە داۋىس بەرۋدە.
