سايلاۋ • 20 قاراشا، 2022

كوكشەتاۋلىقتار ءوز تاڭداۋىن جاساۋدا

29 رەت كورسەتىلدى

اقمولا وبلىسىنىڭ ورتالىعىنداعى ءبىلىم-يننوۆاتسيا ليتسەيىنىڭ عيماراتىندا ورنالاسقان №24 ۋچاسكەگە سايلاۋشىلار تاڭ سارىدەن كەلە باستادى، دەپ حابارلايدى Egemen.kz.

ۋچاسكەدە 2864 سايلاۋشى تىركەلگەن. ۋچاسكەلىك سايلاۋ كوميسسياسىنىڭ توراعاسى جۇماباي سادۋاقاسوۆتىڭ ايتۋىنا قاراعاندا، دايىندىق جۇمىستارى تياناقتى جۇرگىزىلگەن. مۇمكىندىگى شەكتەۋلى ادامدارعا داۋىس بەرۋ ءۇشىن قولايلى جاعداي جاسالادى.

«16 ادام ۇيلەرىندە داۋىس بەرەدى.ەشكىم دە قالىس قالماۋى كەرەك قوي. ءبىز ازاماتتاردىڭ داۋىس بەرۋىنە بارلىق جاعدايدى جاسايمىز»، دەيدى كوميسسيا توراعاسى.

سايلاۋشىلارمەن دە تىلدەستىك. حالىق ەل بولاشاعىنا بەي-جاي قارامايدى. ساياسي بەلسەندىلىكتىڭ جوعارى بولۋى سوندىقتان.

«ەندىگى ارادا ادامدار بەيجايلىقتى قويۋى كەرەك. وسىنىڭ بارلىعى ەلىمىزدىڭ بولاشاعى ءۇشىن جاسالىپ جاتقان شارۋا. سوندىقتان اركىم ءوزىنىڭ جۇرەك قالاۋىن ايقىنداپ، ەگەمەن ەلىمىزدىڭ كەرەگەسى كەڭىپ، ءادىل دە جايلى قوعام ورناتۋ ءۇشىن ءوز تاڭداۋلارىن جاساۋى كەرەك. بۇگىن كورشىلەرىمىز دە، جاقىن ماڭدا تۇراتىن تانىستارىمىز دا ەرتە تۇرىپ، سايلاۋ ۋچاسكەسىنە كەلىپ جاتىر. وسىنىڭ بارلىعى ەل ىشىندەگى بىرلىكتى، كەلەشەككە دەگەن الاڭداۋشىلىقتى بىلدىرەدى ەمەس پە؟ ءسال عانا ۋاقىتىڭىزدى الىپ، كوكىرەگىمدە جاتتالىپ قالعان ەسكى ءبىر سۋرەتتى تىرىلتە كەتەيىنشى. باياعىدا بالا كەزىمىزدە اتا-انالارىمىز قۇلقىن سارىدەن تۇرىپ، بارىن كيىپ، بايلاۋىن تاعىپ، ناق ءبىر مەرەكەدەگىدەي سايلاۋ ۋچاسكەسىنە بەت الاتىن. ءبىز، بالالار ۇلكەندەردىڭ بويىنداعى جاۋاپكەرشىلىك سەزىمدى جەتە تۇسىنبەسەك تە، سولارمەن بىرگە تۇرىپ، شىعارىپ سالاتىنبىز. بۇگىن مەن دە بالالار مەن نەمەرەلەردىڭ قۇلاعىنا قۇيىپ شىقتىم. ەرتەڭ ولار دا كامەلەتتىك جاسقا تولعان كەزدە ەل بولاشاعىن وزدەرى تاڭدايتىندىقتارىن ءبىلىپ ءجۇرسىن دەگەنىم عوي»، دەيدى قالا تۇرعىنى ەرمەك جاڭاتوۆ.

وبلىس ورتالىعىنداعى سايلاۋ ۋچاسكەلەرىندەگى جاۋاپتى ناۋقان جاۋاپكەرشىلىكپەن ءجۇرىپ جاتىر.

سوڭعى جاڭالىقتار

استانادا «ۆaitursynuly.kz» سايتىنىڭ تۇساۋكەسەرى ءوتتى

احمەت بايتۇرسىن ۇلى • 03 اقپان، 2023

ۇقساس جاڭالىقتار