مەديتسينالىق ۇيىمدار قىزمەت جەتكىزۋشى رەتىندە مەديتسينالىق ساقتاندىرۋ قورىمەن شارت جاساي وتىرىپ, شارتتا كورسەتىلگەن مەديتسينالىق قىزمەتتەردى تولىق كولەمدە ۇسىنۋعا مىندەتتەمە الادى جانە قولجەتىمدىلىك پەن ساپا ءۇشىن جاۋاپتى بولادى.
«قور تۇرعىندارمەن كەرى بايلانىس ورناتىپ, تۇراقتى تۇردە جۇمىس جۇرگىزەدى. مىسالى, بەيىندى ماماندارعا, دياگنوستيكالىق قىزمەتتەرگە جەتە الماۋ نەمەسە ولاردى ۇزاق كۇتۋ, سول سەكىلدى ۋچاسكەلىك قىزمەتتەردى (جالپى پراكتيكا دارىگەرى, تەراپەۆت-دارىگەر, پەدياتر-دارىگەر), جەدەل مەديتسينالىق كومەك بريگاداسىن ۇزاق كۇتۋ, ت.ب. بويىنشا ازاماتتاردان «ەمحانا كورسەتىلىمدەر بولسا دا, وتكىزۋ مۇمكىندىگىنىڭ جوقتىعىنا سىلتەمە جاساي وتىرىپ, كونسۋلتاتسيالىق-دياگنوستيكالىق قىزمەتكە جىبەرۋدەن باس تارتادى» دەگەن وتىنىشتەردى ءجيى الامىز. مۇنداي جاعدايدا, قىزمەت جەتكىزۋشى قور بازاسىندا تۇراتىن مەديتسينالىق ۇيىمدار قاتارىنان بىرلەسىپ ورىنداۋشىنى تارتۋعا مىندەتتى. ەگەر بىرلەسىپ ورىنداۋ شارتى ەشكىممەن جاسالماسا, وندا پاتسيەنتتى وسى قىزمەت ءتۇرى بويىنشا قورمەن كەلىسىمشارتقا وتىرعان مەديتسينا ۇيىمدارىنىڭ بىرىنە جىبەرۋگە ءتيىس, جولداما بويىنشا كورسەتىلگەن قىزمەت قورىتىندىلارى نەگىزىندە شارت اۆتوماتتى تۇردە جاسالادى», دەپ اتاپ ءوتتى «الەۋمەتتىك مەديتسينالىق ساقتاندىرۋ قورى» كەاق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
ونىڭ ايتۋىنشا, جوسپارلى مەديتسينالىق كومەك پاتسيەنتتىڭ ومىرىنە قاۋىپ توندىرمەيتىن اۋرۋلار مەن جاعدايلار كەزىندە كورسەتىلەتىنىنە جانە ءسال كەيىنگە قالدىرۋ پاتسيەنتتىڭ جاي-كۇيىنىڭ ناشارلاۋىنا اكەپ سوقپايتىنىنا قاراماستان, پاتسيەنت كونسۋلتاتسيالىق نەمەسە دياگنوستيكالىق قىزمەتتى 10 كۇننەن ارتىق كۇتپەۋى ءتيىس. بۇل مونيتورينگ ەرەجەلەرىمەن بەكىتىلگەن
كونسۋلتاتسيالىق-دياگنوستيكالىق قىزمەتتى قالاي الۋعا بولادى؟
كەز كەلگەن كونسۋلتاتسيالىق-دياگنوستيكالىق قىزمەتتى پاتسيەنتكە ەمدەۋشى دارىگەر تاعايىندايدى. ول ناۋقاستىڭ جاعدايىن, شاعىمدارىن, اۋرۋدىڭ بەلگىلەرىن زەردەلەيدى. ءتيىستى كورسەتىلىمدەر بولسا دارىگەر كت, مرت نەمەسە باسقا دا زەرتتەۋلەر جۇرگىزۋگە جولداما جازادى. قىزمەتتى جوسپارلى تۇردە الۋ ءۇشىن پاتسيەنت «ساقتاندىرىلعان» مارتەبەسىنە يە بولۋى ءتيىس, ويتكەنى ەمحانا دەڭگەيىندە بۇل قىزمەتتەر ءمامس اياسىندا كورسەتىلەدى.
ء«بىزدىڭ ەمحانامىزدىڭ دياگنوستيكا بولىمشەسىندە بىرنەشە فۋنكتسيونالدىق دياگنوستيكا كابينەتتەرى جۇمىس ىستەيدى. ءتۇرلى زەرتتەۋلەر جۇرگىزىلەدى, سونىڭ ىشىندە: ەكگ, سپيروگرافيا, ترەدميل تەست, حمەكگ, اقتم (سماد), ۋدز, كومپيۋتەرلىك توموگرافيا, سونداي-اق رەنتگەن, فليۋورو, مامموگرافيالىق كابينەتتەر, مەكتەپتەرگە بارۋعا مۇمكىندىك بەرەتىن فليۋوروگرافيالىق ماشينا بار, ەندوسكوپيالىق كابينەت جۇمىس ىستەيدى. سوندىقتان بىزدە سالا ماماندارىنىڭ قولجەتىمسىزدىگى نەمەسە ۇزاق كۇتۋ, دياگنوستيكالىق قىزمەتتەر, ۋچاسكەلىك قىزمەت (جتد, دارىگەر-پەدياتر) قابىلداۋىن ۇزاق كۇتۋ, جەدەل مەديتسينالىق جاردەم بريگاداسىن ۇزاق كۇتۋ, ت.ب. سەبەپتەرگە بايلانىستى پاتسيەنتتەر تاراپىنان شاعىم بولعان ەمەس» دەيدى استانا قالاسىنداعى №9 ەمحانانىڭ فۋنكتسيونالدىق دياگنوستيكا بولىمشەسىنىڭ مەڭگەرۋشىسى, كارديولوگ دارىگەر انيرا قايراتقىزى ابەۋستانوۆا.
بەيىندى مامان-دارىگەرلەردىڭ كونسۋلتاتسيالارى, كت/مرت, رەنتگەن جانە دياگنوستيكالىق قىزمەتتىڭ باسقا دا تۇرلەرى ءمامس جۇيەسىندە ساقتاندىرىلعان ازاماتتارعا ەمدەۋشى دارىگەردىڭ جولداماسى بويىنشا تەگىن كورسەتىلەدى. ولار ءۇشىن قوسىمشا اقى تالاپ ەتىلمەۋى كەرەك. ەگەر ەمحانا اتالعان قىزمەتتەردى ءوزى ۇسىنا الماسا, وندا ورىنداۋ شارتى بويىنشا پاتسيەنتتىڭ باسقا كلينيكادان الۋىن قامتاماسىز ەتۋى ءتيىس.
الايدا, پاتسيەنت ءوز ەمحاناسىنا بارماي, باسقا مەديتسينالىق ورتالىقتارعا تىكەلەي بارىپ, كونسۋلتاتسيالىق-دياگنوستيكالىق قىزمەتتى اقىلى الاتىن جاعدايلار دا كەزدەسەدى.
«كەيدە ءبىز الەۋمەتتىك جەلىلەردەن پاتسيەنتكە جولداما بەرىلمەگەنى جانە ولار اقىلى تۇردە قىزمەت العانى تۋرالى شاعىمداردى كورەمىز. مۇنداي جاعدايلاردا پاتسيەنتتىڭ قۇقىعىن قورعاۋشى رەتىندە قور ىسكە قوسىلادى. بىراق, كەيدە, تەكسەرۋ ناتيجەسىندە پاتسيەنت ءتىپتى ءوز ەمحاناسىنا جۇگىنبەگەنى, بىراق دەرەۋ باسقا جەردە اقىلى تەكسەرۋدەن وتۋگە شەشىم قابىلداعانى انىقتالىپ جاتادى. سوندىقتان, ازاماتتاردى تمككك شەڭبەرىندە جانە ءمامس جۇيەسىندە مەديتسينالىق قىزمەتتەردى پايدالانۋعا شاقىرامىز. ەگەر پروبلەمالار تۋىنداسا, الدىمەن ەمحانانىڭ پاتسيەنتتى قولداۋ قىزمەتىنە حابارلاسىپ, ءوز قۇقىقتارىڭىزدى قورعاڭىزدار», دەپ ءتۇسىندىردى امسق ەلوردا فيليالىنىڭ حالىقتى اقپاراتتاندىرۋ ءبولىمىنىڭ باس ساراپشىسى جانارگۇل ۇمبەتوۆا.
