كەزدەسۋدى ۇلتتىق اكادەميالىق كىتاپحانا قازاقستان رەسپۋبليكاسىنىڭ سىرتقى ىستەر مينيسترلىگى جانە قازاقستان رەسپۋبليكاسىنىڭ نورۆەگيا كورولدىگىندەگى ەلشىلىگىمەن بىرلەسىپ ۇيىمداستىردى.
اتالعان كەزدەسۋگە مەملەكەت جانە قوعام قايراتكەرلەرى مەن ادەبيەتتانۋشى عالىمدار قاتىستى. اباي قۇنانباي ۇلىنىڭ «قارا سوزدەرى» نورۆەگ تىلىنە تۇڭعىش رەت اۋدارىلىپ جارىق كورىپ وتىر. نورۆەگ تىلىندە شىققان بۇل كىتاپقا حاكىم ابايدىڭ ءومىر جولى تولىق قامتىلىپ بەرىلگەن.
ابايدى ءوز تىلىندە سويلەتكەن وسحيلد كيۋلوس, فيلوسوف رەتىندە عانا ەمەس, سونىمەن بىرگە ەتنوساياساتقا, سىندى بىرنەشە سالانى قامتىعان مامان يەسى. سونىمەن قاتار وسحيلد كيۋلوس «Sirkel Forlag» باسپاسىنىڭ باس رەداكتورى.
عالىم وسحيلد كيۋلوستىڭ پايىمىنداۋىنشا, اباي ۇلتتىق دەڭگەيدەن الدە قايدا جوعارى كوتەرىلگەن, تۇتاس ادامزاتقا ورتاق ويشىل. «قارا سوزدەرى» الەۋمەتتىك سىنشىلدىعىمەن قاتار ەكزيستەنتسيالدى ماسەلەلەردى تەرەڭ قاۋزاۋىمەن ەۋروپالىق وقىرمانداردىڭ دا نازارىن اۋدارىپ وتىر.
باسپاگەر وسحيلد كيۋلوس ءوز سوزىندە كىتاپتىڭ نورۆەگ تىلىنە اۋدارىلۋ بارىسىندا ابايدىڭ تەرەڭ فيلوسوفيالىق ويلارىن اۋدارۋ تىم قيىنعا سوققانىن, الداعى ۋاقىتتا قازاق عالىمدارىمەن بىرلەسە وتىرىپ بۇل كىتاپتىڭ ساپاسىن تاعى دا جەتىلدىرە ءتۇسۋ جوسپارى بار ەكەنىن ايتتى.
