قاتارداعى تەڭبىل دوپ مەرەكەسى

ەرەكشەلىگى كوپ چەمپيونات

رەتتىلىك بويىنشا 22-ءشى رەت ۇيىمداس­تىرىلىپ جاتقان الەمدىك دوپ دوداسى ءبىر اي بويى قاتاردىڭ بەس قالاسىنداعى 8 ستاديوندا وتەدى. ءبىر ايتا كەتەرلىگى, بيىلعى الەم چەمپيوناتى – كەيىنگى 20 جىلدىڭ ىشىندە ازيا قۇرلىعى مەن اراب ەلىندە, ونىڭ ىشىندە جالپى مۇسىلمان الەمىندە تۇڭعىش رەت وتەيىن دەپ وتىر. سونىمەن قاتار قاتارداعى فۋتبول ءمۋنديالى الەمنىڭ 32 قۇراماسى قاتىساتىن سوڭعى الەم چەمپيوناتى بولماق. 2017 جىلى فيفا پرەزيدەنتى دجانني ينفانتينو كەلەسى, ياعني 2026 جىلى اقش, كانادا جانە مەكسيكادا وتەتىن الەمدىك دوپ دوداسىنان باستاپ جەر-جاھاننىڭ 48 قۇراماسى قاتىساتىنىن مالىمدەگەن ەدى. ال 32 قۇراما ونەر كورسەتەتىن الەم بىرىنشىلىگى 1998 جىلدان باستالعان ەدى. ونىڭ الدىندا فيفا تەك 24 قۇرامانىڭ قاتىسۋىنا مۇمكىندىك بەرىپ كەلگەن بولاتىن.

ال بيىلعى الەم چەمپيوناتىنىڭ باس­تى ەرەكشەلىگى – ءتورت جىلدىق فۋتبول تويىنىڭ ادەتتەگىدەي جاز مەزگىلىندە ەمەس, كۇزدىڭ سوڭى مەن قىستىڭ العاشقى ايىندا وتكىزىلۋى بولىپ تۇر. بۇعان باستى سەبەپ – قاتار مەملەكەتىنىڭ كليماتتىق جاعدايى. ياعني الەمنىڭ ەڭ ىستىق ەلدەرىنىڭ قاتارىنا جاتاتىن اتالعان ەلدە جاز مەزگىلىندە اۋا رايىنىڭ ورتاشا تەمپەراتۋراسى +40°C ماڭايىندا بولادى. ال مۇنداي ىستىق اۋا رايىندا دوپ تەبۋ فۋتبولشىلاردىڭ دەنساۋلىعىنا كەرى اسەر ەتەتىنى ايتپاسا دا تۇسىنىكتى. ونىڭ ۇستىنە, تاماعى قۇرعاپ, ءالى كەتكەن فۋتبولشىلاردىڭ الاڭدا ەركىن كوسىلە المايتىنى جانە بەلگىلى. سوندىقتان ۇيىمداستىرۋشى تاراپ پەن فيفا باسشىلىعى ورتاق مامىلەگە كەلىپ, بيىلعى الەم چەمپيوناتىن ءماجبۇرلى تۇردە جاز مەزگىلىنەن قىس مەزگىلىنە اۋىستىرعان ەدى. دەگەنمەن قازىردىڭ وزىندە دوحادا اۋا رايى 25-30 گرادۋستى كورسەتىپ تۇر. وسىلايشا, قاتارداعى دۇنيەجۇزىلىك دوپ دوداسى قىس مەزگىلىندە وتكەن ءبىرىنشى الەم چەمپيوناتى رەتىندە تاريح جىلناماسىنا ەنەدى.

قاتاردان دا, قاتاردان دا قالعاندار

وكىنىشكە قاراي, جاراقاتىنا جانە ۇلتتىق قۇراماداعى باسەكەلەستىكتىڭ جو­عارى بولۋىنا بايلانىستى بيىلعى الەم چەمپيوناتىندا بىرقاتار جۇلدىز فۋتبولشىنىڭ ونەرىن تاماشالاي المايمىز. اتاپ ايتار بولساق, 2018 جىلعى الەم چەمپيوناتىندا فرانتسيا قۇراماسىنىڭ توپ جارۋىنا سۇبەلى ۇلەس قوسقان جارتىلاي قورعاۋشى ن’گولو كانتە مەن پول پوگبا, نيدەرلاند قۇراماسىنىڭ كاپي­تانى دجوردجيو ۆيننالدۋم, برا­زيليانىڭ جارتىلاي قورعاۋشىسى في­ليپپ كوۋتينو, پورتۋگاليا وكىلى ديوگو جوتا مەن گەرمانيا قۇراماسىنىڭ شابۋىلشىسى تيمو ۆەرنەردىڭ الەم چەم­پيوناتىنا قاتىسپايتىنى بەلگىلى بولدى. سونداي-اق 2012 جانە 2019 جىلدارى گەرمانيانىڭ جىل فۋتبولشىسى اتانعان ماركو رويس بيىل دا جاراقاتىنا بايلانىس­تى الەم چەمپيوناتىنا قاتىسا المايدى. جاراقاتىنا بايلانىستى بۇعان دەيىن ەكى ەۋروپا بىرىنشىلىگىنە بارا الماعان رويس ەندى ەكىنشى الەم چەمپيوناتىندا دا دوپ تەپپەيدى. ول ءدال وسىنداي سەبەپپەن 2014 جىلعى برازيلياداعى الەم بىرىنشىلىگىنەن دە تىس قالعان ەدى.

وسى ورايدا, بىلتىر ەۋروپا چەمپيوناتىندا توپ جارىپ, ءۇش رەت الەم چەمپيوناتىنىڭ كۋبوگىن باسىنان اسىرا كوتەرگەن يتاليا فۋتبولشىلارى بي­ىلعى الەم چەمپيوناتىنا جولداما الا الماعانىن ايتا كەتكەن ءجون. «سكۋادرا ادزۋررالىقتار» 2018 جىلى رەسەيدەگى الەم بىرىنشىلىگىنەن دە تىس قالعانىن جانكۇيەرلەر جاقسى بىلەدى. ال سەنەگال قۇراماسىنىڭ باس جۇلدىزى سانالعان ساديو مانەنىڭ دە الەم چەمپيوناتىنا قاتىسا المايتىنى تۋرالى اقپارات تاراعان ەدى. بىراق كەيىننەن مانەنىڭ قاتارعا باراتىنى بەلگىلى بولدى. دەگەنمەن, ول ۇلتتىق قۇراما ساپىنداعى العاشقى ماتچتارعا قاتىسا المايدى.

ستاتيستيكا مەن بولجام

بيىلعى الەم چەمپيوناتىنا قاتىساتىن قۇرامالار اراسىندا ەڭ كوپ توپ جارعانى – برازيليا (1958, 1962, 1970, 1994, 2002). فۋتبولدى ۇلتتىق ويىن رەتىندە قارايتىن وڭتۇستىك امەريكا قۇرلىعى وكىلدەرىنىڭ بىرىنشىلىكتە باس جۇلدە يەلەنبەگەنىنە دە بيىل 20 جىل بولعان ەكەن. ەكىنشى ورىنداردا گەرمانيا مەن الەم چەمپيوناتىنا قاتىسا المايتىن يتاليا تۇر. بۇل قۇرامالار برازيليالىقتاردان ءبىر كۋبوگكە قالىپ تۇر. ماسەلەن, يتاليا 1934, 1938, 1982 جانە 2006 جىلدارى, گەرمانيا 1954, 1974, 1990 جانە 2014 جىلدارى چەمپيون بولعان. ۇزدىك ۇشتىكتى ەكى رەتتەن دارا شىققان فرانتسيا (1998, 2018), ارگەنتينا (1978, 1986) جانە ۋرۋگۆاي (1930, 1950) قۇرامالارى تۇيىندەپ تۇر. ال جارىس قوجايىنى – قاتار الەم چەمپيوناتىندا بيىل العاش رەت باق سىناماق.

چەمپيونات ۋاقىتى جاقىنداعان سايىن فۋتبول ساراپشىلارى مەن جانكۇيەرلەرى بيىلعى بىرىنشىلىكتە قاي قۇراما توپ جارۋى مۇمكىن دەگەن سۇراققا جاۋاپ ىزدەپ, ءوز بولجامىن ورتاعا سالىپ جاتىر. دەگەنمەن كوپشىلىك برازيليا قۇراماسى قاتارعا وتە جوعارى دايىندىقپەن كەلە جاتقانىنا ەرەكشە نازار اۋدارىپ وتىر. شىن مəنىندە «پەنتاكومپيوندار» قۇراماسىنىڭ بار­لىق شەبىندە دە əلەمدىك دەڭگەيدەگى جۇلدىزداردىڭ شوعىرى قالىپتاسقان. قاقپاشى اليسسون بەكەردەن باستاپ, شابۋىلشى نەيمارعا دەيىنگى فۋتبولشىلاردىڭ ءبارى بابىندا. سونىمەن قاتار ماماندار مەسسي مەن رونالدۋ باستاعان ارگەنتينا مەن پورتۋگاليا قۇرامالارىنان كوپ نارسە كۇتۋگە بولاتىنىن ايتادى. ويتكەنى الەم­نىڭ قوس جۇلدىزى ءۇشىن بۇل سوڭعى الەم چەمپيوناتى. سونداي-اق 2010 جىلعى الەم چەم­پيوندارى – يسپانيانى, فۋتبولدىڭ وتانى سانالاتىن انگليانى دا نەگىزگى ۇمىت­­كەرلەر قاتارىنان شىعارۋعا بولمايدى.

حوش, سونىمەن جەكسەنبى كۇنى جالاۋى جەلبىرەيتىن الەم چەمپيوناتىنىڭ شى­مىل­دىعىن قاتار مەن ەكۆادور قۇرا­مالارى اشىپ بەرەدى. قازاقستاندىق جان­كۇيەرلەر الەم قۇرامالارىنىڭ تارتىستى كەز­دەسۋلەرىن ءبىر اي بويى «قازاقستان» جانە «قازسپورت» تەلەارنالارىنان تىكەلەي ەفيردە تاماشالاي الادى.