ءتارتىپ ساقشىلارى سوڭعى تاۋلىكتەگى جاعدايعا مونيتورينگ جۇرگىزگەن.
«16 قاراشا ساعات 08:00-دەن 17 قاراشا ساعات 08:00-گە دەيىن الماتىدا 136 جول-كولىك وقيعاسى تىركەلگەن. ونىڭ ىشىندە 26 جول اپاتىندا زارداپ شەككەندەر تىركەلگەن. ادام شىعىنى جوق», دەپ حابارلادى الماتى قالالىق پوليتسيا قىزمەتى باسقارماسىنىڭ كەزەكشى ءبولىمى.
وسىعان بايلانىستى پوليتسەيلەر الماتىلىقتارعا ۇندەۋ جاساپ, جۇرگىزۋشىلەرگە قاۋىپسىزدىك شارالارىن كۇشەيتۋگە شاقىردى.
«بۇل ۇندەۋ قاۋىپتى قوزعالىس قۇرالىن باسقاراتىن قالا جۇرگىزۋشىلەرىنە ارنالعان. ءبىز ولاردى جول قوزعالىسى ەرەجەلەرىن قاتاڭ ساقتاۋعا, جۇرگىزۋشى مادەنيەتىن تانىتىپ, زەيىندىلىگىن ارتتىرۋعا شاقىرامىز. بۇل ۇندەۋ قازىر وتە وزەكتى جانە قالا جولدارىندا قايعىلى وقيعالاردى بولدىرماۋعا سەپتىگىن تيگىزەدى», دەدى الماتى قالالىق جەرگىلىكتى پوليتسيا قىزمەتى باسقارماسىنىڭ باستىعى ەرجان ۇزاباەۆ.
سونداي-اق ول كولىكتەگى جازعى دوڭگەلەكتى قىسقىسىنا اۋىستىرۋدى ۇسىندى.
«سونىمەن قاتار اۋا رايىنىڭ ناشارلاۋىنا جانە قار جاۋعانىنا, اۋا تەمپەراتۋراسىنىڭ مينۋس دەڭگەيگە دەيىن تومەندەۋىنە بايلانىستى, جول قاۋىپسىزدىگىن قامتاماسىز ەتۋ ماقساتىندا جۇرگىزۋشىلەر مەن كولىك يەلەرىنە كولىك دوڭگەلەكتەرىن قىسقى مەزگىلگە ارنالعان دوڭگەلەكتەرگە اۋىستىرۋلارىن ۇسىنامىز», دەدى ۇزاباەۆ.
