جامبىل وبلىسى ءىىد ءباسپاسوز قىزمەتى حابارلاعانداي, «براكونەر» رەسپۋبليكالىق جەدەل-پروفيلاكتيكالىق ءىس-شاراسى بارىسىندا اقكول – اسا تاس جولىنىڭ ۋچاسكەسىندە كەشكى تەكسەرۋ كەزىندە «اۋدي-100» اۆتوكولىگى توقتاتىلدى.
«كولىك جۇرگىزۋشىسى پوليتسەيلەردى بايقاپ قالىپ, جىلدامدىقتى شەكتەن اسىرىپ جىبەرگەنى ءوز الدىنا كۇدىك تۋدىردى. كولىكتى توقتاتىپ, ءتىنتۋ كەزىندە ارتقى ورىندىقتان 147 كەلى زاڭسىز اۋلانعان بالىق تابىلدى», دەدى جامبىل وبلىسى ءىىد ءباسپاسوز قىزمەتىنىڭ جەتەكشىسى گۇلسارا مۇحتارقۇلوۆا.
ۇستالعان كولىك يەسى بالىقتى 38 000 تەڭگەگە ساتىپ العانىن ايتىپ, قايتا ساتۋدى جوسپارلاعان.
«ەر ادام جابايى جانۋارلار مەن وسىمدىكتەر تۇرلەرىن زاڭسىز ساتىپ الۋ, وتكىزۋ, تاسىمالداۋ بويىنشا اكىمشىلىك جاۋاپكەرشىلىككە تارتىلدى. سالىنعان ايىپپۇل مولشەرى 30 630 تەڭگەنى قۇرادى», دەپ ءتۇسىندىردى قۇقىق قورعاۋ ورگانى.
مۇنداي قىلمىس ءۇشىن جەكە تۇلعالارعا - 10 اەك (30 063 تەڭگە), شاعىن كاسىپكەرلىك سۋبەكتىلەرىنە - 30 اەك (91 890 تەڭگە), ورتا كاسىپكەرلىك سۋبەكتىلەرى ءۇشىن - 10 اەك مولشەرىندە ايىپپۇل تۇرىندە جاۋاپكەرشىلىك كوزدەلگەن. ءىرى كاسىپكەرلىك سۋبەكتىلەرىنە 70 اەك (214 410 تەڭگە) كولەمىندە ايىپپۇل سالىنۋى مۇمكىن.
