الماتى مەكتەپتەرىندە ورىن تاپشىلىعى جوعارى

«الماتى تۇرعىندارىنىڭ سانى جىل سايىن ءوسىپ جاتىر. سونىڭ 60 پايىزى كوشى-قون ارقىلى جۇزەگە اسادى. بۇل جاعداي قالانىڭ الەۋمەتتىك ينفراقۇرىلىمىنا ەلەۋلى اسەر ەتەدى. قازىر قالاداعى بالاباقشالاردا 19 مىڭنان استام ورىن جەتپەيدى. بۇل تاپشىلىقتى ازايتۋ ءۇشىن مەملەكەتتىك جانە جەكە مەنشىك بالاباقشالاردى شۇعىل تۇردە سالۋ كەرەك»، دەدى مەملەكەت باسشىسى.

سونداي-اق ول اكىمدىككە ۇشتەن التى جاسقا دەيىنگى بالالاردىڭ 97 پايىزىن مەكتەپكە دەيىنگى بىلىممەن قامتۋدى تاپسىردى.

«بالالاردى مەملەكەتتىك ءبىلىم تاپسىرىسى ارقىلى مەكتەپكە دەيىنگى جەكە ءبىلىم بەرۋ مەكەمەلەرىنە ورنالاستىرۋ قاجەت. بۇل مىندەتتى 2025 جىلعا دەيىن ورىنداۋ كەرەك. وقۋشىلاردىڭ سانى جىل سايىن ورتا ەسەپپەن 12-15 مىڭعا ارتىپ كەلەدى. سول سەبەپتى، مەكتەپتەردە ورىن تاپشىلىعى جوعارى. قازىر 29 مىڭنان استام وقۋشىعا ورىن جەتپەيدى. بۇل احۋال وقۋشىلاردىڭ ساپالى ءبىلىم الۋىنا كەرى اسەر ەتەدى»، دەدى پرەزيدەنت.

ونىڭ ايتۋىنشا، الماتىدا الداعى ەكى جىلدا «جايلى مەكتەپ» جوباسىمەن 37 مىڭ ورىندىق 22 مەكتەپ سالۋ كەرەك. باستى مىندەت – 2030 جىلعا قاراي ءبىر اۋىسىممەن وقىتۋعا تولىق كوشۋ.

«ىشكى ميگراتسيا قارقىندى دامىپ جاتقاندىقتان، وسىنداي ماسەلەلەر تۋىنداپ وتىر. الايدا، جاس ۇرپاقتى ساپالى بالاباقشا، مەكتەپپەن قامتاماسىز ەتۋ – ءبىزدىڭ مىندەتىمىز. سوندىقتان بۇل تاپسىرمالار مىندەتتى تۇردە تولىق ورىندالۋى كەرەك»، دەدى ق.توقاەۆ.