قوس تاراپ قازاقستاندا تەمىرجول جانە قالالىق قوعامدىق كولىك شىعارۋ, تەحنيكالىق قىزمەت كورسەتۋ جانە جاڭعىرتۋ جونىندەگى جوبالاردى ىسكە اسىرۋ ماسەلەلەرىن تالقىلادى.
ءا.سمايىلوۆ كومپانيانىڭ ەلىمىزدە ناقتى جوبالاردى جۇزەگە اسىراتىنىنا سەنىمدى, ويتكەنى قازاقستاندا ينۆەستورلار ءۇشىن ءتۇرلى سالىقتىق جانە كەدەندىك جەڭىلدىكتەر قاراستىرىلعان.وسى ورايدا ول لوكاليزاتسياسى جوعارى جانە تولىق تسيكلدى ءوندىرىس اشۋ ماسەلەسىن قاراستىرۋدى ۇسىندى.
«قازاقستان ۇكىمەتى ماشينا جاساۋ سالاسىنا ەرەكشە كوڭىل بولەدى, سوندىقتان ءبىز شەتەلدىك ارىپتەستەرمەن ىنتىماقتاستىق ورناتۋعا مۇددەلىمىز. سونداي-اق بىرلەسكەن جوبالاردى ىسكە اسىرۋعا قازاقستاندىق ماشينا جاساۋ كاسىپورىندارىن تارتۋعا بولادى دەپ سانايمىز», دەدى ءاليحان سمايىلوۆ.
ول Skoda Transportation كومپانياسىمەن ءوزارا ءتيىمدى ىقپالداستىقتى پىسىقتاۋ ءۇشىن بارلىق مۇددەلى مەملەكەتتىك ورگاندار مەن ۇيىمداردىڭ قاتىسۋىمەن ارنايى جۇمىس توبى قۇرىلعانىن اتاپ ءوتتى.
ال ديدە پفلەگەر كومپانيا جاڭا نارىقتى باعىندىرۋعا دايىن ەكەنىن, سوندىقتان ءوز ءوندىرىسىن دامىتۋ ءۇشىن قازاقستاندى پەرسپەكتيۆتى سەرىكتەس رەتىندە قاراستىرىپ وتىرعانىن اتاپ ءوتتى.
كەزدەسۋدە تاراپتار ءوزارا ءتيىمدى جوبالاردى ازىرلەۋ بويىنشا بەلسەندى جۇمىستى جالعاستىرۋعا مۇددەلى ەكەنىن ءبىلدىردى.
ايتا كەتەيىك, چەحيالىق Skoda Transportation ماشينا جاساۋ كومپانياسى – ءارتۇرلى كولىك تۇرلەرىن, ونىڭ ىشىندە مەترو, ترامۆاي, تروللەيبۋس, تەمىرجول ۆاگوندارى, ەلەكتر پويىزدارى مەن ەلەكتر اۆتوبۋستارىن شىعاراتىن جەتەكشى ەۋروپالىق وندىرۋشىلەردىڭ ءبىرى. كاسىپورىن Skoda Holding-ءتىڭ قۇرامىنا كىرەدى.
