ۇلتتىق كومپانيانىڭ اكتسيالارىن ساتىپ الۋعا ءوتىنىم بەرۋ 9 قاراشادا باستالدى. ءوتىنىم بەرۋ جەكە ينۆەستورلار ءۇشىن 2 جەلتوقسانعا دەيىن, ال ينستيتۋتسيونالدى ينۆەستورلار ءۇشىن 30 قاراشاعا دەيىن جالعاسادى.
بۇل جەردەگى جەكە ينۆەستور دەگەنىمىز – ەلىمىزدىڭ كەز كەلگەن تۇرعىنى. ياعني 18 جاستان اسقان ەل ازاماتتارىنىڭ ءبارى ءىرو-عا قاتىسا الادى. دەمەك, بۇقارا حالىقتىڭ 2 جەلتوقسانعا دەيىن ءوتىنىم بەرۋگە مۇمكىندىگى بار.
ال ءوتىنىم بەرۋ ءۇشىن «قازپوشتانىڭ» بولىمشەلەرىنە بارۋ كەرەك. رەسپۋبليكا بويىنشا ۇلتتىق پوشتا وپەراتورىنىڭ 1 مىڭ بولىمشەسى وتىنىمدەردى قابىلداۋعا ءازىر. ايتپاقشى, ءىرو-عا قاتىستى ءوتىنىم قابىلدايتىن بولىمشەلەردىڭ ءتىزىمى «قازپوشتانىڭ» رەسمي سايتىنىڭ (post.kz) «ينۆەستيتسيالار» دەگەن بولىمىندە ناقتى كورسەتىلگەن. سول جەرگە ءوتىپ, تانىسۋعا بولادى. بۇل ءىرو-نى ساتىپ الۋعا ءوتىنىم بەرۋدىڭ ءبىرىنشى جولى.
ەكىنشى جول ءسال جەڭىلدەۋ. ويتكەنى ەشقايدا بارۋدىڭ قاجەتى جوق. تەلەفونىڭىزعا Tabysapp قوسىمشاسىن جۇكتەپ الىپ, ساۋدانى ءارى قاراي جالعاستىرا بەرەسىز.
ايتپاقشى, بەرىلگەن ءوتىنىمدى 2 جەلتوقسانعا دەيىن وزگەرتۋگە نەمەسە ودان باس تارتۋعا بولادى.
وتىنىمدەر قابىلدانىپ بولعان سوڭ, «قازمۇنايگاز» وتىنىمدەردى ماقۇلداۋ تۋرالى شەشىم قابىلدايدى. ەگەر ەشقانداي كەدەرگى تۋىنداماسا, اكتسيا شامامەن 7 جەلتوقسانعا قاراي شوتىڭىزعا تۇسەدى.
ءىرو-عا قاتىستى سۇراقتارعا جاۋاپ بەرۋ ءۇشىن جەدەل جەلى (8 (800) 004 03 15) جۇمىس ىستەيدى. قوڭىراۋ شالۋ تەگىن.
ەسكە سالا كەتەيىك, «قازمۇنايگازعا» 551 698 745 اكتسيا تيەسىلى. ۇلتتىق كومپانيا وسىنىڭ 30 505 974-ءسىن ءىرو ارقىلى ساتپاق. بۇل اكتسيالاردىڭ جالپى سانىنىڭ شامامەن 5 پايىزىنا تەڭ.
ءىرو-عا شىعارىلعان 1 اكتسيانىڭ باعاسى – 8 406 تەڭگە.
IPO (Initial Public Offering) دەگەنىمىز – كومپانيا اكتسيالارىنىڭ قور بيرجاسىنا شىعارىلۋى. ياعني كومپانيا ينۆەستورلاردىڭ اقشاسىنا ايىرباستاۋ ءۇشىن وزىنە تيەسىلى اكتسيالاردىڭ ءبىر بولىگىن ساتىلىمعا شىعارادى. وسىلايشا, كومپانيا اكتسيالارىن ساتىپ قوسىمشا قارجى تارتادى. ال اكتسيا ساتىپ العان ينۆەستورلار كومپانيانىڭ مينوريتارلىق اكتسيونەرىنە اينالادى جانە ودان تابىس تابۋعا مۇمكىندىك بار.
اكتسيادان تابىس تابۋدىڭ ەكى جولى بار. بىرىنشىدەن, ءىرو كەزىندە كومپانيا اكتسيالارىن ساتىپ الۋ ارزانعا تۇسەدى. ايتپەسە, بيرجادا ساتىلاتىن اكتسيا باعاسى الدەقايدا قىمبات. ەكىنشىدەن, اكتسيانى ساتپاي, ديۆيدەند تولەيتىن ۋاقىتتى كۇتۋ كەرەك. ديۆيدەند دەگەنىمىز – كومپانيا اكتسيونەرلەرىنە تۇسەتىن تابىستىڭ ءبىر بولىگى.
«قازمۇنايگاز» ەلىمىزدەگى قارجىلىق جاعدايى تۇراقتى ءىرى كومپانيا سانالادى. سوندىقتان ول اكتسيونەرلەرىنە تابىس اكەلۋى ابدەن مۇمكىن. ماسەلەن, 2021 جىلى ۇلتتىق كومپانيا ءوز اكتسيونەرلەرىنە 49,9 ملرد تەڭگە كولەمىندە ديۆيدەند تولەدى. جالپى, بىلتىر كومپانيانىڭ تازا تابىسى 1 197 ملرد تەڭگەنى قۇرادى.
– «قازمۇنايگازدىڭ» ءىرو-سى تابىستى بولادى دەگەن سەنىمدەمىن. ويتكەنى, كومپانيا ۇلتتىق مارتەبەگە يە ءارى «سامۇرىق-قازىناعا» قاراستى ماڭىزدى كومپانيالاردىڭ ءبىرى. ونىڭ ۇستىنە تانىمال كومپانيا. وسىنىڭ ءبارى بەلگىلى ءبىر دەڭگەيدە وڭ ناتيجە بەرەدى. دەگەنمەن كومپانيانىڭ كىرىستىلىگى مۇناي باعاسىنا باعىنىشتى. سوندىقتان وسى جاعىن ەسكەرۋ كەرەك. مۇنايدىڭ ءبىر باررەلى 40 دوللارعا ساتىلسا دا, كومپانيانىڭ تابىسى ورتايمايدى. سوندىقتان حالىقتىڭ جاقسى تابىس تاباتىن مۇمكىندىگى تۋىپ تۇر. ال «قازمۇنايگازدىڭ» ءىرو-عا شىعۋى كومپانيا جۇمىسىنىڭ اشىقتىعىن قامتاماسىز ەتەدى. بۇل ءوز كەزەگىندە ۇلتتىق كومپانيانىڭ باسقارۋ ساپاسىن جاقسارتادى, – دەيدى Freedom Finance Global كومپانياسىنىڭ ساراپشىسى دانيار ورازباەۆ.
