تاريحقا كوز جۇگىرتەر بولساق, قازاقستان مەن وزبەكستان قۇرامالارى بۇگىنگە دەيىن ءتورت مارتە رەسمي ماتچتا كەزدەسىپ, ەكى رەت حالىقارالىق تۋرنيرلەردە جولدارى تۇيىسكەن ەكەن. سول التى ماتچتىڭ ەكەۋىندە – وزبەكستان, بىرەۋىندە قازاقستان قۇراماسى جەڭىسكە جەتسە, قالعان ءۇش ويىن تەڭ ەسەپپەن اياقتالعان.
جالپى, ەكى ەل فۋتبولشىلارى ەڭ العاش رەت وسىدان 30 جىل بۇرىن, ياعني 1992 جىلدىڭ 16 شىلدەسىندە الماتىداعى «ورتالىق» ستاديوندا كەزدەستى. ورتالىق ازيا كۋبوگى جولىنداعى جارىستىڭ قازاقستاندا وتكەن ءبىرىنشى ماتچىندا جەرلەستەرىمىز رۋسلان دۇزمامبەتوۆتىڭ جالعىز گولىنىڭ ارقاسىندا جەڭىسكە جەتتى. اراعا ءۇش اي سالىپ 1992 جىلدىڭ قازانىندا تاشكەنتتە ۇيىمداستىرىلعان قارىمتا كەزدەسۋدە ەكى ەلدىڭ فۋتبولشىلارى تەڭ ناتيجەگە رازى بولىستى – 1:1. بۇل ماتچتا دا قازاقستان قۇراماسىنان رۋسلان دۇزمامبەتوۆ مەرگەندىگىمەن كوزگە تۇسسە, الاڭ يەلەرىنەن ازامات ابدۋرايموۆ پەنالتيدەن گول سوقتى.
اراعا ەكى جىل سالىپ 1994 جىلى قازاقستان مەن وزبەكستان «وزبەكستان تاۋەلسىزدىگى كۋبوگى» دوداسىندا تاعى دا ءبىر-بىرىنە قارسىلاس اتانىپ, بۇل جولعى كەزدەسۋ جارىس قوجايىندارىنىڭ جەڭىسىمەن اياقتالدى. تاشكەنتتەگى «پاحتاكور» ستاديونىندا وتكەن ماتچ تاعدىرىن جالعىز پەنالتي شەشىپ كەتتى – 1:0. 11 مەترلىك ايىپ دوبىن وزبەكستان قۇراماسىنىڭ قورعاۋشىسى الەكساندر تيحونوۆ ءساتتى ورىندادى.
1997 جىلى قازاقستان مەن وزبەكستان فۋتبولشىلارى 1998 جىلى فرانتسيادا ۇيىمداستىرىلعان الەم چەمپيوناتىنىڭ ەكىنشى ىرىكتەۋ كەزەڭىندە ءبىر توپتا باق سىنادى. سول جىلعى 20 قىركۇيەكتە وتكىزىلگەن الاتاۋ باۋرايىنداعى ءبىرىنشى كەزدەسۋدە قۇرامالار ەكىنشى رەت 1:1 ەسەبىمەن تەڭ تارقاستى. قازاقستان قۇراماسى ساپىنان ەلىمىزدىڭ ەڭ ۇزدىك سۇرمەرگەنى رۋسلان بالتيەۆ گول سوقسا, وزبەكستاننىڭ ماقتانىشى ماكسيم شاتسكيح تارازى باسىن تەڭەستىرگەن-ءدى.
اراعا 35 كۇن سالىپ تاشكەنتتەگى قارىمتا كەزدەسۋدە الاڭ يەلەرى ءوز جانكۇيەرلەرىنىڭ الدىندا ءىرى ەسەپپەن جەڭىسكە جەتتى – 4:0. كەزدەسۋدە يگور شكۆىرين ءدۋبلدىڭ اۆتورى اتانسا, اندرەي فەدوروۆ پەن وزبەكستاننىڭ داڭقتى فۋتبولشىسى ميرجالول قاسىموۆ ءبىر-ءبىر مارتە مەرگەندىگىمەن كوزگە ءتۇستى.
كەيىننەن قازاقستان مەن وزبەكستان قۇراماسى اراعا 10 جىل سالىپ 2007 جىلى قايتا جولىقتى. بۇل جولى شىمكەنتتە ۇيىمداستىرىلعان «الما-تۆ» كۋبوگىندە باس جۇلدەنى ساراپقا سالدى. جەرلەستەرىمىز سوڭعى شەشۋشى ماتچتا وڭتۇستىكتەگى كورشىمىزبەن 1:1 ەسەبىمەن تەڭ ءتۇستى. دەگەنمەن وتانداستارىمىز تەڭ ناتيجەگە قاراماستان, حالىقارالىق جارىستىڭ جەڭىمپازى اتاندى. ويىننىڭ 13-مينۋتىندا مۇرات سۇيماعامبەتوۆ ەسەپ اشسا, كەزىندە «اقتوبە», «ورداباسى» ساپىندا ويناعان وزبەكستاندىق شابۋىلشى الەكساندر گەينريح تارازى باسىن تەڭەستىرگەن بولاتىن.
وسى كەزدەسۋلەردىڭ ستاتيستيكاسىنا زەر سالار بولساق, التى ماتچتىڭ ۇشەۋىن تاشكەنتتە وتكىزگەن قازاقستان قۇراماسى بىردە-ءبىر ماتچتا جەڭىسكە جەتپەگەن ەكەن. قازاقستان قۇراماسىنىڭ فۋتبولشىلارى التى ويىندا قارسىلاستارى قاقپاسىنا نەبارى ءتورت گول سوقسا, ءوز قاقپاسىنا جەتى گول وتكىزىپ العان. تاشكەنتتەگى ءتورتىنشى كەزدەسۋ قازاقستان مەن وزبەكستان اراسىنداعى جەتىنشى ماتچ بولماق. الا تاقيالى اعايىنداردا قاي سان قادىرلى ەكەنىن ءبىز بىلمەيمىز, بىلەتىنىمىز قازاقتار ءۇشىن جەتى – وتە قاسيەتتى سان. بالكىم, وسى جەتىنشى كەزدەسۋدە جەرلەستەرىمىز وزبەكستاندا جەڭىسكە جەتىپ قالار.
قازاقستان قۇراماسى كەيىنگى جەتى ماتچتىڭ بەسەۋىندە جەڭىسكە جەتسە, وزبەكستان دا سوڭعى سەگىز كەزدەسۋىنىڭ التاۋىندا جەڭىس تويىن تويلاعان. جەرلەستەرىمىز اقىرعى بەس ويىندا ورتا ەسەپپەن 1,20 گول سوقسا, ءوز قاقپاسىنا ءدال سونداي گول وتكىزىپ العان. وزبەكستان قۇراماسى بۇل ستاتيستيكا بويىنشا ءبىرشاما الدا تۇر. ماسەلەن, ولار سوڭعى بەس ويىندا قارسىلاستارىنىڭ قاقپاسىنا 2.40 گول سوقسا, ءوز قاقپاسىنا 0,40 گول وتكىزىپ العان. ماگومەد اديەۆ شاكىرتتەرى كەيىنگى جەتى ويىننىڭ بەسەۋىندە گول سوقسا, وزبەكستان فۋتبولشىلارى جەتى ماتچتىڭ جەتەۋىندە دە مەرگەندىك تانىتقان ەكەن.
ەكى ەل قانداي قۇراممەن وينايدى؟
قازاقستان ۇلتتىق قۇراماسىنىڭ جاتتىقتىرۋشىلار قۇرامى بۇل كەزدەسۋگە 25 ويىنشى شاقىرعان. ءبىر اتاپ وتەرلىگى, ماگومەد اديەۆ دوپينگ داۋىنا بايلانىستى ەكى جىل فۋتبولدان الىستاتىلعان باۋىرجان يسلامحاندى دا ۇلتتىق قۇراماعا شاقىرتقان. يسلامحاننىڭ ديسكۆاليفيكاتسياسى قاراشانىڭ العاشقى اپتاسىندا اياقتالعان ەدى.
قاقپاشىلار: يگور شاتسكي («شاحتەر»), دانيل ۋستيمەنكو («قايرات»), الەكساندر زارۋتسكي («استانا»);
قورعاۋشىلار: سەرگەي مالىي, الەكساندر ماروچكين, باعدات قايىروۆ (بارلىعى – «توبىل»), ابزال بەيسەبەكوۆ, ميحايل گابىشەۆ, تيمۋر دوسماعامبەتوۆ (بارلىعى – «استانا»), تەمىرلان ەرلانوۆ, دميتري شومكو, (ەكەۋى دە – «اقتوبە»), نۇرالى ءالىپ («زەنيت», رەسەي), سۇلتانبەك استانوۆ («قايرات»);
جارتىلاي قورعاۋشىلار: اسحات تاعىبەرگەن («توبىل»), اسلان داراباەۆ, يسلامبەك قۋات (ەكەۋى دە – «استانا»), باقتيەر زاينۋتدينوۆ (تسسكا, رەسەي), رامازان ورازوۆ, ماكسيم سامورودوۆ (ەكەۋى دە – «اقتوبە»), ەلحان استانوۆ («ورداباسى»), باۋىرجان يسلامحان (ەركىن ويىنشى);
شابۋىلشىلار: ابات ايىمبەتوۆ («استانا»), ابىلايحان جۇمابەك («تاراز»), ايبار جاقسىلىقوۆ («توبىل»), ارتۋر شۋشەناچەۆ («قايرات»);
ال وزبەكستان قۇراماسىن جاتتىقتىراتىن 59 جاستاعى سلوۆەنيالىق مامان سرەچكو كاتانەتس مىنا فۋتبولشىلارعا سەنىم ارتىپ وتىر. ول بۇل ماتچقا ءارىسى يتاليادان, بەرىسى ساۋد ارابياسىنان ويىنشى شاقىرتقان ەكەن.
ولار: قاقپاشىلار: ابدۋۆوحيد نەماتوۆ («ناساف»), بوتيرالي ەرگاشەۆ (اگمك), ۋتكير يۋسۋپوۆ («ناۆباحور»). قورعاۋشىلار: رۋستام اشۋرماتوۆ («ناۆباحور»), فاررۋح سايفيەۆ («پاحتاكور»), حۋسنيددين اليكۋلوۆ («ناساف»), حادجياكبار اليجونوۆ («پاحتاكور»), اليبەك داۆرونوۆ («ناساف»), ۋماربەك ەشمۋرودوۆ («ناساف»), ابدۋللا ابدۋللاەۆ (اگمك), شەرزود ناسرۋللاەۆ («ناساف»), ديلشود سايتوۆ («ناساف»).
جارتىلاي قورعاۋشىلار: وديل حامروبەكوۆ («پاحتاكور»), اكمال موزگوۆوي («ناساف»), وتابەك شۋكۋروۆ («فاتيح كاراگيۋمريۋك», تۇركيا), ازيز تۋرگۋنبوەۆ («پاحتاكور»), ويبەك بوزوروۆ («ناساف»), دجالوليددين ماشاريپوۆ ء(«ال-ناسر», ساۋد ارابياسى), ساردور سوبيرحۋدجاەۆ («پاحتاكور»), حوجيمات ەركينوۆ («تورپەدو», رەسەي), دوستونبەك حامداموۆ («پاحتاكور»), وستون ۋرۋنوۆ (كلۋبسىز), رۋسلانبەك دجيانوۆ («وليمپيك»). شابۋىلشىلار: ەلدور شومۋرودوۆ («روما», يتاليا), يگور سەرگەەۆ («توبىل», قازاقستان), بوبير ابدۋحوليكوۆ («ەنەرگەتيك-بگۋ», بەلارۋس).
