«بيىل جول-كولىك اپاتىنان 2 مىڭنان استام ادام قازا تاپتى, 15 مىڭنان استام ادام ءارتۇرلى اۋىرلىقتاعى جاراقات الدى. قاراشا ايىنىڭ وزىندە 300-دەن استام جازاتايىم وقيعا ورىن الىپ, 60-قا جۋىق ادام قازا تاپقان, 400-گە جۋىق ادام جاراقات العان», دەدى قر ءىىم-ءنىڭ وكىلى شۇعىلا تۇرلىبەك.
ىشكى ىستەر مينيسترلىگى جامبىل وبلىسىندا بولعان جانتۇرشىگەرلىك وقيعانى ەسكە سالدى. Audi 100 كولىگى قاۋىپسىزدىككە كوز جەتكىزبەي, تەمىر جولعا شىعىپ كەتكەن. سالدارىنان جولاۋشىلار پويىزىمەن سوقتىعىسىپ, جۇرگىزۋشى مەن بەس جولاۋشى وقيعا ورنىندا كوز جۇمدى. قوستاناي وبلىسىندا Chevrolet كولىگىنىڭ جۇرگىزۋشىسى رۋلگە يە بولا الماي, ارىققا اۋدارىلىپ قالدى. سالدارىنان ءۇش ادام قازا تاۋىپ, بىرەۋى جاراقات الدى.
ىشكى ىستەر مينيسترلىگى قازاقستاندىقتاردى جولدا ءجۇرۋ ەرەجەلەرىن قاتاڭ ساقتاۋعا شاقىرادى.
«قاراشا ايىنان باستاپ اۋا رايى كۇرت ناشارلادى. ادامدار بۇل اۋا رايىنا بىردەن ۇيرەنە المايتىندىقتان, قىسقى جولدا (مۇزدا, جاڭا تۇسكەن قاردا) كولىك جۇرگىزگەن كەزدە اۋا رايىنىڭ اسەرىنە نازار اۋدارىپ, ساق بولۋ كەرەك. كولىك كەنەت توقتاي المايتىندىقتان, جاياۋ جۇرگىنشىلەر اينالاعا ەرەكشە نازار اۋدارعانى ءجون. سوندىقتان جولدى كەسىپ وتكەندە جۇرگىزۋشىنىڭ جول بەرىپ, سودان كەيىن عانا ءجۇرۋدى جالعاستىرۋىن قاداعالاۋ كەرەك. سونىمەن قاتار قۇلاققاپ, تەلەفون, كاپيۋشون ادامنىڭ زەيىنىنە ۇلكەن كەدەرگى كەلتىرەتىنىن ەسكەرۋ قاجەت», دەدى ش.تۇرلىبەك.
سونداي-اق زاڭناماعا سايكەس قىسقى دوڭگەلەكتەرمەن جابدىقتالماعان كولىكتەردى قىستا پايدالانۋعا تىيىم سالىنعانىن ەسكە ءتۇسىردى. كولىك يەلەرى اۋا-رايىنىڭ وزگەرۋىن مۇقيات قاداعالاپ, ناشارلاعان جاعدايدا ەلدى مەكەندەردەن تىس جەرلەردە ءجۇرۋدى شەكتەۋى كەرەك», دەدى ءىىم وكىلى.
