قىلمىستىق كودەكستىڭ 273-بابىنا سايكەس تەرروريزم اكتىسى تۋرالى جالعان حابارلاما تاراتقانى ءۇشىن بەس مىڭ ايلىق ەسەپتىك كورسەتكىشكە دەيىنگى مولشەردە ايىپپۇل (بۇگىنگى كۇنى – 14,5 ملن تەڭگە) نە سول مولشەردە تۇزەۋ جۇمىستارى تۇرىندەگى جازا, سونداي-اق بەس جىلعا دەيىنگى مەرزىمگە شەكتەۋ نەمەسە باس بوستاندىعىنان ايىرۋ كوزدەلگەن.
جىل باسىنان بەرى ەلىمىزدە وسىنداي فاكتىلەر بويىنشا 138 قىلمىستىق ءىس قوزعالسا, 20 قىلمىستىق ءىس سوتقا جىبەرىلگەن. وسى قىلمىسى ءۇشىن 34 ادام ۇستالىپ, ونىڭ 17-ءسى جازانىڭ ءارتۇرلى تۇرلەرىنە كەسىلدى. ونىڭ ىشىندە, باس بوستاندىعىنان ايىرىلعان – 8, باس بوستاندىعى شەكتەلگەن – 5, شارتتى تۇردەگى جازاعا تارتىلعان 2 ادام بار. تاعى ءبىر ادامعا ايىپپۇل سالىنعان.
ايىپتالۋشىلاردىڭ بىرىنە سوت شەشىمىمەن مەديتسينالىق سيپاتتاعى ماجبۇرلەۋ شارالارى قولدانىلدى. سونداي-اق قىلمىستىق جاۋاپتىلىق جاسىنا جەتپەگەن ءبىر ءجاسوسپىرىمنىڭ اتا-اناسىنا ايىپپۇل سالىنىپ, ولار اكىمشىلىك جاۋاپكەرشىلىككە تارتىلدى. بۇل قىلمىس ءۇشىن 14 جاسقا تولعان جەتكىنشەكتەر قىلمىستىق جاۋاپكەرشىلىككە تارتىلادى, سوندىقتان بۇل ەسكەرتۋدى مەكتەپ وقۋشىلارى دا ەستە ۇستاۋى كەرەك.
سونىمەن قاتار سوت شەشىمى نەگىزىندە شىعىندار مەن وسىنداي حابارلامادان كەلتىرىلگەن بارلىق زالال وتەلۋگە ءتيىس. ارنايى قىزمەتتەردىڭ مۇنداي جالعان شاقىرۋلارعا ءبىر شىعۋىنا 300 مىڭ تەڭگەگە دەيىنگى قارجىسى جۇمسالادى, ال كاسىپورىندار مەن ۇيىمداردىڭ توقتاپ قالۋىنان كەلگەن زالال ميلليونداعان تەڭگەمەن ەسەپتەلەدى. ەگەر مۇنداي ارەكەتتەردى كامەلەتكە تولماعاندار جاساسا, زالالدى وتەۋ ولاردىڭ اتا-انالارىنا نەمەسە زاڭدى وكىلدەرىنە جۇكتەلەتىنىن اتاپ وتكەن ءجون.
