بۇل جوبانىڭ باستاماشىسى – فرانتسۋز ءتىلى مۇعالىمدەرىنىڭ حالىقارالىق فەدەراتسياسى پەداگوگيكالىق يننوۆاتسيالار قورى مەن فرانكوفونيا ۇيىمى. قازاقستان فرانتسۋز ءتىلى مۇعالىمدەرى قاۋىمداستىعىنىڭ پرەزيدەنتى ايگۇل دوششانوۆا اتاپ وتكەندەي, ەكولوگيالىق بەلسەندىلىكتى ارتتىرۋ ماقساتىندا قازىر ەلىمىزدىڭ مەكتەپتەرىمەن, جوعارى وقۋ ورىندارىمەن تىعىز بايلانىس ورناتىلعان. اكتسيا اياسىندا وسى كەزگە دەيىن قورشاعان ورتانى, تابيعاتتى قورعاۋعا بايلانىستى كونكۋرستار, سپورتتىق ويىندار ءوتتى, لوگوتيپتەر ازىرلەندى. رەسپۋبليكالىق دەڭگەيدە ۇيىمداستىرىلعان اكتسيانىڭ قورىتىندىسى قاراشا ايىندا استانادا جاريالانادى.
«قاۋىمداستىق بۇگىندە فرانتسۋز ءتىلى مۇعالىمدەرىنە وقۋ-ادىستەمەلىك قولداۋ كورسەتۋ ماقساتىندا كوپتەگەن يگى جوبانى ىسكە اسىرىپ كەلەدى. بيىل فرانتسۋز ءتىلىنىڭ حالىقارالىق فەدەراتسياسى باستاماشى بولعان كليماتتىق وزگەرىستەر مەن تۇراقتى دامۋعا بايلانىستى وتكەن كونكۋرستا قازاقستان فرانتسۋز ءتىلى مۇعالىمدەرى قاۋىمداستىعى جەڭىمپاز اتاندى. 100-دەن استام مەملەكەت قاتىسقان حالىقارالىق جوبادا جەڭىپ العان قارجىلاي سىيلىققا فرانتسۋز ءتىلىنىڭ مۇعالىمدەرىنە ارنايى پلاتفورمالار ساتىپ الىندى. ەندىگى كەزەكتە بۇل پلاتفورمالار قازاقستاندىق وقىتۋشىلار ءۇشىن اۋقىمدى باعدارلامالارىمەن ەرەكشەلەنەتىن بولادى», دەپ اتاپ ءوتتى ا.دوششانوۆا.
«فرانتسۋز ءتىلىن ۇيرەنەمىز جانە ەكوبەلسەندى بولامىز» اكتسياسىنىڭ مەملەكەت باسشىسى قاسىم-جومارت توقاەۆ ءبىلىم العان ءىلياس ەسەنبەرلين اتىنداعى №25 مەكتەپ-گيمنازياسىندا ءوتۋىنىڭ دە وزىندىك سەبەبى بار. مەكتەپتە فرانتسۋز ءتىلى 1-سىنىپتان باستاپ وقىتىلادى. اكتسيا بارىسىندا وقۋشىلار وزدەرى دايىنداعان ارنايى جوبالاردى, پرەزەنتاتسيالار مەن فوتوكوللاجداردى فرانتسۋز تىلىندە تانىستىرىپ, تابيعاتتى ايالاۋ, جان-جانۋارلاردى قورعاۋ, تازالىقتى ساقتاۋ ارقىلى ادامزات يگىلىگىنە قىزمەت ەتۋگە بايلانىستى جارقىن ويلارىن ورتاعا سالدى. فرانتسۋز تىلىندە ءان ايتىپ, ءوز ونەرلەرىن كورسەتتى.
الماتى قالاسى ءبىلىم باسقارماسىنىڭ قولداۋىمەن وتكەن ءىس-شارا بارىسىندا فرانتسيانىڭ الماتى قالاسىنداعى باس كونسۋلى فابريس نەۆە وقۋشىلاردىڭ ەكولوگيالىق جوبالار جاساۋداعى بەلسەندىلىگىنە ريزاشىلىعىن ءبىلدىردى. باس كونسۋلدىڭ ايتۋىنشا, بۇگىندە ەكى ەل اراسىنداعى ءبىلىم بەرۋ ىنتىماقتاستىعى جالعاسىن تاۋىپ, ءبىلىم الماسۋ جوبالارى اياسىندا جۇزەگە اسىپ كەلەدى. وسىعان وراي وننان اسا فرانتسۋزدىق وقۋشى №25 مەكتەپكە كەلىپ, قازاقستاننىڭ تىنىس-تىرشىلىگىمەن, سالت-داستۇرىمەن تانىسسا, ەندىگى كەزەكتە الماتىلىق وقۋشىلاردىڭ فرانتسياعا ساياحاتى جوسپارلانىپ وتىر. سونداي-اق «داۋن» سيندرومى, ەستۋ جانە تىرەك-قيمىل اپپاراتى بۇزىلعان بالالارعا قولداۋ كورسەتۋ ماقساتىندا فرانتسيادان قازاقستانعا ۆەلوسيپەدپەن كەلگەن ساياحاتشى جۇپ ەميلي مەن دەۆيدتىڭ ساپارىن ەسكە سالعان باس كونسۋل بۇل باعىتتا مەكتەپ وقۋشىلارى, جوعارى وقۋ ورىندارىنىڭ ستۋدەنتتەرىمەن كەزدەسۋلەر ۇيىمداستىرىلعانىن اتاپ ءوتتى. بۇگىندە فرانتسيانىڭ ەكولوگيالىق ساياساتتاعى جوبالارى نازار اۋدارۋدى قاجەت ەتەدى. ءپاريجدىڭ كليماتتىق كەلىسىمدەرى ەكولوگيالىق قاۋىپسىزدىك سالاسىنداعى كوپتەگەن جوبادا تيىمدىلىگىن كورسەتىپ وتىر. وسى ورايدا باس كونسۋل مەكتەپ وقۋشىلارىنىڭ, جاستاردىڭ عالامدىق كليماتتىق وزگەرىستەر كەزەڭىندە ءوز اۋماعىندا جۇزەگە اسىرىپ وتىرعان جوبالارىنا قولداۋ كورسەتۋىنىڭ ماڭىزىن اتاپ ءوتتى.
«Eco network» جوباسىنىڭ نەگىزىن قالاعان ەۆگەني مۇحامەدجانوۆتىڭ ايتۋىنشا, قورشاعان ورتانى قورعاۋ بۇگىندە عالامدىق پروبلەماعا اينالىپ وتىر. سوندىقتان ەكولوگيالىق بەلسەندىلىك ءاربىر ازاماتتىڭ بويىنان تابىلۋى قاجەت. بۇل باعىتقا مەكتەپ وقۋشىلارىن جۇمىلدىرۋ الداعى ونجىلدىقتاردا جەمىسىن بەرەتىن ناتيجەلى ءىس. قايىرىمدىلىق ماقساتتا جۇزەگە اساتىن جوباعا بۇگىندە №25 مەكتەپپەن قاتار رفمم, «پرەستيج» جانە 2 جەكەمەنشىك, 8 مەملەكەتتىك مەكتەپتى قامتۋ كوزدەلىپ وتىر. استانا قالاسى, قوستاناي, ۇلىتاۋ جانە اقتوبە وبلىستارىندا دا جوبالار جۇزەگە اسۋدا. جوعارى وقۋ ورىندارىمەن دە بايلانىس ورناتۋ جوسپاردا بار. قازىرگى كەزدە №25 مەكتەپتە ەكوبوكستار قويىلىپ, وقۋشىلارمەن بىرلەسكەن ءىس-شارالار جۇزەگە اسىرىلىپ كەلەدى.
اكتسيا سوڭىندا ەكوبەلسەندىلەر پىكىر الماسىپ, جاڭا جوبالارعا قاتىستى جوسپارلارىمەن ءبولىستى.
الماتى
