دەپۋتات جالپى سيپاتتاعى ترانسفەرتتەردى ەسەپتەۋ ۇنەمى جەتىلدىرىلىپ وتىراتىنىن, جاڭا تاسىلدەر قولدانىلاتىنىن, بىراق پروبلەمالىق ماسەلەلەر ءالى دە ساقتالىپ وتىرعانىن اتاپ ءوتتى. دەپۋتاتتىڭ ايتۋىنشا, ول ورتالىق مەملەكەتتىك ورگاندارمەن جوبالاردى كەلىسۋ كەزىندە ايقىن كورىنەدى, ونىڭ ءراسىمى 6 ايعا دەيىن سوزىلۋى مۇمكىن. ناتيجەسىندە, جۇمىس ءىس جۇزىندە باستالعانشا, ولاردىڭ باعاسى دا ءوسىپ كەتەدى.
«وتاندىق بيۋدجەت جۇيەسىندە ءتورت دەڭگەي بولعاندىقتان, وڭىردەگى ءبىر وبەكتىنى قارجىلاندىرۋ بيۋدجەتتىڭ ءۇش دەڭگەيىندە بىردەن – رەسپۋبليكالىق, وبلىستىق جانە اۋداندىق دەڭگەيدە جۇزەگە اسۋى مۇمكىن. مۇنداي نىسانداردى جوسپارلاۋ ۋاقىت وتە كەلە سوزىلا بەرەدى, ويتكەنى جوبانى بيۋدجەتتىڭ ءار دەڭگەيىندە دە قورعاۋى كەرەك. وسىلايشا, شىعىنداردى جوسپارلاۋ مەن نەگىزدەۋگە, مەملەكەتتىك ساراپتامانىڭ قورىتىندىسىن الۋعا جانە قانداي دا ءبىر وبەكت بويىنشا مەردىگەردى انىقتاۋعا 2 جىلعا دەيىن ۋاقىت كەتۋى مۇمكىن. وسى ۋاقىت ىشىندە نارىقتاعى جاعداي مەن باعا ايتارلىقتاي وزگەرۋى ىقتيمال. سوندا شىعىنداردى تۇزەتۋ قاجەت بولادى, ال كەز كەلگەن وزگەرىستەر قايتادان بىرنەشە رەت كەلىسۋدى قاجەت ەتەدى», دەدى سەناتور.
دەپۋتات سونداي-اق ورتالىق مەملەكەتتىك ورگانداردىڭ جەرگىلىكتى بيۋدجەتتەردەن جوعارى تۇرعان بيۋدجەتتەن وتەماقىسىز قوسىمشا شىعىنداردى كوزدەيتىن نقا قابىلداۋىن نازاردان تىس قالدىرمادى. ول بۇل ءتاسىل جەرگىلىكتى اتقارۋشى ورگانداردىڭ وڭىرلىك ەكونوميكانى دامىتۋ جونىندەگى باستاماسىن تەجەيتىنىن اتاپ ءوتتى.
«شىنىندا دا, ەگەر ورتالىق اتقارۋشى ورگاندار بۇل قوسىمشا كىرىستەردى ءوز قالاۋى بويىنشا قايتا بولسە, نەگە وڭىرلەر وزدەرىنىڭ بيۋدجەتتىك كىرىستەرىن ارتتىرۋعا تىرىسادى. جەرگىلىكتى جانە ورتالىق اتقارۋشى ورگانداردىڭ مۇددەلەر قاقتىعىسى كورىنىپ تۇر», دەدى بەكبولات ورىنبەكوۆ.
سەناتور وسىعان بايلانىستى ۇكىمەتتى بيۋدجەتارالىق قاتىناستاردى جەتىلدىرۋ جونىندەگى جۇمىستى كۇشەيتۋگە شاقىردى. دەپۋتات سونداي-اق زاڭمەن بەكىتىلگەن ترانسفەرتتەر سوماسىن قاتاڭ ۇستانۋ جانە بيۋدجەت سالاسىنداعى بارلىق شەشىمدەردى وڭىرلەردىڭ دەربەستىگى مەن رياسىز قىزمەتىن ارتتىرۋداعى باسىمدىق قاعيداتىن نەگىزگە الا وتىرىپ قابىلداۋ قاجەتتىگىن اتاپ ءوتتى.
