لوندون قور بيرجاسىندا وتكەن قازاقستان ينۆەستيتسيالىق فورۋمىنا ەلىمىزدىڭ جەتەكشى مەملەكەتتىك جانە جەكە كومپانيالارى مەن شەتەلدىك بيزنەس وكىلدەرى قاتىستى.
ۇلىبريتانياداعى ەلشى ماعجان ءىلياسوۆ فورۋمعا قاتىسۋشىلارعا قازاقستان ەكونوميكاسىنا ينۆەستيتسيا سالۋدىڭ پايداسى تۋرالى ايتىپ بەردى. ول سونداي-اق ىقتيمال پروبلەمالاردى بىرگە تالقىلاۋدى ۇسىندى. اسىرەسە, رەسەيدەن قازاقستانعا كومپانيالاردى كوشىرۋ ماسەلەسى كوپشىلىكتى قىزىقتىردى. كوشۋگە بەل بۋعاندار ءوز تاجىريبەلەرىمەن ءبولىستى.
«بىرنەشە جىلدان بەرى ءونىمىمىزدى قازاقستانعا ەكسپورتتاپ كەلەمىز. ءبىز گەوگرافيالىق سەبەپتەرگە بايلانىستى ورىندى وزگەرتۋگە بولاتىن كەزەڭگە جەتتىك دەپ ويلايمىز. قازاقستاندى ورتالىق ازيانىڭ حابى رەتىندە قاراستىرا وتىرىپ, ءبىز بۇل كوشۋگە تاماشا ورىن دەپ شەشتىك. ءسىزدىڭ ەلدە بيزنەس اشۋ جانە جۇرگىزۋ ءۇشىن تاماشا جاعداي جاسالعان», دەدى دەۆيد كەشمان, United Concrete Canvas LTD بيزنەستى دامىتۋ جونىندەگى ديرەكتورى.
ىنتىماقتاستىقتاعى 30 جىل ىشىندە ۇلىبريتانيا قازاقستان ەكونوميكاسىنا 20 ميلليارد دوللاردان استام ينۆەستيتسيا سالدى. 2020 جىلى ەلگە سالىنعان ينۆەستيتسيا 36 پايىزعا, ال بۇرىن 20 پايىزعا وسكەن. ەكىجاقتى ساۋدادا دا وڭ ديناميكا بايقالادى. بيىلعى جىلدىڭ 9 ايىنىڭ قورىتىندىسى بويىنشا قازاقستان مەن ۇلىبريتانيا اراسىنداعى تاۋار اينالىمىنىڭ كولەمى 61%-عا ءوستى.
ەلىمىزدە بۇگىندە بريتانيانىڭ بارلىعى 575 كوممەرتسيالىق كومپانياسى بەلسەندى تۇردە ارەكەت ەتەدى. ولار مۇناي-گاز, تاۋ-كەن جانە ونەركاسىپ, سونداي-اق قارجىلىق قىزمەت, جوعارى تەحنولوگيالار مەن اۋىل شارۋاشىلىعى سالالارىندا جۇمىس ىستەيدى. ۇلىبريتانيا ۇكىمەتى دە بيزنەس بايلانىستاردى كەڭەيتۋ مەن تەرەڭدەتۋگە ىقىلاستى.
