جاڭا جوسپاردا وبلىس ورتالىعى مەن G-4 City اۋماعىندا ارنايى ەكونوميكالىق ايماقتار قۇرۋ دا قاراستىرىلعان. سونداي-اق پرەزيدەنت وڭىرگە پەداگوگيكالىق كادرلار مەن دارىگەرلەردى تارتۋ ءۇشىن, اتاپ ايتقاندا مامانداردى جاڭا تۇرعىن ۇيمەن قامتاماسىز ەتۋ سياقتى ىنتالاندىرۋ شارالارىن قابىلداۋ قاجەتتىگىن العا تارتتى.
«قازىرگى كۇندە قوناەۆ قالاسىنىڭ باس جوسپارىن «ۋربوستيل» كومپانياسى ازىرلەۋدە. بۇل تاراپتاعى جۇمىستار بيىلعى جىلدىڭ 20 جەلتوقسانىنا دەيىن اياقتالماق. سودان كەيىن زاڭناماعا سايكەس وبلىس اكىمدىگى جوبالىق شەشىمدەردى قالا تۇرعىندارىمەن اشىق تالقىلاۋدى ۇيىمداستىرادى. سونىمەن قاتار بۇگىندە ارنايى ەكونوميكالىق ايماقتاردىڭ تۇجىرىمداماسىن دايارلاۋ جۇمىستارى دا جۇرگىزىلۋدە. بۇل ورايداعى جۇمىستار اياقتالعان سوڭ قر يدم بەكىتىلگەن زاڭنامالىق تالاپتارعا سايكەس اەا قۇرۋ تۋرالى جۇمىستارعا كىرىسەدى», دەلىنگەن مينيسترلىك الىمەتىندە.
ايتا كەتەرلىگى, بۇگىندە الماتى وبلىسىندا تۇرعىن ءۇي ماسەلەسىن وڭتايلى شەشۋدىڭ تەتىكتەرى ىسكە قوسىلۋدا. اتاپ ايتقاندا, جاس ماماندار «الاتاۋ جاستارى» وڭىرلىك باعدارلاماسى ارقىلى باسپاناعا قول جەتكىزە الادى.
