سۇحبات • 10 قاراشا، 2022

«بەنتليدىڭ وسال تۇسىن تاپتىق» - جانىبەك ءالىمحان ۇلىنىڭ مەنەدجەرى الداعى جەكپە-جەك تۋرالى ايتتى

6671 رەت كورسەتىلدى

ساناۋلى كۇننەن كەيىن جانىبەك ءالىمحان ۇلى (12-0، 8 كو) العاش رەت چەمپيوندىق بەلدىگىن قورعايدى. ونىڭ بۇل جولعى قارسىلاسى – بريتانيالىق دەنزەل بەنتلي (17-1-1، 14 كو). وتانداسىمىزدىڭ جەكپە-جەك الدىنداعى جاي-كۇيىن، ازىرلىگىن ءبىلۋ ءۇشىن جانىبەك ءالىمحان ۇلىنىڭ مەنەدجەرى بەرىك سۇلتانمەن اڭگىمەلەسكەن ەدىك.

- جانىبەك ءالىمحان ۇلىنىڭ كەزدەسۋ الدىنداعى كوڭىل-كۇيى، دايىندىعى قالاي؟

ءبىزدىڭ كوماندا ءۇشىن بۇل وتە ماڭىزدى جەكپە-جەك. سەبەبى چەمپيوندىق بەلبەۋىمىزدى العاش رەت قورعايىن دەپ جاتىرمىز. بۇل تەك كوماندا ءۇشىن عانا ەمەس، قازاق ەلى ءۇشىن دە ماڭىزدى جەكپە-جەك. ويتكەنى جانىبەك قازاق دالاسىنا WBO تۇجىرىمىنىڭ الەم چەمپيونى تيتۋلىن الىپ كەلگەن، وسى تۇجىرىمدا چەمپيون بولعان تۇڭعىش قازاق. تاريح جاساعان سپورتشى. سول ءۇشىن دە بۇل شوۋدى جانكۇيەرلەر تاعاتسىزدانا كۇتىپ وتىر. ەلدىڭ سەنىمىن ارقالاعان بىزگە قازىر ءبىر ساتكە دە بوساڭسۋعا بولمايدى. كوڭىل كۇي دە دايىندىق تا تاماشا! دايىندىق ادەتتەگىدەي لوس-اندجەلەس قالاسىندا ءوتتى. ەكى اي بويى شىڭدالدىق. ءۇش بوكسشىمەن توقسان راۋندقا جۋىق سپاررينگ جاسالدى. بۇيىرتسا، بۇل جەكپە-جەك جانىبەككە وڭاي بولادى دەپ ويلايمىن. 

- قارسىلاستىڭ قارىم-قابىلەتى جايلى نە ايتا الاسىزدار؟ ونىڭ ءادىس-تاسىلدەرىن، وسال تۇستارىن زەرتتەپ ۇلگەردىڭىزدەر مە؟

قارسىلاس وسال ەمەس. WBO-نىڭ رەيتىنگىندە تۇرعان بوكسشى. ول رەيتينگكە كەز كەلگەن بىلعارى قولعاپ شەبەرى كىرە المايدى. ول - ءوز ەلىنىڭ ۇزدىگى. رينگتە ەركىن قيمىلدايتىن، سوققىسى اۋىر، تاجىريبەلى قارسىلاس. دەگەنمەن كىم بولسا دا، قانداي بولسا دا جانىبەكتى ۋايىمداتا المايدى. سەبەبى «QAZAQ STYLE» وسىعان دەيىن ەكى بىردەي الەمنىڭ ەكس چەمپيونىن نوكاۋتپەن ۇتقان. بەنتليدەن دە مىقتى قارسىلاستارمەن، ياعني چەمپيوندارمەن جۇدىرىقتاسۋعا دايىنبىز. ولاردى جەكپە-جەككە شاقىرىپ تا ءجۇرمىز. بەنتليدى جەڭۋگە بىزدە بىرنەشە ايلا-ءتاسىل دايىن. وسال تۇستارىن تاۋىپ، جاتتىعۋ لاگەرىندە دايىندالدىق. بۇيىرسا، كورەسىزدەر! 

ى

جانىبەك ءالىمحان ۇلى كومانداسىمەن لاس-ۆەگاسقا كەلدى

- قازان ايىندا جانىبەك «رينگتە جارقىرايمىن» دەدى. كورەرمەندەرگە كوزىلدىرىك تاعىپ كەلۋگە كەڭەس بەرگەن. ونىڭ بۇل سوزىنەن وزىنە دەگەن زور سەنىم بايقالادى. بىراق بۇل - قارسىلاستى مەنسىنبەۋ ەمەس پە؟ 

سەنىمدى سويلەۋ، ءىرى سويلەۋ – جانىبەكتىڭ ءستيلى. بۇعان قازىر جانكۇيەرلەر دە ۇيرەندى. جانىبەك قۇر سويلەپ قانا قويماي، ءسوزىن ىسپەن دالەلدەپ قويعان بوكسشى. الەم چەمپيونى. كاسىپقوي بوكستا قازىر مومىن بوكسشىلار شەتتە قالادى. قازىر ۇنەمى نازاردا بولۋىڭ كەرەك. ال قارسىلاس مەنسىنبەۋ دەگەن بىزدە مۇلدە جوق. قارسىلاس مەنسىنبەسەك ەكى اي بويى قان مەن تەر توگىپ جاتتىقپاس ەدىك. توقسان راۋند سپاررينگ جاساپ شارشاماس ەدىك. كۇنىنە ەكى مەزگىل جاتتىعۋ جاساپ اۋرە بولماس ەدىك. قازاق «ەلەمەگەن بۇتاق كوز شىعارادى» دەيدى. قارسىلاستىڭ قاۋىپتى ەكەنىن بىلگەن سوڭ وسىلاي جاتتىعىپ جاتىرمىز. مەنسىنبەسەك وسىلاي جاسايمىز با؟ ال قاراپايىمدىلىققا كەلسەك، جانىبەكتەن اسقان قاراپايىم سپورتشىنى مەن ءالى كەزدەستىرمەپپىن. جانىبەك بويىندا تاكاپپارلىعى جوق، كىشىپەيىل، ادەپتى جانە وتە قاراپايىم بوكسشى. ال ءىرى سويلەۋدى ماقتانۋمەن، سەنىمدى بولۋدى تاكاپپارلىقپەن شاتاستىرماۋ كەرەك. ەكەۋى ەكى بولەك دۇنيە. مۇنى جانىبەك ءوزى دە جانكۇيەرلەرىنە ايتقان بولاتىن. جانىبەك -  باتىر. باتىر دەگەن قارسىلاسىنا سىزىلىپ سويلەپ، مەيىرلەنە قارامايدى. باتىردىڭ قارسىلاسى جاۋى ءتارىزدى. جاۋىن تۇقىرتۋ ءۇشىن، قورقىتۋ ءۇشىن، جەڭۋ ءۇشىن جاۋىنگەر بارىن سالادى. بوكس – جەكپە-جەك. سەن ۇرماساڭ، سەنى ۇرادى. سەنى جىلى سويلەدى دەپ ءجاي ۇرمايدى. قارسىلاسىڭ سەنى قۇلاتۋعا، ابىرويىڭدى تۇسىرۋگە بارىن سالادى. ال ونداي ادامعا قالاي مەيىرلەنە سويلەيسىڭ؟ بوكس قاتال سپورت. بۇل سپورتتا جەڭۋ مەن جەڭىلىستەن بولەك، ءولىم دە بار. مۇگەدەك بولۋ قاۋىپى دە بار. بوكسشىنى ءبيشى، انشىلەرمەن شاتاستىرماۋ كەرەك!

- راحمەت! جەڭىستى ساتتەرىڭىز كوپ بولسىن!

سوڭعى جاڭالىقتار

دوللار باعامى قايتا ءوستى

قارجى • بۇگىن، 16:12

ۇقساس جاڭالىقتار