ءىس-شارا ينستيتۋتتىڭ جەكە قۇرامىن قىرعىز حالقىنىڭ ادەبيەتى, مادەنيەتى جانە سالت-داستۇرىمەن تانىستىرۋعا باعىتتالعان. كورمەگە ەكى ەل اراسىنداعى تاريحي قارىم-قاتىناستار تۋرالى دەرەكتەر مەن قىرعىز جازۋشىلارىنىڭ شىعارمالارى قويىلدى. ءوز كەزەگىندە قىرعىزستاندىق كۋرسانتتار مادەني باعدارلاما ۇيىمداستىردى, ولەڭ وقىپ, ەكى تىلدە ءان شىرقادى.
– ەكى ەلدىڭ ءتۇبى ءبىر, تاريحى مەن مادەنيەتى دە ورتاق. وتانىمىزدان شەت جۇرسەك تە, قازاق ەلىندە ەشكىم ءبىزدى سىرتقا تەپكەن جوق, قايتا جىلى قابىلداپ, باۋىرلارىنا تارتىپ كەلەدى. الىستاعى اتا-انالارىمىز دا ءبىز ءۇشىن الاڭدامايدى, قازاق حالقىنىڭ باي مادەنيەتى مەن تاريحى جانىمىزعا جاقىن, – دەيدى ينستيتۋتتىڭ 5-كۋرس ستۋدەنتى الحانبەك بولكوەۆ.
ءىس-شارا بارىسىندا باۋىرلاس قازاق پەن قىرعىز رۋحانياتىندا ەسىمدەرى قاتار اتالاتىن جامبىل مەن توقتاعۇل, ءسۇيىنباي مەن قاتاعان, اۋەزوۆ پەن ايتماتوۆ سەكىلدى تۇعىرلى تۇلعالاردىڭ شىعارماشىلىعىنا شولۋ جاسالدى. كۋرسانتتارعا ەكى ەلدىڭ وتكەنى مەن بۇگىنى, تاريحي ساباقتاستىعى تۋرالى ارنايى ازىرلەنگەن بەينەماتەريال كورسەتىلىپ, سالت-داستۇرلەرىنە قاتىستى ەستافەتالىق ويىندار ويناتىلدى.
ۇجىمدىق قاۋىپسىزدىك كەلىسىمى ۇيىمىنىڭ باعدارلاماسى بويىنشا اسكەري ينستيتۋتقا قىرعىزستان مەملەكەتىنىڭ وكىلدەرى دە قابىلدانادى. بۇگىنگە دەيىن اتالعان اسكەري ءبىلىم وشاعىن 18 قىرعىزستاندىق كۋرسانت ءبىتىرىپ, 8 كۋرسانت ءبىلىمىن شىڭداپ ءجۇر.
الماتى
