Silkway Accelerator اياسىندا جوبالارىن دامىتۋ مۇمكىندىگىنە يە بولعان 13 ستارتاپ باعدارلامانى ءساتتى اياقتاپ, اكسەلەراتور كەزىندە قول جەتكىزگەن جەتىستىكتەرىمەن ءبولىستى. مىسالى, Citix اقپاراتتىق-ناۆيگاتسيالىق جۇيەسى تۇركيا مەن ءباا نارىعىنا شىقتى. Zypl.ai ستارتابىنىڭ نەگىزىن قالاۋشىلار ەكى جاڭا نارىقتا – قازاقستان مەن قىرعىزستاندا ساتىلىمدى ۇلعايتىپ, قۇنىن 6 ملن-نان 10 ملن دوللارعا دەيىن ارتتىردى. ال Beyne.ai بەت-الپەتىن تانۋ جانە فەيكتى ىزدەۋ جۇيەسى تەك تەحنولوگيالاردى ازىرلەۋدەن تۇتاس ەكوجۇيەنى قۇرۋعا, ءىرى كومپانيالار ينتەگراتسياسى جانە كومپيۋتەرلىك كورۋدى دامىتۋعا كوشتى.
«باستاپقىدا بۇل جاي عانا ستارتاپتارعا ارنالعان كەزەكتى قاراپايىم باعدارلاما دەپ ويلادىم. بىراق قازىر ومىرىمدەگى ەڭ جاقسى باعدارلاما دەپ سانايمىن. بەلسەندىرەك, سونىمەن بىرگە بارىنشا ويلاسىپ ارەكەت ەتە باستادىق. دامۋدى جەدەلدەتەتىن جاڭا بيزنەس قادامدار ىزدەستىردىك. اتاپ ايتقاندا, امەريكا, كانادا جانە اۋستراليا نارىقتارىندا بەلسەندىلىگىمىز ارتتى», دەپ اسەرىمەن ءبولىستى Smoothly LTD باس ديرەكتورى ەرجان اسانوۆ.
ونىڭ ۇيقىنى جاقسارتاتىن Smoothly ءموبيلدى قوسىمشاسى «دەنساۋلىق جانە فيتنەس» كاتەگورياسى بويىنشا كانادا مەن اۋسترالياداعى App Store 100 ۇزدىك قولدانباسىنىڭ تىزىمىنە ەنىپ, 30 مىڭنان اسا جۇكتەلگەن.
قاتىسۋشىلار باعدارلاما مەن ترەكەرلەر ارقىلى جاھاندىق دەڭگەيدە ويلانىپ, بيزنەس ستراتەگياسىن قايتا قاراستىرعاندارىن اتاپ ءوتتى. Silkway Accelerator باعدارلاماسى اياسىندا ستارتاپتار ءۇش ايدا جاقسى ناتيجە كورسەتتى.
اكسەلەراتوردىڭ جۇرگىزۋشىسى – ونىمدەردى, قىزمەتتەردى جانە كومپانيالاردى ازىرلەۋ, دامىتۋ جانە نارىققا شىعارۋ بويىنشا حالىقارالىق كەڭەسشى الىشەر حاسانوۆ. ونىڭ Rutube, رامبلەر, ياندەكس, Yandex.Turkey, Digital October سياقتى ءىرى كومپانيالار مەن باسقا دا ايگىلى اكسەلەراتورلاردا جۇمىس تاجىريبەسى بار.
«بۇل ستارتاپتارمەن جۇمىس بارىسىندا كەرەمەت كۇيدە بولدىم. ويتكەنى باتىل جانە سەنىمدى قيمىلدايدى. ولار – Silkway Accelerator-دىڭ العاشقى تۇلەكتەرى, بارلىق ستارتاپتارعا قالاي دامىپ, ءار ەلدەردە ءوز پوزيتسيالارىن قالاي نىعايتۋ كەرەكتىگىن كورسەتەدى. مەن قولىمنان كەلگەنشە ولاردى شارىقتاتۋعا تىرىستىم جانە بۇدان دا بيىك اسۋلاردى الادى دەگەن ۇمىتتەمىن», دەدى ءا.حاسانوۆ.
ءۇش اي ىشىندە CTOgram جوباسى 230 مىڭ بەلسەندى اۆتوكولىك يەلەرى مەن 2 مىڭنان استام جوندەۋ شەبەرحانالارىن قامتىدى. موڭعولدىق Fibo.cloud كومپانياسى موڭعوليا ۇكىمەتىمەن مەملەكەتتىك بۇلتتىق قىزمەتتەرگە كەلىسىمشارت جاساسىپ, قازاقستانداعى تەلەكوممۋنيكاتسيالىق كومپانيامەن كەلىسىمگە قول قويۋ ارقىلى اي سايىنعى كىرىسىن 22 ەسەگە ارتتىردى. FocusED now 15 ملن تەڭگەگە كەلىسىمشارت جاساسىپ, نارىقتاعى ورنىن تاپتى. iDos Games 60 مىڭ جاڭا قولدانۋشى تاۋىپ, ايلىق كىرىسىن ءتورت ەسەگە ۇلعايتتى. Naimi ءباا نارىعىنا شىعىپ, 70 تاپسىرىس الدى, ونىڭ ساتىلىمى 6 مىڭ دوللاردى قۇرادى. قىرعىزستاندىق NB Fit كومپانياسى ءونىمىن اقش نارىعىنا بەيىمدەپ, اقش پەن ەۋروپادان تۇسەتىن تولەمدەردى 20%-دان 30%-عا دەيىن ارتتىردى. ال Tripsome.com اكسەلەراتوردىڭ 3 ايىنداعى ساتىلىمى باعدارلاماعا دەيىنگى 17 ايداعىدان اسىپ ءتۇستى. سونىمەن قاتار كومپانيا قازاقستاندا ۆەب-سايتتى ءساتتى ىسكە قوسىپ, 30-دان استام جەرگىلىكتى سەرىكتەستەرمەن كەلىسىمشارتقا وتىرىپ, العاشقى ساتىلىمدارىن جۇزەگە اسىردى. UvU اينالىمدى, كىرىستى جانە تاپسىرىستاردى قوسا العاندا, نەگىزگى كورسەتكىشتەرىن 3-5 ەسە ارتتىردى جانە باعىتىن كەڭەيتىپ, بيزنەس ۇلگىسىن وزگەرتتى. Zan.bar ەۋروپا نارىعىنا شىعىپ, ءوز ءونىمىن ۇلىبريتانياداعى 12 بانكپەن بىرىكتىردى.
«Silkway Accelerator-دىڭ ءبىرىنشى لەگى ءوزىنىڭ تيىمدىلىگىن كورسەتتى. ءۇش ايدىڭ ىشىندە بارلىق قاتىسۋشى كومپانيالار ايتارلىقتاي ءوستى. Google جانە Astana Hub ساراپشىلارىنىڭ قولداۋىمەن ستارتاپتار ترانسفورماتسيادان ءوتىپ, تاماشا ناتيجەلەرگە قول جەتكىزدى. قاتىسۋشىلار وسىنداي قارقىندا دامىسا ەكەن دەيمىز. جانە ءبىز باعدارلامانى جالعاستىرىپ, جۋىردا ەكىنشى لەگىنىڭ جاقسى ناتيجەلەرىن كورەمىز دەگەن ۇمىتتەمىز», دەدى Astana Hub باس ديرەكتورى ماعجان ماديەۆ.
ەسكە سالا كەتەلىك, Silkway Accelerator باعدارلاماسىنىڭ ءبىرىنشى لەگى بيىل شىلدە ايىندا باستالىپ, 28 قىركۇيەكتە Digital Bridge فورۋمىندا باعدارلامانىڭ قورىتىندىسى بويىنشا Demo Day ءوتتى. وعان ورتالىق ازيا, ازەربايجان جانە موڭعوليا ەلدەرىنەن ستارتاپتار قاتىستى.
Silkway Accelerator باعدارلاماسىنىڭ ەكىنشى لەگى 2 قىركۇيەكتە باستالدى. استانادا وفلاين تارتىپتە ءوتىپ جاتقان وقۋ 3 ايعا سوزىلادى. Silkway Accelerator قاتىسۋشىلارى تالىمگەرلىكپەن قاتار, Astana Hub جانىندا تەگىن باسپاناعا, جۇمىس ورنىنا يە بولدى, سونداي-اق Seed Money باعدارلاماسى بويىنشا 55 مىڭ دوللارعا دەيىن قارجى الۋ مۇمكىندىگى بار.
Google for Startups – 2011 جىلى Google كورپوراتسياسى ىسكە قوسقان ستارتاپ باعدارلاماسى. ول 125 ەلدەگى 50-دەن استام كوۆوركينگ پەن اكسەلەراتوردان تۇرادى جانە بيزنەستى جاڭا باستاعان كاسىپكەرلەر ءۇشىن پراكتيكالىق ساباقتار ۇسىنادى. Astana Hub بيىل Google for Startups باعدارلاماسىنىڭ ورتالىق ازياداعى العاشقى سەرىكتەسى بولدى.
